Kuchumana Ngekubhalelana Tincwadzi
TINCWADZI tente kuphila nekutiphatsa kwetigidzi tebantfu kwaba ncono. Ekucaleni linyenti lemiBhalo YemaKhristu YesiGriki beyitincwadzi. Natsi lamuhla singatibhala tincwadzi kute sakhe labasandza kukholwa, sichumane nebangani, sikhutsate bazalwane nabodzadze labangenele imisebenti lekhetsekile enhlanganweni, sicinise labo labahlangabetana nebumatima, futsi sinikete kwatiswa lokudzingekako kute kunakekelwe imisebenti yelibandla.—1 Thes. 1:1-7; 5:27; 2 Phet. 3:1, 2.
Kubhala tincwadzi nako kuyindlela lephumelelako yekufakaza. Kuletinye tindzawo, bantfu labanyenti bahlala etindlini letigadvwa kakhulu nome emahhotela lokungangeneki kamelula kuwo. Etikhatsini letinyenti labanye basuke bangekho emakhaya, ngako-ke asibatfoli nasifakaza emtini ngemuti. Labanye bona bahlala etindzaweni lokungafikwa melula kuto.
Ngaletinye tikhatsi kugula, simo selitulu lesibi nome umtsetfo lotsi bantfu bangaphumeli ngaphandle kungakwenta uhlale usendlini. Ungakhona yini kubhala incwadzi kute uchubeke ufakaza esihlotjeni nobe kumuntfu loke wakhuluma naye ungakahleli? Sikhona yini sifundvo sakho seliBhayibheli lesitfutsile? Loyo muntfu kungamkhutsata kutfola incwadzi levela kuwe kute ahlale anenshisekelo ngetintfo letiphatselene naNkulunkulu. Ungaphindze ucoce ngekwatiswa lokusemiBhalweni nalabasandza kushada, labasandza kutfola umntfwana, nobe labasandza kufelwa ngumuntfu labamtsandzako.
Kufakaza Ngekubhala Incwadzi
Nawubhala incwadzi kute ufakaze kumuntfu longakaze umbone, cala ngekutetfula. Ungachaza kutsi wenta umsebenti wekutitsandzela lowentiwa emhlabeni wonkhe. Ungasho kutsi ungulomunye waBoFakazi BaJehova, nangabe loko kubonakala kukahle. Mchazele kutsi kungani umbhalele wangafiki matfupha. Bhala shengatsi ukhuluma naye umlomo nemlomo. Nobe kunjalo, ngekuvumelana nesicondziso lesitsi, “caphelani njengetinyoka kepha ningasoleki nibe njengematuba,” kufanele ucabangisise kahle ngekutsi kungakanani kwatiswa lotakusho ngawe.—Mat. 10:16.
Kulencwadzi shano lobewungakusho kulomuntfu kube bewumvakashele. Ungasebentisa singeniso lesisencwadzini letsi “Ukubonisana” nobe lesinye setfulo lesiku-Msebenti Wetfu WeMbuso. Ungabuta umbuto futsi ukhutsate lomuntfu kutsi acabange ngawo. Labanye bamemeteli bavele bachaze kutsi sineluhlelo lwamahhala lwekuphendvula imibuto yeliBhayibheli bese basho tihloko letikulenye yetincwadzi lesitisebentisela kufundza nebantfu. Sibonelo sencwadzi lesingayibhala nasifakaza sivela ekhasini 73. Ingakunika imicondvo yalongakubhala, kepha kuhle kungabhali intfo lefanako. Ngaphandle kwaloko, ngekuhamba kwesikhatsi bantfu bangagcina batfola incwadzi lefananako njalo.
Labanye bantfu abatsandzi kufundza incwadzi lendze levela kumuntfu labangamati. Ngako-ke, kungaba kuhlakanipha kwenta incwadzi yakho ibe yimfishane. Sheshe uvalelise encwadzini yakho kuze loyo loyifundzako angatodzinwa kuyifundza. Kungaba kuhle kutsi ufake simemo, ummemele emihlanganweni eHholweni LeMbuso. Ungafaka nelipheshana, incwajana, Sicongosekulindza nobe i-“Phaphama!” futsi uchaze kutsi labomagazini angabatfola sonkhe sikhatsi nakabafuna. Ungacela nekumvakashela ekhaya kute ucoce kabanti naye ngalendzaba losandza kumcocela yona.
