Unako Yini Kukholwa?

Kuze sijabulise Jehova, kufanele sibe nekukholwa. Nobe kunjalo, liBhayibheli litsi “akusibo bonkhe bantfu labanekukholwa.” (2 Thes. 3:2) Ngesikhatsi umphostoli Pawula asho loku, bekakhuluma ‘ngebantfu labayingoti nalababi,’ lebebamphatsa kabi. Kodvwa loko lakusho ngekukholwa kungasebenta nakulabanye bantfu. Labanye bantfu bakhetsa kungabunaki bufakazi lobusebaleni bekutsi ukhona uMdali, lokunguNkulunkulu. (Rom. 1:20) Labanye bangahle batsi bakholelwa entfweni letsite nobe kumuntfu lotsite lonemandla lamakhulu. Kodvwa loku akusiko kukholwa mbamba.

Kufanele siciniseke kutsi Jehova ukhona nekutsi ubanika umvuzo labo labanekukholwa lokucinile. (Heb. 11:6) Kukholwa kuyincenye yetitselo temoya longcwele. Kuthantaza kuJehova kungasita umuntfu kutsi atfole umoya longcwele. (Luk. 11:9, 10, 13) Lokunye lokungasisita kakhulu kuze sitfole umoya longcwele kutsi sifundze liVi laNkulunkulu leliphefumulelwe. Ngemuva kwaloko singabese siyacabanga ngaloko lesikufundzile futsi setame kukusebentisa ekuphileni kwetfu. Umoya longcwele waJehova ungatsintsa kuphila kwetfu, usisite sibe nekukholwa lokutamjabulisa.