Sifundvo 6
Uyini UMbuso WaNkulunkulu?
Umiswe kuphi nendzawo uMbuso waNkulunkulu? (1)
Ingubani iNkhosi yawo? (2)
Bakhona yini lababusa naleNkhosi? Nangabe kunjalo, bangakhi? (3)
Yini lekhombisa kutsi siphila emalangeni ekugcina? (4)
Yini uMbuso waNkulunkulu lotawuyentela bantfu esikhatsini lesitako? (5-7)
1. Ngalesikhatsi asemhlabeni, Jesu wafundzisa balandzeli bakhe kutsi bathandazele uMbuso waNkulunkulu. Umbuso nguhulumende lophetfwe yinkhosi. UMbuso waNkulunkulu unguhulumende lowehlukile. Umiswe ezulwini futsi utawubusa etukwalomhlaba. Utawungcwelisa ligama laNkulunkulu, ulente lihlonishwe. Utawubangela kutsi intsandvo yaNkulunkulu yentiwe emhlabeni njengoba yentiwa ezulwini.—Matewu 6:9, 10.
2. Nkulunkulu bekatsembise kutsi Jesu bekatawuba yiNkhosi yeMbuso wakhe. (Lukha 1:30-33) Ngalesikhatsi Jesu alapha emhlabeni, wakhombisa kutsi bekatawuba nguMbusi lonemusa, lolungile, nalophelele. Nakabuyela ezulwini, akazange abekwe kuba yiNkhosi yeMbuso ngaso leso sikhatsi. (Hebheru 10:12, 13) Nga-1914, Jehova waniketa Jesu ligunya bekamtsembise lona. Kusukela ngaleso sikhatsi, Jesu sewuyiNkhosi lebekwe nguNkulunkulu ezulwini.—Danyela 7:13, 14.
3. Jehova uphindze wakhetsa lamanye emadvodza nebesifazane labatsembekile kutsi baye ezulwini. Batawubusa naJesu njengemakhosi, behluleli, nebapristi etukwebantfu. (Lukha 22:28-30; Sembulo 5:9, 10) Jesu wabita lababusi labakanye naye ngekutsi “ngumhlambi lomncane”. Bangu-144 000.—Lukha 12:32; Sembulo 14:1-3.
4. Nakacala-nje kuba yinkhosi, Jesu wakhipha Sathane netingilosi takhe letimbi ezulwini, wabalahlela emhlabeni. Ngiko setaba timbi kangaka tintfo emhlabeni kusukela nga-1914. (Sembulo 12:9, 12) Timphi, kweswelakala kwekudla, tifo letilubhubhane, kwandza kwekwephulwa kwemtsetfo—konkhe loku kuyincenye “yenkhomba” yekutsi Jesu uyabusa, nekutsi luhlelo lwalomhlaba lusemalangeni alo ekugcina.—Matewu 24:3, 7, 8, 12; Lukha 21:10, 11; 2 Thimothi 3:1-5.
5. Madvutane, Jesu utawehlulela bantfu, abehlukanise kuhle kwemelusi ehlukanisa timvu netimbuti. “Timvu” ngulabo labatawube batikhonti takhe letitsembekile. Batawutfola kuphila lokuphakadze emhlabeni. “Timbuti” ngulabo labatawube bangakawemukeli uMbuso waNkulunkulu. (Matewu 25:31-34, 46) Esikhatsini lesitako lesisedvute, Jesu utawubhubhisa bonkhe labanjengetimbuti. (2 Thesalonika 1:6-9) Nangabe ufuna kuba ngulomunye wetimvu taJesu, kufanele ulalele umlayeto weMbuso futsi wente lokuvumelana naloko lokufundzako.—Matewu 24:14.
6. Kwanyalo, umhlaba wehlukaniswe waba ngemave lamanyenti. Ngalinye lawo linahulumende walo. Letive tivamise kulwa todvwana. Kepha uMbuso waNkulunkulu utawutsatsa sikhundla sabo bonkhe bohulumende bebantfu. Kutawubusa wona wodvwana etukwemhlaba wonkhe. (Danyela 2:44) Imphi, bugebengu, neludlame kutawube sekungekho. Bantfu bonkhe batawuhlalisana ngekuthula nebunye.—Mikha 4:3, 4.
7. Emkhatsini kwekuBusa kwaJesu Kweminyaka Leyinkhulungwane, bantfu labatsembekile batawuba ngulabaphelele, futsi umhlaba wonkhe utawuba lipharadisi. Ekupheleni kwaleminyaka leyinkhulungwane, Jesu utawube sekakwente konkhe Nkulunkulu lamcele kutsi akwente. Utawubese ubuyisela uMbuso kuyise. (1 Khorinte 15:24) Kungaba njani ucocele bangani bakho netihlobo ngaloko lokutawentiwa nguMbuso waNkulunkulu?
[Sitfombe ekhasini 13]
Nasekubusa Jesu, kutawubabete kutondzana nelubandlululo