Labakulalele Bakhutsatiwe Baphindze Baciniswa

TINCEKU taNkulunkulu kufanele titfole sikhutsato ebandleni lebuKhristu, ngisho nobe tibhekene natiphi tinkinga. Kuze loko kwenteke, labadzala kufanele baciniseke kutsi tinkhulumo kanye neteluleko tabo tiyakhutsata. Labadzala kufanele ‘bafanane nesiphephelo emoyeni, babe bakhoselisi kuso sivunguvungu, babe njengemifula yemanti ehlane, bafanane nelitfunti lelidvwala lelikhulu eveni lelomele emanti.’​—Isa. 32:2.

Nangabe ungulomdzala, tinkhulumo takho tiyakhutsata yini futsi tidvudvute? Tiyabaniketa yini emandla labo labafuna kukhonta Jehova ngekwetsembeka? Tiyabacinisa yini kutsi bachubeke benta intsandvo yaNkulunkulu ngisho nobe bantfu bangabatsandzi nobe babaphikisa? Kutsiwani nangabe labanye kulabo labakulalele bacindzetelekile, bakhatsatekile ngenca yesimo lesimatima setemnotfo nobe balwisana nekugula lokukhulu lokungelapheki? ‘Ungabakhutsata bazalwane bakho ngemavi emlomo wakho.’​—Jobe 16:5.

Sebentisa litfuba lonalo njengobe usikhulumi kuze usite bazalwane bakho babe nelitsemba futsi batfole emandla kuJehova, baphindze bazuze kuloko lasilungiselele kona.​—Rom. 15:13; Ef. 6:10.

Bakhumbute Ngaloko Jehova Lakwentile. Indlela lencono yekukhutsata kutsi ukhombise indlela Jehova labasita ngayo bantfu bakhe etimeni letimatima endvulo.​—Rom. 15:4.

Jehova watjela Mosi kutsi ‘akhutsate’ futsi ‘acinise’ Joshuwa ngembikwekutsi ema-Israyeli angene eVeni Lesetsembiso, ngaleso sikhatsi lebelinetive letititsa tawo. Mosi wakwenta njani loko? Wakhumbuta sonkhe lesive, naJoshuwa akhona ngetintfo Jehova labebentele tona ngesikhatsi basuka eGibhithe. (Dut. 3:28; 7:18) Mosi waphindze wakhuluma ngekuncoba kwabo ema-Amori lebebasekelwe nguJehova kuko. Ngemuva kwaloko wakhutsata Joshuwa watsi: “Cina ume sibindzi.” (Dut. 31:1-8) Nangabe ufuna kukhutsata bazalwane bakho, uyabasita yini kutsi batfole emandla ngekukhumbula loko Jehova lasavele abentele kona?

Ngaletinye tikhatsi, bantfu bacindzeteleka kakhulu baze batibute kutsi bayoke batitfole yini tibusiso teMbuso. Bakhumbute kutsi tetsembiso taJehova singatetsemba.​—Josh. 23:14.

Kulamanye emave, hulumende ushaya imitsetfo levimbela bazalwane betfu kutsi bashumayele tindzaba letimnandzi. Etimeni letinjalo, labadzala labanelutsandvo bangasita emakholwa labakanye nawo kutsi atfole sikhutsato kulokuhlangenwe nako kwebaphostoli baJesu Khristu. (Imis. 4:1–5:42) Kugcizelela indlela Nkulunkulu langenela ngayo etindzabeni letitsite, njengaleyo letfolakala encwadzini ya-Esta, kungabakhutsata bazalwane kutsi babe nesibindzi.

Ngaletinye tikhatsi labanye bantfu bayeta emihlanganweni yelibandla kodvwa bangatfutfuki. Bangase bacabange kutsi Nkulunkulu ngeke aze abatsetselele ngobe indlela yabo yekuphila beyiyimbi kakhulu. Ungase ulandzise indlela Jehova layiphatsa ngayo iNkhosi Manase. (2 Khr. 33:1-16) Nobe ungase ukhulume ngebantfu baseKhorinte labashintja indlela yabo yekuphila, baba ngemaKhristu futsi Nkulunkulu watsi balungile.​—1 Khor. 6:9-11.

Bakhona yini labeva shengatsi tinkinga labanato tikhombisa kutsi Nkulunkulu akabemukeli? Ungase ubakhumbute ngaloko Jobe lahlangabetana nako kanye nendlela labusiswa ngayo ngenca yekutsi wachubeka acotfo kuJehova. (Jobe 1:1-22; 10:1; 42:12, 13; Hla. 34:19) Badvudvuti mbumbulu baJobe batsi kunesono labesentile. (Jobe 4:7, 8; 8:5, 6) Ngalokwehlukile, ngesikhatsi bacinisa bafundzi futsi ‘babakhutsata kutsi babe nekukholwa lokucinile,’ boPawula naBhanabasi batsi: “EMbusweni waNkulunkulu sitawungena sendlule ekuhluphekeni lokunyenti.” (Imis. 14:21, 22) Ngendlela lefanako, ungabacinisa labo labahlangabetana netilingo ngekuveta kutsi kubeketelela tinkinga kuyintfo ledzingekako kuwo onkhe emaKhristu futsi kuba ligugu emehlweni aNkulunkulu.​—Taga 27:11; Mat. 24:13; Rom. 5:3, 4; 2 Thim. 3:12.

