Jesu Uhlanta Lithempeli

JESU ubukeka atfukutsele lapha, uyambona? Uyati yini kutsi kungani abetfukutsele? Kungoba lamadvodza lalapha ethempelini laNkulunkulu eJerusalema abenebugovu. Abezama kutfola imali lenyenti kubantfu lebabete kutewukhulekela Nkulunkulu lapha ethempelini.

Uyatibona yini letinkhomo, timvu kanye nematuba? Lamadvodza abetsengisa letilwane lapha ethempelini. Uyati kutsi kungani? Kungoba ema-Israyeli abedzinga tinkhomo, timvu kanye netinyoni kute anikele kuNkulunkulu.

Umtsetfo wawutsi uma umIsrayeli onile, bekufanele ente umnikelo kuNkulunkulu. Kwakunaletinye futsi tikhatsi lapho ema-Israyeli bekufanele ente khona iminikelo. Kepha-ke umIsrayeli abengatitfola kuphi letilwane tekwenta umnikelo?

Lamanye ema-Israyeli abetifuyile letilwane, ngako-ke abenganikela ngato. Kepha ema-Israyeli lamanyenti abengakafuyi. Labanye kuwo bebahlala khashane naseJerusalema futsi bebangakhoni kuta naletilwane ethempelini. Ngako-ke bebafika batsenge letilwane labatidzingako lapha ethempelini. Lamadvodza lalapha abebatsengisela ngemali lenyenti, futsi abadoja labantfu. Ngaphandle kwaloko, vele bekungakafaneli batsengisele ethempelini laNkulunkulu.

Loku ngiko lokwatfukutselisa Jesu. Ngako-ke wagenula ematafula futsi kwacitseka timali tebantjintji. Weluka siswebhu ngetintsambo wase ukhipha letilwane lapha ethempelini. Watsi kulabo lababetsengisa ematuba: ‘Wakhipheni lapha! Ningayenti lendlu yaBabe indzawo yekwakha imali.’

Labanye bebalandzeli baJesu bebanaye lapha ethempelini eJerusalema. Bamangala ngaloko Jesu lakwenta. Bakhumbula loko lokwashiwo liBhayibheli ngeNdvodzana yaNkulunkulu lapho litsi: ‘Lutsandvo ngendlu yaNkulunkulu luvutsa njengemlilo ngekhatsi kuye.’

Jesu wenta timangaliso letinyenti ngalesikhatsi akulomkhosi weliPhasika eJerusalema. Ngemuva kwaloko, wesuka eJudiya wabuyela eGalile, futsi wadzabula eSamariya. Ase sibone kutsi kwentekani lapho.