Nowa Wakha Umkhumbi

NOWA abe nemfati nemadvodzana lamatsatfu. Emagama emadvodzana akhe kwakunguShemi, Hhamu naJafethi. Ngamunye kulamadvodzana akhe abenemfati. Ngako-ke, bekunebantfu labasiphohlongo emndenini waNowa.

Nkulunkulu watsi kuNowa akente intfo lengaketayeleki. Watsi akakhe umkhumbi lomkhulu. Lomkhumbi wawumkhulu kakhulu ufanana nelibhokisi lelikhulu lelidze. Nkulunkulu watsi: ‘wakhe ube titezi letintsatfu, ube nemakamelo ngekhatsi kuwo.’ Lamakamelo abetawuhlala Nowa nemndeni wakhe, tilwane, kanye nekudla lokubenele bonkhe.

Nkulunkulu watjela Nowa kutsi alungise umkhumbi kute kungangeni emanti kuwo. Nkulunkulu watsi: ‘Ngitawuletsa zamcolo lomkhulu, utawubhubhisa konkhe lokuphilako emhlabeni lokungakangeni emkhunjini.’

Nowa nemadvodzana akhe bamlalela Jehova, bakha umkhumbi. Kodvwa labanye bantfu bamane batihlekela nje, futsi bachubeka benta lokubi. Ngalesikhatsi Nowa abatjela ngaloko lobekutawentiwa nguNkulunkulu, kute lowamkholwa.

Kwatsatsa sikhatsi lesidze kwakha umkhumbi, ngoba wawumkhulu kakhulu. Ekugcineni, ngemva kweminyaka leminyenti kwaphela kwakhiwa kwawo. Nkulunkulu watjela Nowa kutsi angenise tilwane emkhunjini. Watsi atsatse timbili kulolo nakulolo luhlobo, lesidvuna nalesisikati. Kodvwa kulolunye luhlobo, Nkulunkulu watsi atingenise tibe sikhombisa. Waphindze watsi angenise tonkhe tinhlobo tetinyoni. Nowa wakwenta konkhe layalwa nguNkulunkulu kutsi akwente.

Ekugcineni Nowa nemndeni wakhe bangena emkhunjini. Nkulunkulu wabese uyawuvala umnyango wawo. Ngekhatsi emkhunjini, Nowa nemndeni wakhe besebalindze lokutakwenteka. Ase uticabange nawe usekhatsi emkhunjini ulindze nabo. Ngabe utawufika yini zamcolo njengoba Nkulunkulu abeshito?