Kuveta Kutsi Lokhuluma Ngako Kungasetjentiswa Njani

NGISHO nobe ukhuluma nemuntfu munye nobe nebantfu labanyenti, akusiko kuhlakanipha kucabanga kutsi batayijabulela indzaba lokhuluma ngayo ngobe wena nje uyijabulela. Umlayeto lokhuluma ngawo ubalulekile, kodvwa nawehluleka kuveta kutsi ungasetjentiswa njani, labo lokhuluma nabo ngeke bachubeke bakulalele.

Loku kubalulekile ngisho nobe ukhuluma nebantfu eHholweni LeMbuso. Bangakulalela nangabe usebentisa umfanekiso nobe lokuhlangenwe nako labangazange sebakuve. Kodvwa ngeke bakulalele nangabe ukhuluma ngetintfo lesebavele batati, ikakhulukati nangabe wehluleka kutichaza kahle. Kufanele ubasite babone kutsi kungani lokushoko kubalulekile nekutsi kungabazuzisa njani.

LiBhayibheli lisikhutsata kutsi sicabange ngendlela lekhombisa kuhlakanipha. (Taga 3:21) Jehova wasebentisa Johane uMbhabhatisi kutsi aholele bantfu ‘ekuhlakanipheni kwalabalungile.’ (Luk. 1:17) Loku kuhlakanipha lokusekelwe ekwesabeni Jehova ngendlela lefanele. (Hla. 111:10) Labo labanalokuhlakanipha bayasitwa kutsi babhekane ngalokuphumelelako nekuphila futsi batfole kuphila lokungukonakona, lokukuphila lokuphakadze lokutako.—1 Thim. 4:8; 6:19.

Yenta Inkhulumo Ibe Lusito. Kuze inkhulumo yakho ibe lusito, kufanele ungacabangi nje kuphela ngaloko lotawukhuluma ngako, kodvwa kufanele ucabange nangalabo labatawube bakulalele. Ungabacabangi njengelicembu. Kulelo cembu, kunebantfu labehlukehlukene kanye nemindeni. Kungase kube nebantfwana, labasha, labadzala kanye nalasebakhulile. Kungaphindze kube nebantfu labasandza kucala kufundza liBhayibheli kanye nalabacala kukhonta Jehova wena usengakatalwa ngisho nekutalwa. Labanye kungenteka banebuhlobo lobucinile naJehova, kantsi labanye kungenteka basacabanga futsi batiphatsa ngendlela yelive. Tibute: ‘Loko lengitawucoca ngako kutawubazuzisa njani labo labatawube bangilalele? Ngingabasita njani kuze bakucondze?’ Ungase ukhetse kunaka licembu linye nobe lamabili ebantfu lesikhulume ngabo. Kodvwa ungakhohlwa ngalaba labanye.

Kutsiwani nangabe wabelwe kucoca ngemfundziso lesisekelo yeliBhayibheli? Yini longayenta kuze leyo nkhulumo ibazuzise bantfu labayikholelwako leyo mfundziso? Lwela kucinisa lizinga labayikholelwa ngayo. Kanjani? Ngekutsi uvete bufakazi lobusemBhalweni lobuyisekelako. Khulisa indlela labayicondza ngayo leyo mfundziso yeliBhayibheli. Loku ungakwenta ngekubakhombisa kutsi leyo mfundziso ivumelana njani nemaciniso eliBhayibheli kanye nebunjalo baJehova. Sebentisa tibonelo letenteka mbamba letikhombisa indlela kucondza leyo mfundziso lokubazuzise ngayo labanye bantfu futsi kwatsintsa nendlela labasibuka ngayo sikhatsi lesitako.

Ungalindzi kutsi uze ufike esiphetfweni senkhulumo yakho kube ngukhona uveta kutsi isebenta njani. Kusukela ekucaleni kwayo, kufanele umuntfu ngamunye kulabo labakulalele ativele naye kutsi lenkhulumo iyamtsintsa. Nasewukwentile loko, njengobe uchubeka nalenkhulumo veta kutsi isebenta njani nawudzingidza liphuzu ngalinye leliyinhloko nalapho sewuyiphetsa.

Nawuveta kutsi inkhulumo ingasetjentiswa njani, ciniseka kutsi lokushoko kuvumelana netimiso teliBhayibheli. Kusho kutsini loko? Kusho kutsi kufanele ukwente ngendlela lekhombisa lutsandvo futsi ube nemusa. (1 Phet. 3:8; 1 Joh. 4:8) Ngisho nangesikhatsi asingatsa tinkinga letimatima eThesalonika, umphostoli Pawula wagcizelela lokuhle mayelana nentfutfuko bazalwane kanye nabodzadze wakhe lebebayentile ebuhlotjeni babo naJehova. Waphindze waveta kutsi uyaciniseka kutsi batawukwenta loko labekhuluma ngako. (1 Thes. 4:1-12) Lesi sibonelo lesihle lokufanele sisilingise.

