Incwadzi Levela ESigungwini Lesibusako
Bazalwane Nabodzadzewetfu Labatsandzekako:
“Ngaso sonkhe sikhatsi siyambonga Nkulunkulu nasinibeka emithantazweni yetfu, ngobe asiwukhohlwa umsebenti wenu wekwetsembeka, kutikhandla kwenu ngelutsandvo, kanye nekucinisela kwenu ngenca yelitsemba leninalo eNkhosini yetfu Jesu Khristu embikwaNkulunkulu wetfu longuBabe.” (1 Thes. 1:2, 3) Lamavi ayiveta kahle indlela lesitiva ngayo ngani! Simbonga kakhulu Jehova ngekuba nani kanye nemsebenti lomuhle leniwentako. Kungani sitiva kanjalo?
Kulomnyaka lowendlulile, benimatasa nenta “umsebenti wekwetsembeka” futsi ‘nitikhandla ngelutsandvo’ emsebentini weMbuso. Labanyenti benu bafune tindlela tekwenta lokunyenti emsebentini wekushumayela. Labanye batfutsele kuletinye tindzawo, ngisho nasemaveni lapho kunesidzingo lesikhulu khona sebavangeli beMbuso. Labanye bente lokunyenti emsebentini wekushumayela ngekutsi bashumayele etindzaweni tawonkhe wonkhe. Kantsi labanye babe ngemahlahlandlela lasitako ngesikhatsi seSikhumbuto, ngenyanga yekuvakasha kwembonisi wesigodzi, kanye nangemkhankaso lokhetsekile lobewunga-August 2014. Nanobe timo tenu tishintjashintja, siyati kutsi umsebenti waJehova niwenta ngemphefumulo wonkhe, futsi sinibonga kakhulu. (Khol. 3:23, 24) “Umsebenti wenu wekwetsembeka” usiniketa sizatfu lesihle sekubonga Jehova!
Sikubonga kakhulu ‘nekutikhandla kwenu ngelutsandvo’ ngekulekelela ekwakhiweni kwetakhiwo tenhlangano letitse citsi saka emhlabeni wonkhe. Njengobe linani lebantfu baJehova lichubeka likhula, sitidzinga kakhulu letakhiwo. (Isa. 60:22) Cabanga nje, linani lelisetulu lesibe nalo lebamemeteli kulomnyaka lowendlulile libe ngu- 8 201 545, kantsi ngekwesilinganiso besichuba tifundvo teBhayibheli letingu- 9 499 933 inyanga ngayinye. Ngenca yalokwandza, emahhovisi eligatja lamanyenti kudzingeka akhuliswe nobe alungiswe. Kuliciniso nekutsi sidzinga emaHholwa eMbuso lengetiwe! Ngesikhatsi lesifanako kudzingeka emahhovisi ekuhumusha etindzaweni letinyenti kuze bahumushi bahlale futsi basentele kuleyo ndzawo lapho lolo lwimi lwabo lukhulunywa khona.
Ngako, singase sitibute: ‘Yini mine lengingayenta kuze ngisekele kwakhiwa kwaletakhiwo?’ Labanye betfu bangakhona kuvolontiya kulomsebenti wekwakha. Kodvwa kungakhatsaliseki kutsi sinawo emakhono ekwakha nobe site, sonkhe sinalo lilungelo lekunikela ngetintfo tetfu letiligugu kuze sisekele kulemisebenti lebalulekile. (Taga 3:9, 10) Ngesikhatsi kwakhiwa lithende lekukhontela, ema-Israyeli bekanesifiso lesihle sekupha kangangekutsi kwaba nesimemetelo sekutsi sale ema kunikela. (Eks. 36:5-7) Bufakazi busebaleni kutsi tibonelo letinjena letisemiBhalweni tisitsintsa inhlitiyo futsi tiyasikhutsata. “Kutikhandla kwenu ngelutsandvo” kulomsebenti longcwele kungulesinye sizatfu lesisenta sibonge Jehova!
Sinesizatfu lesihle sekujabula nasibona bazalwane betfu bema bacinile ngesikhatsi sebumatima. Nasi sibonelo: Ase ucabange ngebazalwane betfu baseNingizimu Korea. Kusukela nga-1950, bazalwane labasebasha bebavalelwa emajele sikhatsi lesitsite ngenca yekungabi nencenye kutembusave. Titukulwane letinyenti tebazalwane betfu tikubeketelele lokuphatfwa kabi, tangashintji. Sibonelo sabo sekukhutsatela sicinisa kukholwa kwetfu!
E-Eritrea, bazalwane betfu labatsatfu sebaboshwe iminyaka lengetulu kwalengu-20. Labanye labafaka ekhatsi bodzadzewetfu nebantfwana babo nabo baboshwe sikhashana. Sekwentiwe imetamo leminyenti yekutsi bakhululwe, kodvwa kwanyalo kubonakala kute imiphumela lemihle. Bazalwane betfu abakakulahli kukholwa kwabo. Bachubeke nebucotfo babo ngisho nobe babhekene netimo letimatima. Asibakhohlwa laba labetsembekile emithantazweni yetfu.—Rom. 1:8, 9.
Kuliciniso kutsi labanyenti benu abakavalelwa emajele ngenca yekukholwa. Nanobe kunjalo, labanyenti benu kungenteka babhekana netimo tekuguga, kugula lokungumahlalakhona, kuphikiswa lokuvela kuloshade naye longasiye umKhristu nobe etihlotjeni, ngisho naletinye nje timo letikucindzetelako letatiwa nguwe kuphela. Kodvwa nanobe kunjalo, uyachubeka ukhonta Jehova ngekwetsembeka! (Jak. 1:12) Siyanibonga kakhulu. Kukhutsatela kwenu ngekwetsembeka kungulesinye sizatfu lesisenta sibonge Jehova.
Umsebenti wenu wekwetsembeka, kutikhandla kwenu ngelutsandvo, kanye nekukhutsatela kwenu kusinika tizatfu letinhle ‘tekubonga Jehova ngobe muhle.’ (Hla. 106:1) Sinitsandza kakhulu, futsi sithantazela kutsi Jehova anganinika emandla, anilondvolote, futsi anibusise kuze nichubeke nimkhonta kuze kube phakadze.
Bazalwane benu,
Sigungu Lesibusako SaBoFakazi BaJehova