Imibhalo Ihlanganiswe Kahle Nendzaba

NAWUFUNDZISA labanye, kudzingeka lokungetulu kwekumane nje ufundze emavesi eliBhayibheli. Umphostoli Pawula wabhalela Thimothi, sisebenti lebesikanye naye, watsi: “Yenta konkhe lokusemandleni akho kutsi utivete wemukeleka kuNkulunkulu, usisebenti lesite emahloni ngalutfo, nalesiphatsa livi leliciniso ngendlela lefanele.”​—2 Thim. 2:15.

Kute sente loku, kudzingeka kutsi indlela lesichaza ngayo imibhalo ihambisane naloko lokufundziswa liBhayibheli. Loko kudzinga kutsi sinake ingcikitsi yendzaba, kunekumane nje sikhetse emagama latsite lesiwatsandzako kanye nekufaka imibono yetfu. Asebentisa umphrofethi Jeremiya, Jehova wecwayisa ngebaphrofethi labebenta shengatsi bakhuluma lokuvela kuJehova kantsi ecinisweni bakhuluma “imibono yetingcondvo tabo.” (Jer. 23:16) Umphostoli Pawula wecwayisa emaKhristu ngekona liVi laNkulunkulu ngetimfundziso tebantfu, nakatsi: “Kodvwa sitilahlile tintfo tebumnyama naletilihlazo, asitiphatsi ngebucili, asilisontsi nelivi laNkulunkulu.” Ngaleso sikhatsi batsengisi beliwayini labangaketsembeki bebandzisa liwayini labo ngekutsi bengete emanti kute batfole imali lenyenti. Asilisontsi liVi laNkulunkulu ngekutsi sifake timfundziso tebantfu. Pawula watsi: “Asisibo batsengisi belivi laNkulunkulu njengobe bantfu labanyenti bangibo, kodvwa sikhuluma ngebucotfo sikanye naKhristu, njengalabatfunywe nguNkulunkulu nalababonwa nguye.”​—2 Khor. 2:17; 4:2.

Ngaletinye tikhatsi ungacaphuna umbhalo kute uvete simiso lesitsite. LiBhayibheli linetimiso letinyenti letisinika sicondziso mayelana nekutsi yini lesingayenta nasihlangabetana netimo letehlukahlukene. (2 Thim. 3:16, 17) Kodvwa kufanele uciniseke kutsi indlela lohlanganisa ngayo umbhalo nendzaba ingiyo, ungayisontsi imibhalo, uyente isho loko wena lofuna ikusho. (Hla. 91:11, 12; Mat. 4:5, 6) Indlela umbhalo lohlanganiswa ngayo nendzaba kufanele ihambisane nenjongo yaJehova, futsi ivumelane nalo lonkhe liVi laNkulunkulu.

‘Kuphatsa livi leliciniso ngendlela lefanele’ kufaka ekhatsi kutfola umcondvo waloko lokushiwo liBhayibheli. Akukafaneli silisebentise “njengendvuku” yekushaya bantfu. Bafundzisi benkholo lebebaphikisa Jesu Khristu bebayicaphuna imiBhalo, kodvwa bebangatinaki tintfo letibaluleke kakhulu lebetifunwa nguNkulunkulu​—lebetifaka ekhatsi kulunga, sihawu kanye nekwetsembeka. (Mat. 22:23, 24; 23:23, 24) Jesu waveta buntfu beYise nakafundzisa ngeliVi laNkulunkulu. Kushisekela kwaJesu liciniso bekuhambisana nelutsandvo lwakhe lolujulile ngebantfu labebafundzisa. Natsi kufanele silwele kulandzela sibonelo sakhe.​—Mat. 11:28.

