Bantfu Bakha Umbhoshongo Lomkhulu

KWENGCA iminyaka, emadvodzana aNowa aba nebantfwana labanyenti. Bantfwana babo bakhula nabo baba nebabo bantfwana. Ngekushesha umhlaba waba nebantfu labanyenti.

Lomunye walabo bantfu kwakunguNimrodi lobekasitukulwane saNowa. Abeyindvodza lengakalungi ngobe abetingela futsi abulale tilwane kanye nebantfu. Nimrodi watenta inkhosi, kute abuse bantfu. Nkulunkulu abengamtsandzi.

Bonkhe bantfu emhlabeni ngalesosikhatsi bebakhuluma lulwimi lunye. Nimrodi abefuna kubagcina bandzawonye kuze ababuse. Uyati yini kutsi wentani? Watjela bantfu kutsi bakhe lidolobha futsi bakhe nembhoshongo lomkhulu kulo. Babuke nje lapha kulesitfombe babhaka titini.

Jehova Nkulunkulu akazange ajabule ngalesakhiwo. Abefuna bantfu basakateke bahlale kuwo wonkhe umhlaba. Kodvwa bona batsi: ‘Wotani sitakhele lidolobha, nembhoshongo lotawuphakama ufike ezulwini, kuze sitekwatiwa.’ Bebafuna kuhlonishwe bona kunekutsi kuhlonishwe Nkulunkulu.

Ngako-ke Nkulunkulu wakumisa kwakhiwa kwalombhoshongo. Uyati yini kutsi wakwenta kanjani loko? Bangakanaki wavele nje wabenta bakhuluma tilwimi letehlukene, kunekutsi bakhulume lulwimi lolulodvwa. Bakhi bembhoshongo bebangasakwati kuvana nabakhuluma, kungako lelidolobha labitwa ngekutsi yiBhabheli nobe yiBhabhulona lokusho ‘Kusanganisa.’

Bantfu bacala kusakateka bashiya iBhabheli. Emacembu ebantfu labekhuluma lulwimi lunye abutsana ndzawonye aya kuletinye tincenye temhlaba.