Kuhlela Indzaba Ngendlela Lenengcondvo

NGAPHAMBI kwekutsi uhlele indzaba ngendlela lenengcondvo, kudzingeka ube nemgomo. Uyini umgomo wakho? Ukutjela labanye ngendzaba letsite yini, kungaba yinkholelo, simo sengcondvo, similo lesitsite, indlela letsite yekutiphatsa nobe yekuphila? Ufuna kufakazela intfo letsite yini nobe ufuna kukhombisa kutsi ayisilo liciniso? Umgomo wakho kwenta bantfu babonge ngentfo letsite yini nobe kubakhutsata kutsi batsatse sinyatselo? Ngisho nobe indzaba yakho utayetfula kumuntfu munye nobe ecenjini lelikhulu, kuze uphumelele kudzingeka ucabange ngekutsi yini lesebavele bayati ngayo kanye nekutsi banamuphi umbono ngayo. Ngemuva kwekutsi sewente loku, hlela indzaba yakho ngendlela yekutsi ikusite ukwati kufeza umgomo wakho.

Mayelana nemsebenti wekushumayela Sawula (Pawula) lawenta eDamaseko, Imisebenti 9:22 itsi “emaJuda labehlala eDamaseko amangala ngesikhatsi akufakazela ngalokucacile nobe ngendlela lenengcondvo kutsi Jesu unguKhristu.” Wakwenta njani loku? Njengobe kubonakala emsebentini wekushumayela Pawula lawenta ngesikhatsi ase-Antiyokhi naseThesalonika, wacala ngekusekela loko lakushoko endzabeni yekutsi emaJuda abeyemukela imiBhalo YesiHebheru futsi abekukholelwa loko lemibhalo lekushoko ngaMesiya. Ngemuva kwaloko, wakhetsa tincenyana letitsite kuleyo miBhalo lebetikhuluma ngekuphila kanye nemsebenti waMesiya wekushumayela. Waticaphuna wabese uticatsanisa naloko vele lokwenteka kuJesu. Ekugcineni waveta liciniso lekutsi Jesu abenguKhristu nobe Mesiya. (Imis. 13:16-41; 17:2, 3) Nangabe nawe uveta emaciniso eliBhayibheli ngendlela lenengcondvo, loko kungenta labanye bakukholelwe lokushoko.

Kuhlela Indzaba Yakho. Indzaba ingahlelwa ngetindlela letehlukehlukene letinengcondvo. Nangabe kukulungela, letindlela ungatisebentisa ngasikhatsi sinye. Ake ucabange ngalokumbalwa longakwenta.

Kuyihlela Ngetihlokwana. Loku kuhlanganisa kuhlela indzaba yakho ngetihlokwana, ngasinye sikusite ufeze umgomo wakho. Letihlokwana tingaba ngemaphuzu layinhloko labalulekile ekutseni indzaba lokhuluma ngayo icondzakale. Tingaba nangemaphuzu lafakazela intfo letsite nobe lakhombisa kutsi ayisilo liciniso. Lamanye emaphuzu ngisho nobe ahlobene nesihloko angafakwa nobe akhishwe, kuye ngebantfu lotawube ukhuluma nabo nobe ngemgomo wakho.

Cabanga nganasi sibonelo sekuhlela indzaba ngetihlokwana. Nawukhuluma ngeligama laNkulunkulu ungase uhlanganise kutsi (1) kungani kubalulekile kwati Nkulunkulu ngeligama, (2) ngubani ligama lakhe, kanye nekutsi (3) singalihlonipha njani.

Kunyenti lesingakufundza mayelana nekuhlela indzaba ngetihlokwana etincwadzini letisetjentiswa ekuchubeni tifundvo teliBhayibheli tasekhaya, letihlelwa ‘sisebenti lesetsembekile nalesihlakaniphile.’ (Mat. 24:45) Letincwadzi tivame kuba netihloko letinyenti letisita bafundzi kutsi batfole umcondvo wemaciniso eliBhayibheli lasisekelo. Tincwadzi letinkhulu tisebentisa tihlokwana kute tehlukanise sehluko ngasinye. Sihloko ngasinye sisita umfundzi asilungele sihloko lesilandzelako futsi simsite akucondze loko lokukhulunywa ngako.