Singaciniseka njani kutsi umbhalo siwuhlanganisa kahle nendzaba? Kufundza liBhayibheli malanga onkhe kutawusisita. Kudzingeka nekutsi sibonise kubonga ‘ngesisebenti lesetsembekile nalesihlakaniphile,’ Jehova lasilungiselele sona, lokusigungu semaKhristu lagcotjiwe lawasebentisako kute ondle tinceku takhe ngelwati ngaNkulunkulu. (Mat. 24:45) Sifundvo umuntfu latichubela sona, kuba khona njalo emihlanganweni kanye nekuba nencenye kuyo kutawusisita kutsi sizuze kuloko Nkulunkulu lasifundzisa kona ngesisebenti lesetsembekile nalesihlakaniphile.

Nangabe incwadzi letsi “Ukubonisana NgemiBhalo” itfolakala ngelulwimi lwakho futsi wetama kuyisebentisa kahle, itakusita kutsi imibhalo leminyenti lesetjentiswa njalo ensimini ukhone kuyihlanganisa kahle naloko losuke ukhuluma ngako. Nangabe ufuna kusebentisa umbhalo longaketayeleki, kutfobeka kutawukwenta kutsi ucwaninge kuze nawukhuluma ukhone kuliphatsa ngendlela lefanele livi leliciniso.​—Taga 11:2.

Kwente Kukhanye Kutsi Imibhalo Ihlangana Njani Nendzaba. Nangabe ufundzisa labanye, ciniseka kutsi kuyabakhanyela kutsi indzaba lokhuluma ngayo ihlangana njani nemibhalo loyisebentisako. Nawubuta umbuto ngembikwekutsi ufundze umbhalo, labo labakulalele kufanele babone kutsi lombhalo uwuphendvula njani lombuto. Nangabe usebentisa umbhalo kuze usekele liphuzu lelitsite, ciniseka kutsi loyo lokhuluma naye uyabona kutsi lombhalo ulisekela njani lelo phuzu.

Esikhatsini lesinyenti, akukeneli kumane nje ufundze umbhalo, ngisho kungatsiwa uwufundza ngekugcizelela. Khumbula kutsi bantfu abakaletayeli liBhayibheli futsi kungenteka bangalitfoli liphuzu nangabe uwufundza kanye lowo mbhalo. Gcizelela incenye yaloyo mbhalo lehlangana naloko lenikhuluma ngako.

Loku kudzinga kutsi ugcizelele emagama layinhloko lahlangana nendzaba lenikhuluma ngayo. Indlela lemelula yekukwenta kutsi uwaphindze lawo magama lacuketse umcondvo wendzaba. Nawukhuluma nemuntfu, ungambuta imibuto letamsita akhone kubona emagama layinhloko. Kuze tifinyelele umgomo wato natikhuluma nebantfu labanyenti, letinye tikhulumi tisebentisa emagama lanemcondvo lofanako newalawo letisuke tiwafundzile nobe tiphindze umcondvo wawo. Kodvwa nawusebentisa lendlela, kufanele unake kutsi labo labakulalele abadideki kutsi liphuzu lokhuluma ngalo lihlangana njani nembhalo.

Nase uwatfolile emagama layinhloko, usuke sewakhe sisekelo lesihle, futsi sewungenta lokulandzelako. Nawetfula umbhalo, ukwente kwacaca yini kutsi kungani ufundza lombhalo? Nangabe kunjalo, veta kutsi emagama lowagcizelele ahlobana njani naloko lowente labo labakulalele kutsi bakulindzele. Yente ikhanye indlela loku lokuhlangana ngayo. Ngisho nome nawetfula umbhalo ungakasiveti sacaca sizatfu sekuwufundza, kodvwa nase uwufundzile kufanele usente sikhanye kahle.

BaFarisi babuta Jesu umbuto lebebacanga kutsi ulukhuni, batsi: “Kuvumelekile yini kutsi indvodza idivose umkayo nganobe ngusiphi sizatfu?” Jesu wasekela imphendvulo yakhe kuGenesisi 2:24. Wakhulumela incenye yinye yalelivesi, wase uyayichaza kutsi ihlangana njani nalombuto. Ngemuva kwekusho kutsi laba lababili ‘banyamanye,’ Jesu waphetsa ngekutsi atsi: “Loko Nkulunkulu lakuhlanganisile akungehlukaniswa ngumuntfu.”​—Mat. 19:3-6.

