Kufanele Sihlale Sikulungele Kushumayela
1. Sati njani kutsi bavangeli bangesikhatsi sebaphostoli bebahlala bakulungele kushumayela?
1 Bavangeli labakhutsele bangesikhatsi sebaphostoli bamemetela tindzaba letinhle ngenkhutsalo nome ngukuphi lapho bantfu bebatfolakala khona. (Imis. 5:42) Loku kusho kutsi nabashumayela emtini ngemuti bebangabendluli nebantfu labebabatfola emgwacweni. Bebangawayekeli nematfuba ekufakaza bangakahleli nabatsenga etitolo ngemuva kwemsebenti wekushumayela. NjengaJesu, bebahlala bakulungele kushumayela.—Mak. 6:31-34.
2. Kuhlanganisani kuphila ngekuvumelana nelibito letfu?
2 Kuhlala Sikulungele: Libito letfu lelitsi boFakazi BaJehova alimane nje lichaze loko lesikwentako, kodvwa lichaza loko lesingiko. (Isa. 43:10-12) Ngako-ke sihlala sikulungele kuvikela litsemba letfu ngisho nobe singekho emsebentini wekushumayela emtini ngemuti. (1 Phet. 3:15) Uyatilungiselela yini timo letingakuvumela kutsi ufakaze ungakahleli, bese ucabanga ngalongase ukusho? Uhlale unato yini tincwadzi longatisebentisa kute ushumayele kulabakhombisa inshisekelo? (Taga 21:5) Ushumayela emtini ngemuti kuphela yini, nobe uphindze utisakate tindzaba letinhle kubantfu kuletinye tindzawo nangabe timo tikuvumela?
3. Kungani kutsi ‘letinye tindlela’ kungasilo ligama lelikahle lekuchaza kushumayela emgwacweni, etindzaweni tekupaka timoto, emapaki, etindzaweni temabhizinisi kanye nakuletinye tindzawo?
3 ‘Letinye Tindlela’ Tekufakaza: Ekucaleni besivame kusebentisa ligama lelitsi ‘letinye tindlela’ nasikhuluma ngekushumayela emgwacweni, etindzaweni tekupaka timoto, emapaki, etindzaweni temabhizinisi kanye nakuletinye tindzawo. Nanobe kunjalo, kutsi ‘letinye tindlela’ kungase kuvakale shengatsi kushumayela etindzaweni letinjalo akukavami, nobe awukaphoceleleki kukwenta. Umphostoli Pawula watsi washumayela “embikwebantfu” nasemtini ngemuti. (Imis. 20:20) Ngako-ke kutsi kufakaza “etindzaweni tawonkhewonkhe” kutawuvakala kancono kunekutsi ‘letinye tindlela’ tekufakaza. Kuliciniso kutsi kushumayela emtini ngemuti kutawuchubeka kuyindlela leyinhloko nalephumelelako yekufinyelela bantfu ngemlayeto weMbuso. Nanobe kunjalo, bavangeli bangesikhatsi sebaphostoli bebanaka kakhulu bantfu, hhayi imiti. Basebentisa onkhe ematfuba kute batjele bantfu liciniso—kungaba setindzaweni tawonkhewonkhe, bangakahleli kanye nasemtini ngemuti. Shengatsi natsi singenta lokufananako kute siwufeze ngalokugcwele umsebenti wetfu.—2 Thim. 4:5.