Imbangela Nemphumela. Lokunye longakwenta kute wetfule indzaba ngendlela lenengcondvo kutsi uvete imbangela nemphumela.

Lendlela ingaphumelela nangabe ukhuluma nelicembu nobe nebantfu labatsite lokudzingeka bacabangisise ngemphumela wentfo letsite labayentako nobe labahlela kuyenta. Taga sehluko 7 tinesibonelo lesihle saloku. Tiyichaza ngalokucacile indlela lijaha lelalinenhlitiyo ‘lengenalwati’ (imbangela) lelatihlanganisa ngayo nengwadla futsi latfola imiphumela lebuhlungu (umphumela).​—Taga 7:7.

Kuze ugcizelele, ungase uvete umehluko lokhona emkhatsini wemiphumela lemibi letfolwa ngulabo labangahambi etindleleni taJehova kanye nemiphumela lemihle letfolwa ngulabo labamlalelako. Asetjentiswa ngumoya waJehova, Mosi wawuveta lowo mehluko ngesikhatsi akhuluma nesive saka-Israyeli ngembikwekutsi singene eVeni Lesetsembiso.​—Dut., sehl. 28.

Kuletinye timo, kuncono kucala indzaba yakho ngekuveta simo lesitsite (umphumela) ngemuva kwaloko bese uveta bufakazi lobukhombisa tintfo letibangele leso simo (imbangela). Ngalokuvamile loku kudzinga kutsi uvete inkinga kanye nelikhambi nawetfula indzaba.

Inkinga Kanye Nelikhambi. Nawusensimini, ungase ukhone kwenta umuntfu akulalele nangabe ucoca ngenkinga lekhatsata bantfu bese uyakhombisa kutsi likhona likhambi layo. Lenkinga ingavetwa nguwe nobe ivetwe ngumuntfu lokhuluma naye.

Inkinga ingaba kuguga nekufa kwebantfu kanye nekwandza kwebugebengu nekungalungi. Akudzingeki kutsi uze uchaze kakhulu kuze ukhombise kutsi ikhona leyo nkinga, ngobe vele isebaleni. Ungavele ucale ngekuyisho, bese uveta likhambi layo lelitfolakala eBhayibhelini.

Ngalesinye sikhatsi, inkinga ingase itsintse umuntfu ngamunye, kungaba tinkinga letiletfwa kukhulisa bantfwana uwedvwa, kukhatsateka ngenca yekugula lokukhulu, nobe bumatima umuntfu lahlangabetana nabo ngenca yekuphatfwa kabi. Kuze uphumelele, kudzingeka ucale ngekulalelisisa kahle. LiBhayibheli linekwatiswa lokulusito kuto tonkhe letinkinga. Kodvwa kudzingeka lisetjentiswe ngekuhlakanipha. Kuze loko lokhuluma ngako kumzuzise lomunye umuntfu, kufanele kufanelane nesimo sakhe. Kwente kucace kutsi ukhuluma ngelikhambi lelihlala njalo, likhambi lesikhashana, nobe kutsi ukhuluma ngendlela yekubeketelela simo lesingeke sishintje kwanyalo. Ngalamanye emagama, ciniseka kutsi uveta tizatfu letenele letisemBhalweni letitawusekela siphetfo losivetako. Nawungakwenti loku, likhambi lokhuluma ngalo ngeke libonakale linengcondvo kumuntfu lokhuluma naye.

Kuhlela Indzaba Ngekulandzelana Kwetikhatsi. Lenye indzaba idzinga kwetfulwa ngekulandzelana kwetikhatsi. Nasi sibonelo: Encwadzini ya-Eksodusi, Tishayo Letilishumi tivetwa ngekulandzelana kwato. Umphostoli Pawula nakabala emadvodza nebafati labasibonelo sekukholwa, kumaHebheru sehluko 11, ubasho ngekulandzelana kwabo.

