Sifundvo 5
Iyini Injongo YaNkulunkulu Ngemhlaba?
Jehova wawudalelani umhlaba? (1, 2)
Kwentiwa yini kutsi umhlaba ungasabi lipharadisi nyalo? (3)
Kutawentekani kubantfu lababi? (4)
Esikhatsini lesitako, Jesu utawubentelani labagulako? labagugile? labafile? (5, 6)
Kudzingeka kutsi wenteni kute utfole tibusiso tesikhatsi lesitako? (7)
1. Jehova wadala lomhlaba entela kutsi bantfu bajabule ngekuhlala kuwo ingunaphakadze. Bekafuna kutsi ngaso sonkhe sikhatsi kuhlale bantfu labalungile kuwo, labajabulako. (Tihlabelelo 115:16; Isaya 45:18) Umhlaba ungeke ubhujiswe nanini, utawuba khona kuze kube phakadze.—Tihlabelelo 104:5; Umshumayeli 1:4.
2. Nkulunkulu wacala ngekukhetsa incenye lencane yemhlaba, wayenta lipharadisi, kwaba ngukhona adala umuntfu. Lelipharadisi walibita ngekutsi yinsimu yase-Edeni. Wababeka lapho bantfu bekucala, Adamu na-Eva. Nkulunkulu bekafuna kutsi babe nebantfwana futsi bagcwalise umhlaba wonkhe. Kancane kancane, wonkhe umhlaba bebatakuwenta lipharadisi.—Genesisi 1:28; 2:8, 15.
3. Adamu na-Eva benta sono ngekwephula umtsetfo waNkulunkulu ngemabomu. Ngaleso sizatfu, Nkulunkulu wabacosha ensimini yase-Edeni. Lipharadisi lalahleka. (Genesisi 3:1-6, 23) Jehova akakayikhohlwa injongo yakhe ngalomhlaba. Wetsembisa kuwenta ube lipharadisi, lapho bantfu batawuhlala khona ingunaphakadze. Utawukwenta kanjani loko?—Tihlabelelo 37:29.
4. Bantfu lababi kufanele bacale basuswe, kube ngukhona umhlaba ungaba lipharadisi. (Tihlabelelo 37:38) Loku kutawenteka emphini yaNkulunkulu yekucedza bubi, i-Amagedoni. Sathane utawubese uboshwa iminyaka lengu-1 000. Loku kusho kutsi kute bantfu lababi labatawusala bamoshe umhlaba. Kutawusindza bantfu baNkulunkulu kuphela.—Sembulo 16:14, 16; 20:1-3.
5. Jesu Khristu utawubese ubusa etukwalomhlaba iminyaka lengu-1 000. (Sembulo 20:6) Utawususa sono kancane kancane etingcondvweni nasemitimbeni yetfu. Sitawuba bantfu labaphelele, njengoba bo-Adamu na-Eva bebanjalo basengakoni. Kutawubese kubabete kugula, kuguga, nekufa. Bantfu labagulako batawuphiliswa, nalabagugile baphindze babe basha.—Jobe 33:25; Isaya 33:24; Sembulo 21:3, 4
6. Emkhatsini nekuBusa KwaJesu Kweminyaka Leyinkhulungwane, bantfu labatsembekile batawusebentela kugucula umhlaba wonkhe ube lipharadisi. (Isaya 65:21-25) Netigidzi tebantfu labafile titawuvuswa, tiphile emhlabeni. (Imisebenti 24:15) Nangabe benta loko Nkulunkulu lakufunako kubo, batawuchubeka baphila emhlabeni ingunaphakadze.—Johane 5:28, 29; Sembulo 20:11-15.
7. Injongo yaNkulunkulu yasekucaleni ngemhlaba itawuphumelela kanjalo. Uyafuna yini kutsi nawe utitfole letibusiso tesikhatsi lesitako? Nangabe kunjalo, kufuneka uchubeke ufundza ngaJehova futsi ulalele imitsetfo yakhe. Kuba khona emihlanganweni leba seHholweni leMbuso laboFakazi baJehova lelisendzaweni yangakini kutakusita kutsi wente kanjalo.—Isaya 11:9; Hebheru 10:24, 25.
[Sitfombe ekhasini 10]
Lipharadisi liyalahleka
[Titfombe ekhasini 11]
Ngemva kwe-Amagedoni, umhlaba utawentiwa lipharadisi