Khutsata labo labakulalele kutsi bacabange ngetindlela Jehova lagcwalise ngato tetsembiso takhe ekuphileni kwabo. Ngaleto tikhumbuto, bangabona kutsi kukhona Jehova lasavele abentele kona, njengobe etsembisile. Naku lesikufundza kuTihlabelelo 32:8: “Ngiyawukufundzisa ngikukhombise indlela lofanele kuhamba ngayo, ngikweluleke, liso lami lingesuki kuwe.” Ngekusita labo labakulalele kutsi bakhumbule indlela Jehova labacondzise futsi wabacinisa ngayo, utawubenta babone kutsi Jehova ubakhatsalela kakhulu kanye nekutsi utawubasita kunobe ngutiphi tinkinga labangahlangabetana nato.​—Isa. 41:10, 13; 1 Phet. 5:7.

Kujabulele Loko Nkulunkulu Lakwentako Nyalo. Nawetama kukhutsata bazalwane bakho, gcizelela loko Jehova lakwentako nyalo. Nawukhuluma ngendlela lekhombisa kutsi uyatijabulela leto tintfo, tinhlitiyo talabo labakulalele nato titawutsintseka.

Cabanga ngendlela Jehova lasisita ngayo kutsi sibeketelele tinkinga tekuphila. Usikhombisa indlela lencono yekuphila. (Isa. 30:21) Uyasichazela kutsi kungani kunebugebengu, kungalungi, kuhlupheka, kugula kanye nekufa. Uphindze asitjele kutsi utawuticedza njani tonkhe letintfo. Usiphe nebazalwane labanelutsandvo. Usinikete umthantazo, losipho lesiligugu. Usinikete nelilungelo lekuba BoFakazi bakhe. Usente sabona kutsi Khristu sewuyabusa ezulwini kanye nekutsi emalanga ekugcina alelive lelibi sekatawuphela ngekushesha.​—Semb. 12:1-12.

Ngetulu kwaleto tibusiso kunemihlangano yetfu yelibandla, kanye nemihlangano lemincane nalemikhulu. Nangabe ukhombisa kubonga nawukhuluma ngalemihlangano, utawubakhutsata nalabanye kutsi bangakutsatseli phansi kuhlangana nalabanye bazalwane babo.​—Heb. 10:23-25.

Imibiko lekhombisa kutsi Jehova uyayibusisa imetamo yetfu yekushumayela nayo ingaba sikhutsato. Ekhulwini lekucala leminyaka, ngesikhatsi boPawula naBhanabasi baya eJerusalema, balandzisa ngekuguculwa kwebantfu betive, futsi loko “bekubajabulisa bonkhe bazalwane.” (Imis. 15:3) Nawe ungabenta bazalwane bajabule ngekubacocela lokuhlangenwe nako lokwakhako.

Bantfu batawukhutsateka kakhulu nangabe ubasita babone kutsi loko labakwentako kubalulekile. Bancome ngaloko labakwentako emsebentini webuKhristu. Bancome labo labangasakhoni kwenta lokunyenti ngenca yekukhula ngeminyaka kanye nekugula kodvwa labachubeka babeketela ngekwetsembeka. Bakhumbute kutsi Jehova akalukhohlwa lutsandvo lababe nalo ngelibito lakhe. (Heb. 6:10) Kukholwa lokuvivinyiwe kuligugu lelikhulu. (1 Phet. 1:6, 7) Bazalwane betfu bayakudzinga kukhunjutwa ngaloku.

Veta Imiva Nawukhuluma Ngematsemba Lesiwalindzele. Tetsembiso letiphefumulelwe tetintfo letitako tingumtfombo wesikhutsato lesikhulu kubo bonkhe labatsandza Nkulunkulu. Kungenteka labanyenti balabo labakulalele bake beva ngato. Kodvwa injabulo loyivetako nawukhuluma ngato ingatenta tiphile, wente nebantfu batetsembe futsi tinhlitiyo tabo tigcwale kubonga. Kusebentisa loko lokufundze eSikolweni Semsebenti WemaKhristu kungakusita kutsi ukwente loko.

Jehova ungumtfombo wesikhutsato nemandla kubantfu bakhe. Kodvwa nawe ungabambisana naye ekukhutsateni nasekuciniseni labanye. Nawukhuluma nelibandla, lisebentise kahle lelo tfuba kuze wente loko.