Nangabe tintfo letenteka esikhatsini lesendlulile utisho ngekulandzelana kwato, loku kungasita labo lokhuluma nabo bacondze kutsi tenteka njani letinye tintfo. Loku kuyasebenta etintfweni letenteke esikhatsini setfu kanye nasetintfweni letenteka endvulo lokukhulunywa ngato eBhayibhelini. Nawenta njalo, utawube uhlela indzaba yakho ngekulandzelana kwetikhatsi futsi uveta imbangela nemphumela. Nangabe ufuna kukhuluma ngetintfo liBhayibheli lelitsi titawukwenteka esikhatsini lesitako, kutisho ngekulandzelana kwato kutawukwenta kutsi kube melula ngalabo lokhuluma nabo kutsi bahambisane nawe futsi batikhumbule.

Kuhlela indzaba ngekulandzelana kwetikhatsi akusho kutsi ngaso sonkhe sikhatsi kufanele ucale ekucaleni. Kuletinye timo, kungaba nemiphumela lemihle kutsi nawusho indzaba letsite ucale lapho ineliphuzu lelinemandla khona. Nasi sibonelo: Nawucoca ngalokuhlangenwe nako kwalotsite, ungase ukhetse kucala ngendlela kwetsembeka kwakhe kuNkulunkulu lokwavivinywa ngayo. Nasewubentile labo lokhuluma nabo kutsi balangatelele loko lokwenteka, sewungasho imininingwane yaleyo ndzaba ngekulandzelana kwayo.

Sebentisa Kwatiswa Lokuhambisana Nendzaba. Ngisho nobe ungayihlela njani indzaba yakho, kufanele unake kutsi usebentisa kuphela kwatiswa lokuhambisana nendzaba. Sihloko senkhulumo yakho kufanele sikucondzise nawukhetsa lokwatiswa. Kufanele ucabange nangekutsi kutawube kubobani labakulalele. Liphuzu lelitsite lingaba ngulelibalulekile eluhlotjeni lolutsite lwebantfu, kodvwa kulabanye lingadzingeki. Kufanele uciniseke nekutsi konkhe kwatiswa lokusebentisako kutakusita kutsi ufeze umgomo wakho. Nawungakwenti loko, nanobe inkhulumo yakho imnandzi, ingase ingabi nemiphumela lemihle.

Nawusacwaninga, ungase utfole kwatiswa lokunyenti lokumnandzi lokuhambisana nesihloko sakho. Kungakanani lokufanele ukusebentise? Nangabe labo lokhuluma nabo ubanika kwatiswa lokunyenti kakhulu, kungenteka ungawufinyeleli umgomo wakho. Kumelula kukhumbula emaphuzu lambalwa lachazwe kahle kunemaphuzu lamanyenti lashiwo ngekushesha. Loku akusho kutsi kufanele ungasakufaki kwatiswa lokujabulisako. Kodvwa-ke ungakuvumeli kutsi kwente umgomo wakho ungasabonakali. Naka kutsi kwatiswa lokunjalo kwafakwa njani ngekuhlakanipha eBhayibhelini, kuMakho 7:3, 4 nakuJohane 4:1-3, 7-9.

Njengobe usuka kulelinye liphuzu uya kulelinye, kufanele ucaphele kutsi ungasheshisi kakhulu kangangekutsi labo lokhuluma nabo bangasaboni kutsi emaphuzu ahlangana njani. Kuze imicondvo ikhone kuhlangana kahle, kungadzingeka kutsi ufake lokutsite lokutayihlanganisa. Ungase uyihlanganise ngemushwana nobe ngemusho lophelele lotawuveta kutsi leyo micondvo ihlobana njani. Etilwimini letinyenti, kungasetjentiswa emagama nobe imishwana lekhombisa kutsi umcondvo lotsite uhlobana njani naloko lesekuvele kushiwo.

Kusebentisa kuphela kwatiswa lokuhambisana nendzaba yakho kanye nekukuhlela ngendlela lenengcondvo kutakusita kutsi ufeze umgomo wakho.