Kufundvwa Kwencwadzi Letsi “Sondela KuJehova” Kutawucala Ngeliviki La-January 6
1. Kusukela ngeliviki la-January 6, ngumaphi ematfuba lesitawuba nawo latasisita kutsi sisondzele kuJehova?
1 Jehova ufuna kutsi sisondzele kuye. (Jak. 4:8) Kute asisite kutsi sente njalo, kusukela ngeliviki la-January 6 sitawufundza incwadzi letsi “Sondela KuJehova” eSifundvweni SeliBhayibheli Selibandla. Mayelana nenjongo yalencwadzi, likhasi layo lekucala litsi: “Ukuzindla ngendlela uJehova ayibonisa ngayo imfanelo yakhe ngayinye, ukubona indlela uJesu Kristu azibonakalisa ngayo ngendlela ephelele lezo zimfanelo, nokuqonda ukuthi thina singazihlakulela kanjani, kuyosisondeza kuNkulunkulu.” Lencwadzi yake yafundvwa emabandleni nga-2004 nanga-2005. Nobe kunjalo, bamemeteli labacishe babe tigidzi letimbili lababe ngemaKhristu ngemuva kwaleyo minyaka, batawube bacala ngca kuva kuchazwa kabanti ngebunguye baJehova lobumangalisako. Kulabo labake bayifundza lencwadzi esikhatsini lesendlulile, kuphindze ifundvwe kutabasita kutsi lijule lizinga labatisa ngalo bunguye baJehova.—Hla. 119:14, NW.
2. Incwadzi letsi “Sondela KuJehova” itawufundvwa njani?
2 Indlela Letawufundvwa Ngayo Lencwadzi: Lochuba sifundvo utawucala ngesetfulo lesifishane, mhlawumbe asho umusho munye nobe mibili. Lencwadzi ayiyisho imibhalo lokufanele ifundvwe, ngako-ke, nakuchutjwa lesifundvo losichubako utawukhetsa imibhalo leyinhloko kutsi ifundvwe. Kungase kubutwe munye nobe mibili imibuto ekupheleni kwesifundvo ngasinye kute kubuketwe. Nangabe indzaba lefundvwako ihlanganisa libhokisi lelitsi: “Imibuzo Yokuzindla,” leyo mibuto ingasetjentiswa kute kubuketwe. Nangabe sikhatsi sivuma, lochuba lesifundvo angase acele kutsi imibhalo lesebhokisini lekhonjiwe ifundvwe bese ubuta imibuto leseceleni letakwenta kutsi labakhona baphawule.
3. Njengobe sitawube sifundza lencwadzi, yini lokufanele siyente futsi kungani?
3 Zuza Ngalokuphelele: Lungiselela kusenesikhatsi ngisho nobe wayifundza lencwadzi. Phendvula nakuchubeka sifundvo ngobe kwenta njalo kutawudvumisa Jehova futsi kukusite ukhumbule emaphuzu kuphindze kusite nalabanye labatawube bakhona. (Hla. 35:18; Heb. 10:24, 25) Njengobe uzindla ngebunguye baJehova lobungeke bucatsaniswe, utawusondzela kakhulu kuye. (Hla. 77:11-13) Loko kutawuphindze kukusite kutsi utimisele kulalela imiyalo yakhe futsi kukukhutsate kutsi utjele labanye ngaye.—Hla. 150:1-6.