Lokwenta Davide Abaleke

NGEMUVA kwekutsi Davide abulele Goliyathi, indvuna yemphi yaka-Israyeli Abneri yamletsa kuSawula. Sawula wajabula kakhulu ngaDavide, waze wamenta indvuna yemabutfo akhe, futsi wamtsatsa wamhlalisa endlini yakhe.

Kwatsi ngalesinye sikhatsi, ema-Israyeli abuya kuyolwa nemaFilisti, labasikati bebahlabela batsi: ‘Sawula ubulele tinkhulungwane, kodvwa Davide yena ubulele emashumi etinkhulungwane.’ Sawula waba nemona, ngoba bebadvumisa Davide kakhulu kunaye. Kodvwa indvodzana yakhe Jonathani yona ayizange ibe nemona. Yayimtsandza kakhulu Davide, naDavide naye abeyitsandza. Ngako benta sivumelwane sekuba bangani.

Davide abelishaya kahle lihabhu, futsi Sawula abewutsandza umculo wakhe. Kodvwa ngalelinye lilanga umona wakhe wamenta kutsi ente intfo lembi kakhulu. Kwatsi Davide asashaya lihabhu, Sawula watsatsa sikhali sakhe wasiphosa, watsi: ‘Ngifuna kumhlanganisa nelubondza Davide!’ Kodvwa Davide wavika, sikhali samgeja. Ngemuva kwesikhatsi lesitsite, Sawula waphindze wasiphosa, futsi nalapho samgeja. Manje Davide wabona kutsi kufanele acaphele.

Usasikhumbula yini setsembiso lesentiwa nguSawula? Watsi umuntfu lotawubulala Goliyathi utamnika indvodzakati yakhe kutsi ibe ngumfati wakhe. Ekugcineni Sawula watsi kuDavide abengashada naMikhali indvodzakati yakhe Sawula. Kodvwa watsi ngembi kwekutsi ayishade kwakufanele acale ayewubulala emaFilisti langu-100. Cabanga nje ngaloku! Abetsemba kutsi emaFilisti atambulala Davide. Kodvwa awazange, ngako Sawula wamniketa indvodzakati yakhe kutsi ibe ngumfati wakhe.

Ngalelinye lilanga Sawula watjela Jonathani kanye netinceku takhe kutsi abefuna kubulala Davide. Kodvwa Jonathani watsi kubabe wakhe: ‘Ungenti lutfo lolubi kuDavide, ngoba kute lakone ngako. Kodvwa kunaloko konkhe lakwentile kube lusito lolukhulu kuwe. Wabeka kuphila kwakhe engotini ngekubulala Goliyathi, futsi watsi wena nawukubona loku, wajabula.’

Sawula wayilalela indvodzana yakhe, futsi wayetsembisa kutsi angeke amlimate Davide. Walandvwa-ke Davide, waphindze wasebenta endlini yaSawula. Ngalelinye lilanga, Davide adlala umculo, Sawula waphindze waphosa sikhali sakhe kuye kodvwa wasivika, sagwaza lubondza. Bese kukwesitsatfu akwenta loku. Davide wabona kutsi kwakufanele abaleke.

Ngalobo busuku Davide waya endlini yakhe. Kodvwa Sawula watfumela emadvodza kutsi ayombulala. Mikhali bekati kutsi babe wakhe uhlela kwentani. Ngako watjela umyeni wakhe watsi: ‘Nawungabaleki uyewubhaca namuhla ebusuku, kusasa kutawusa ufile.’ Ngabo lobo busuku Mikhali wasita Davide kutsi abaleke, wamkhipha ngelifasitelo. Kwaphela cishe iminyaka lesikhombisa Davide aloku abhaca etindzaweni letinyenti, kuze Sawula angamtfoli.