Indlela Lebhalwe Ngayo
Asewubuke lencwadzi lesibonelo. Naka naku lokulandzelako: (1) Lencwadzi ihlobile futsi ibukeka kahle. (2) Nome ingalahleka imvilophu, lotayitfola utalibona ligama nelikheli laloyitfumele. (3) Sizatfu sekubhalwa kwalencwadzi sichazwe kamelula esigabeni sekucala futsi sicacile. (4) Liphuzu ngalinye leliyinhloko linesigaba salo lesehlukile. (5) Nasicabanga ngemgomo wayo, lencwadzi ayikabhalwa shengatsi ibhalelwa umngani, futsi ayikabhalwa ngendlela yabosomabhizinisi.
Incwadzi lenjengaleyo mabhalane welibandla langayibhalela lihhovisi leligatja, iba neligama lelibandla, nelamabhalane, likheli lakhe, kanye nelilanga layibhale ngayo. Kufanele kuvele libito nelikheli lemuntfu nobe lenhlangano lebhalelwako. Ngemuva kwaloko kulandzela sibingelelo lesifanele. Kuletinye tilwimi nasewuvalelisa usebentisa emavi latsi “Ngimi lotitfobako” nobe “Ngimi lowetsembekile” ngenhla kwesignesha. Isignesha kufanele ibhalwe ngesandla.
Kunobe nguyiphi incwadzi, nakisisa kutsi emagama, imisho netimphawu telulwimi kuhleleke kahle, futsi lencwadzi ibukeka kahle. Kwenta njalo kutawenta kutsi incwadzi yakho ihlonipheke kanye nemlayeto leyiwuphetse.
Ngaso sonkhe sikhatsi emvilophini akube nelikheli lalapho lencwadzi ivela khona—kuncono kutsi kube likheli lakho. Nangabe ubona kutsi akusiko kuhlakanipha kubhala lakho likheli nawufakaza kubantfu longabati, cela imvume kulabadzala belibandla yekusebentisa likheli leliHholwa LeMbuso. Likheli lenhlangano akukafaneli lisetjentiselwe lenjongo, ngobe loko kungenta shengatsi lencwadzi yakho ivela emahhovisini enhlangano futsi kungabangela kutsi bantfu badideke. Nangabe lingekho likheli lalapho lencwadzi ibuya khona kantsi kunamagazini lofakiwe, naloko kungenta umuntfu acabange kutsi lencwadzi ivela enhlanganweni.
Ciniseka kutsi unamatsisela titembu temali lefanele, ikakhulu nangabe kukhona lokufakile. Nangabe lemali yaletitembu iyincane, imali leshodako ingabhadaliswa loyo lokuya kuye lencwadzi, futsi loko kungenta umlayeto wakho ungasamukeleki. Khumbula kutsi emaveni lamanyenti nangabe kufakwe incwajana nome magazini, kungadzingeka imali leyengetiwe kunalapho utfumela incwadzi loyibhalile nje yodvwana.
Indlela Levakala Ngayo
Nasewucedzile kuyibhala incwadzi yakho, yifundze kute uhlolisise lekucuketse. Ivakala njani? Kusetjentiswe emavi lanebungani kanye nalakhetfwe kahle yini? Lutsandvo nemusa nguletinye tetintfo lesifuna kutiveta nasisebentelana nalabanye. (Gal. 5:22, 23) Nangabe uyiva kutsi ayinambitseki kahle nobe kukhona lapho uyisola khona, yilungise.
Incwadzi ingefika etindzaweni wena lowungeke ufike kuto. Loku kusisita sibone kutsi incwadzi ilithuluzi lelibaluleke kakhulu lekushumayela. Njengobe incwadzi yakho iveta kutsi ungumuntfu lonjani kanye nekutsi uphila njani, cabangisisa ngaloko lekushoko, ngendlela lebukeka ngayo, nekutsi ivakala njani. Ingasita umuntfu kutsi angene endleleni leya ekuphileni, imcinise nobe imkhutsate kutsi achubeke.