Iyini injongo yenkhulumo yakho? Kukhutsata labo labalalele kutsi bahlanganyele emsebentini wekushumayela kanye nekufundzisa bantfu tindzaba letimnandzi yini? Bente babe nenshisekelo futsi balijabulele lelilungelo. Kodvwa-ke nawenta loko, khumbula kutsi lizinga umuntfu ngamunye lahlanganyela ngalo kulomsebenti liyehluka, futsi neliBhayibheli liyakusho loko. (Mat. 13:23) Ungabenti bantfu lokhuluma nabo bative banemahloni. Incwadzi yemaHebheru 10:24 isincusa kutsi “sikhutsatane elutsandvweni nasemisebentini lemihle.” Nangabe sikhutsatana elutsandvweni, sitawukhona kwenta imisebenti lemihle ngalokusuka enhlitiyweni. Kunekutsi ubaphocelele labo lokhuluma nabo, khumbula kutsi Jehova ufuna sikhutsate “kulalela ngekukholwa.” (Rom. 16:26) Njengobe sikukhumbula loku, silwela kucinisa kukholwa kwetfu nekwebazalwane betfu.

Sita Labanye Babone Kutsi Lokushoko Kungasetjentiswa Njani. Njengobe ufakaza kulabanye, gcizelela kutsi tibaluleke ngani tindzaba letimnandzi. Kuze wente loku, kudzingeka wati kutsi bantfu ensimini yenu bacabangani. Ungakwati njani loko? Lalela tindzaba emsakatweni nobe ku-TV. Fundza likhasi lekucala leliphephandzaba. Yetama nekucoca nebantfu futsi ubalalele nabakhuluma. Kungenteka utfole kutsi bacindzetelwe tinkinga, letifaka ekhatsi kulahlekelwa ngumsebenti, kubhadala irenti, kugula, kufelwa lilunga lemndeni, bugebengu, kuphatfwa kabi ngumuntfu losesikhundleni, kucitseka kwemshado, kukhulisa bantfwana ngendlela lekahle, nalokunye lokunyenti. LiBhayibheli lingabasita yini? Yebo lingabasita.

Nawucoca nemuntfu, kungenteka usuke sewunalokutsite lofuna nikhulume ngako. Kodvwa-ke nangabe loyo muntfu aveta kutsi kunentfo letsite lemkhatsatako, kufanele ushintje ukhulume ngaleyo nkinga lemkhatsatako nangabe utawukhona nobe umtjele kutsi utawuphindze ubuye sewutfole kwatiswa lokutawuba lusito. Kodvwa-ke ‘asitigaci etindzabeni letingasitsintsi,’ kunaloko sihlanganyela nebantfu seluleko lesilusito lesitfolakala eBhayibhelini. (2 Thes. 3:11) Intfo bantfu labatayitsandza kakhulu seluleko lesiseBhayibhelini lesitsintsa kuphila kwabo.

Nangabe bantfu bangaboni kutsi loko lesikushoko kubatsintsa njani, ngekushesha bangabese bayayekela kucoca natsi. Ngisho nobe bavuma kucoca natsi, nasehluleka kuveta kutsi indzaba lesikhuluma ngayo ingasetjentiswa njani, loko lesikhuluma ngako ngeke kukutsintse kangako kuphila kwabo. Kodvwa-ke nangabe sikwenta kucace kutsi loko lesikushoko kungasetjentiswa njani, kwenta njalo kungakushintja kuphila kwebantfu.

Nawuchuba tifundvo teliBhayibheli, veta kutsi loko lenikufundzako kungasetjentiswa njani. (Taga 4:7) Sita labo lofundza nabo kutsi basicondze seluleko seliBhayibheli, timiso kanye netibonelo letibakhombisa kutsi bangahamba njani endleleni yaJehova. Gcizelela tinzuzo letitfolakala ngekwenta kanjalo. (Isa. 48:17, 18) Loku kutawukwenta lofundza nabo kutsi bente lushintjo loludzingekako ekuphileni kwabo. Bente bamtsandze Jehova futsi babe nesifiso sekumjabulisa. Basite kuze sifiso sabo sekusebentisa seluleko lesiseVini laNkulunkulu sisuke enhlitiyweni.