Kufanele uchaze kangakanani kuze kucace kutsi umbhalo uhlangana njani nendzaba lokhuluma ngayo? Kuze ukhone kuncuma loku, kufanele wati kutsi bobani bantfu labakulalele nekutsi libaluleke kangakanani liphuzu lokhuluma ngalo. Kufanele uchaze ngendlela lemelula futsi ucondze ephuzwini.

Bonisana Nebantfu NgemiBhalo. Nayikhuluma ngemsebenti waPawula wekushumayela eThesalonika, incwadzi yeMisebenti 17:2, 3 isitjela kutsi “wabonisana nabo ngemiBhalo.” Tonkhe tinceku taJehova kufanele tetame kuba nalelikhono. Nasi sibonelo: Pawula wachaza kuphila kwaJesu kanye nemsebenti wakhe wekushumayela, wakhombisa kutsi loku bekukhulunyiwe ngako emiBhalweni yesiHebheru futsi wenta siphetfo lesinemandla, watsi: “LoJesu lengimmemetela kini, unguKhristu.”

Nakabhalela emaHebheru, Pawula wacaphuna kanyenti emiBhalweni yesiHebheru. Kuze agcizelele liphuzu nome alicacise, abevame kugcamisa ligama linye nome umushwana bese uyabonisa kutsi ubaluleke ngani. (Hebheru 12:26, 27) Endzabeni letfolakala kumaHebheru sehluko 3, Pawula wacaphuna Tihlabelelo 95:7-11. Wabese uchaza nati tincenye letintsatfu talombhalo: (1) emavi lamayelana nenhlitiyo (Heb. 3:8-12), (2) lokushiwo ligama lelitsi “Lamuhla” (Heb. 3:7, 13-15; 4:6-11), kanye (3) nalokushiwo ngemavi latsi: “Ngeke bangene ekuphumuleni kwami” (Heb. 3:11, 18, 19; 4:1-11). Nawuveta kutsi umbhalo ngamunye lowusebentisako uhlangana njani nendzaba lokhuluma ngayo, lwela kutsi ulingise lesibonelo saPawula.

Asewunake umphumela lomuhle wendlela Jesu labonisana ngayo nemuntfu ngemiBhalo, endzabeni letfolakala kuLukha 10:25-37. Indvodza letsite lebeyati uMtsetfo yambuta yatsi: “Mfundzisi, yini lokufanele ngiyente kute ngitfole kuphila lokuphakadze?” Jesu wacala ngekuyicela kutsi ivete kutsi yona icabangani, wabese ugcizelela kubaluleka kwekwenta loko lokushiwo liVi laNkulunkulu. Ngesikhatsi abona kutsi lendvodza ayilicondzi liphuzu, Jesu wasebentisa sikhashana achaza ligama linye lelikulombhalo, lelitsi “makhelwane.” Kunekutsi atjele lendvodza kutsi lisho kutsini leligama, wenta umfanekiso kuze itotitfolela yona liphuzu.

Kuyacaca-ke kutsi nakaphendvula imibuto, Jesu abengacaphuni nje imibhalo letawuniketa imphendvulo lecondzile. Abechaza kutsi isho kutsini futsi avete kutsi ihlangana njani nembuto lobutiwe.

Ngesikhatsi baSadusi baphikisa kutsi labafile batawuvuswa, Jesu wakhulumela incenye leyodvwa nje ya-Eksodusi 3:6. Kodvwa akazange agcine ngekuwucaphuna lowo mbhalo. Wawusebentisa kuze akhombise ngalokucacile kutsi kuvuswa kwalabafile kuyincenye yenjongo yaNkulunkulu.​—Mak. 12:24-27.

Kuba nelikhono lekubonisana kahle nebantfu ngemiBhalo futsi ukwente ngemphumelelo loko, kutawuba nesandla ekutseni ube ngumfundzisi lonelikhono.