KUPHILA KWEMAKHRISTU
Bani Ngumfundzi Lokhutsele WeliVi LaNkulunkulu
Ungatsandza yini kuhlala wetsembekile njengaDanyela ngisho nobe uvivinywa? Danyela abekukhutsalela kufundza liVi laNkulunkulu kuhlanganise netiphrofetho letijulile. (Dan 9:2) Kukhutsalela kufundza liBhayibheli kungakusita uhlale wetsembekile. Njani? Kungakusita uciniseke kutsi tetsembiso taJehova titawugcwaliseka. (Jos 23:14) Kungaphindze kukusite umtsandze kakhulu Nkulunkulu, futsi wente lokulungile. (Hla 97:10) Kodvwa kufanele ucale kuphi? Cabanga ngaletinyatselo letilandzelako.
Yini lokufanele ngiyifundze? Luhlelo lolukahle lwekufundza, lufaka ekhatsi kulungiselela imihlangano yelibandla. Kufundvwa kweliBhayibheli kwamaviki onkhe kungakuzuzisa kakhulu nangabe utinika sikhatsi sekucwaninga ngaloko longakucondzisisi kahle. Ngetulu kwaloko, labanye bakhetse kufundza lokunyenti ngetiphrofetho letiseBhayibhelini, ngetitselo temoya waNkulunkulu, ngeluhambo lwemphostoli Pawula, ngisho nangendalo yaJehova. Nangabe kuyenteka utibuta lokutsite longatfola imphendvulo yako eBhayibhelini, kubhale phasi bese uhlela kucwaninga ngako.
Ngingacwaninga kuphi? Kuze usitakale, bukela i-video letsi Emathulusi Ekucwaninga Lasisita Sifunisise Umcebo. Kuze uticeceshe, cwaninga ngekutsi ngumiphi imibuso yemhlaba lemelelwa tilo lokukhulunywa ngato kuDanyela sehluko 7.
Kufanele ngitsatse sikhatsi lesingakanani nangifundza? Kufundza njalo ngaNkulunkulu ngiko lokusenta sibe nebuhlobo lobucinile naye. Nawusacala, ungatsatsa sikhatsi lesincane, njengobe uchubeka ungabese ucitsa sikhatsi lesinyenti. Kufundza liVi laNkulunkulu kufanana nekufunisisa umcebo lofihliwe; nangabe lomcebo uwutfola uyachubeka umba ujule. (Tag 2:3-6) Sifiso sakho sekufundza liVi laNkulunkulu sitawukhula, futsi utawuchubeka ulifundza njalo.—1Ph 2:2.
TIMELELANI TILO LOKUKHULUNYWA NGATO KUDANYELA SEHLUKO 7?
LOMUNYE UMBUTO:
UmBhalo waDanyela 7:8, 24 wagcwaliseka njani?
LENGITAWUCWANINGA NGAKO:
Timelelani tilo lokukhulunywa ngato kuSembulo sehluko 13?