Jesu Uyaphila

UYATI kutsi lona lomsikati nalamadvodza lamabili babobani? Lona lomsikati nguMariya waseMagdala, umngani waJesu. Lamadvodza lagcoke timphahla letimhlophe wona tingilosi. Lelikamelo lelincane Mariya lalibukako ngulapho sidvumbu saJesu besibekwe khona. Libitwa ngekutsi lithuna. Kodvwa lesidvumbu asisekho. Ngubani lositsetse? Ase sibone.

Ngemuva kwekufa kwaJesu, baphristi batsi kuPhilatu: ‘Ngalesikhatsi Jesu asaphila watsi utawuvuswa emvakwemalanga lamatsatfu. Ngako khipha umyalo kutsi lelithuna ligadvwe, kuze bafundzi bakhe bangasebi sidvumbu sakhe bese batjela bantfu kutsi uvusiwe kulabafile.’ Ngako Philatu watsi abatfumele emasotja ayoligadza.

Kodvwa ekuseni kakhulu ngelilanga lesitsatfu Jesu afile, ingilosi yaJehova yefika. Yaligicita lelitje lelalivale lelithuna. Emasotja afikelwa kwesaba, achachatela, futsi angakhoni ngisho nekunyakata. Ekugcineni, atsi nakabuka ekhatsi ethuneni, abona kutsi sidvumbu sasesingekho. Labanye kulamasotja baya edolobheni kuyobikela baphristi. Uyati kutsi yini labaphristi lababi labayenta? Bawaniketa imali kuze acambe emanga. Labaphristi batsi: ‘Nibotsi bafundzi bakhe bafike ebusuku siselele, baseba sidvumbu sakhe.’

Ngalelolanga ekuseni, lamanye emakhosikati labangani baJesu, eta ethuneni. Etfuka kakhulu nawefika atfola lithuna lingenalutfo. Kusesenjalo, kwavela tingilosi letimbili letatigcoke timphahla letimhlophe njengesitfwatfwa. Tatsi kulamakhosikati: ‘Nimfunelani Jesu? Akekho lapha, sewuvusiwe. Hambani masinyane niyewutjela bafundzi bakhe.’ Lamakhosikati avele agijima ngematubane. Atsi asesendleleni, ahlangana nendvodza leyawavimba. Uyati kutsi yayingubani? Lendvodza kwakunguJesu! Yatsi kuwo: ‘Hambani niyobikela bafundzi bami.’

Atsi lamakhosikati nawatjela bafundzi kutsi Jesu uyaphila, nekutsi wona ambonile, abazange bakukholwe loko. BoPhetro naJohane bagijima baya ethuneni kuze nabo batibonele ngewabo, kodvwa ethuneni kwakungenalutfo. Base bayancandzeka, kodvwa Mariya waseMagdala yena wasala. Kungaleso sikhatsi-ke lapho atsi uhlola ngekhatsi ethuneni wabona tingilosi letimbili.

Uyati kutsi kwentekani ngesidvumbu saJesu? Nkulunkulu wasinyamalalisa. Akazange amvusele emtimbeni wenyama lafa anawo. Kodvwa wamvusa anemtimba longumoya, lofanana newetingilosi ezulwini. Kute akhombise bafundzi bakhe kutsi abesavusiwe, Jesu abetembatsisa umtimba labangawubona. Sitawufundza ngaloku esihlokweni lesilandzelako.