Ungatigodli—Ncoba Kutiva Ungafaneleki
1. Bentiwa yini labanye kutsi bangasiceli sifundvo seliBhayibheli?
1 Uyesaba yini kucela sifundvo seliBhayibheli ngobe ungatetsembi kutsi ungakhona kusichuba? Ngaletinye tikhatsi, tinceku tasendvulo letetsembekile letifaka ekhatsi Mosi naJeremiya, tativa tingafaneleki kwenta tabelo tato. (Eks. 3:10, 11; 4:10; Jer. 1:4-6) Ngako-ke, imiva lenjalo ivamile. Singayincoba njani?
2. Kungani kungakafaneli kutsi seneliswe kushumayela emtini ngemuti kuphela bese sititjela kutsi tifundvo teliBhayibheli titawuchutjwa ngulabanye?
2 Kufanele sikhumbule kutsi Jehova akakaze asicele kutsi sente lokungetulu kwemandla etfu. (Hla. 103:14) Ngaleso sizatfu, umsebenti lasinikete wona ‘wekwenta bafundzi’ ‘nekubafundzisa,’ singakhona kuwufeza. (Mat. 28:19, 20) Awusilo lilungelo Jehova lalinikete labanalokuhlangenwe nako nobe labanelikhono kuphela. (1 Khor. 1:26, 27) Ngako-ke, akukafaneli seneliswe kushumayela emtini ngemuti kuphela bese sititjela kutsi tifundvo teliBhayibheli titawuchutjwa ngulabanye.
3. Jehova usicecesha njani kuze sikhone kuchuba tifundvo teliBhayibheli?
3 Jehova Uyasicecesha: NguJehova losenta sikhone kwenta bafundzi. (2 Khor. 3:5) Ngenhlangano yakhe usifundzise emaciniso eliBhayibheli langatiwa ngisho nabantfu labafundze bagogodza kulelive. (1 Khor. 2:7, 8) Usigcinele imininingwane yendlela Jesu uMfundzisi Lomkhulu lafundzisa ngayo kuze simlingisele futsi uyachubeka nekusicecesha asebentisa libandla. Ngetulu kwaloko, Jehova usinikete netincwadzi lesingatisebentisa nasifundzisa ngeliBhayibheli. Usinikete emathuluzi lafaka ekhatsi incwadzi letsi Lokufundziswa LiBhayibheli, lefundzisa liciniso ngendlela lehlelekile nalokumelula kulivisisa. Kuchuba sifundvo seliBhayibheli kungase kungabi matima njengobe sicabanga.
4. Yini lengasenta siciniseke kutsi Jehova utasisita?
4 Mosi naJeremiya bakhona kufeza tabelo tabo ngekusitwa nguJehova. (Eks. 4:11, 12; Jer. 1:7, 8) Natsi singamcela Jehova kutsi asisite. Nasichuba sifundvo seliBhayibheli sisuke sifundzisa lotsite liciniso ngaJehova, lokuyintfo lemjabulisako Yena. (1 Joh. 3:22) Ngako-ke, kwente umgomo wakho kuchuba sifundvo seliBhayibheli lokuyintfo lemnandzi kuyenta futsi kuletsa tibusiso.