Kusitwa Tingilosi TaNkulunkulu

LABANYE bantfu batsi bona bakholelwa loko labakubonako kuphela. Kodvwa loko akusiko kuhlakanipha. Tinyenti tintfo letikhona lesingakaze sitibone ngemehlo etfu. Ngicela ungitjele lenye yato?—

Ucabangani ngemoya lesiwuhogelako? Singakhona yini kuwutsintsa?— Bamba sandla sakho, bese uyasiphuphutsa. Kukhona yini lokuvako?— Yebo, kodvwa ungakhona yini kuwubona umoya?—

Sicocile ngebantfu labanemitimba lengumoya futsi lesingeke sikhone kubabona. Sifundze kutsi labanye babo balungile kantsi labanye abakalungi. Ngicela ungitjele ngebantfu labalungile labanemitimba lengumoya lesingeke sikhone kubabona.— NguJehova Nkulunkulu, Jesu kanye naletinye tingilosi letilungile. Tikhona yini tingilosi letingakalungi?— LiBhayibheli litsi tikhona. Ngicela ungitjele kutsi ufundzeni ngato.—

Siyati kutsi tingilosi letilungile naletingakalungi tinemandla kunatsi. UMfundzisi Lomuhle Kakhulu bekati lokunyenti ngetingilosi. Loku kwabangelwa kutsi naye bekayingilosi ngaphambikwekutsi atalwe emhlabeni njengemntfwana. Waphila naletinye tingilosi ezulwini. Bekati letinyenti kakhulu. Tonkhe letingilosi tinawo yini emagama?—

Sifundzile kutsi Nkulunkulu wetsa tinkanyeti emagama. Ngako singaciniseka kutsi tingilosi nato tinawo emagama. Siyati nekutsi tiyakhuluma todvwana ngobe liBhayibheli lisitjela ‘ngetilwimi tetingilosi.’ (1 Khorinte 13:1) Ucabanga kutsi tingilosi tikhuluma ngani? Tiyakhuluma yini ngatsi njengobe silapha emhlabeni?—

Siyati kutsi tingilosi taSathane, letingemadimoni, tetama kusenta kutsi singamlaleli Jehova. Ngako tiyakhuluma ngekutsi tingakwenta njani loko. Tifuna kutsi sifanane nato kute Jehova angasitsandzi natsi. Kutsiwani ngetingilosi taNkulunkulu letetsembekile? Ucabanga kutsi nato tiyakhuluma yini ngatsi?— Tiyakhuluma ngatsi futsi tifuna kusisita. Ase ngikucocele indlela letinye tingilosi taNkulunkulu letasita ngayo bantfu lebebatsandza Jehova futsi lebebamkhonta.

Nasi sibonelo: Bekunendvodza ligama layo lebekunguDanyela lebeyihlala eBhabhulona. Bantfu labanyenti lebebahlala lapho bebangamtsandzi Jehova. Babeka umtsetfo lobewutsi nangabe nje umuntfu athantaza kuJehova Nkulunkulu bekufanele ajeziswe. Kodvwa Danyela akazange ayekele kuthantaza kuJehova. Bamentani Danyela?—

Bantfu lababi benta kutsi Danyela ajikijelwe emgodzini wemabhubesi. Danyela bekanemabhubesi lalambile kulomgodzi. Kwentekani lapho?— Danyela watsi: ‘Nkulunkulu watfumela ingilosi yakhe, leyafike yavala imilomo yalamabhubesi.’ Danyela akazange alimale ngisho nakancane. Tingilosi tingabentela tintfo letimangalisako labo labakhonta Jehova.—Danyela 6:18-22.

Ngalelinye lilanga Phetro wafakwa ejele. Ngiyetsemba usakhumbula kutsi Phetro abengumngani weMfundzisi Lomuhle Kakhulu, Jesu Khristu. Labanye bantfu abazange bajabule ngesikhatsi Phetro abatjela kutsi Jesu bekayiNdvodzana yaNkulunkulu. Ngako-ke bamfaka ejele. Emasotja bekagadze Phetro kuze aciniseke kutsi akabaleki. Ukhona yini umuntfu labengasita Phetro?—

Phetro bekagadvwe bogadzi lababili, alele emkhatsini wabo, futsi aboshwe ngetinketane etandleni takhe. Kodvwa liBhayibheli litsi: ‘Kwafika ingilosi yaJehova kulelijele, futsi kwacala kukhanya. Lengilosi yanyikitisa Phetro, yamvusa yatsi: “Vuka masinyane!”’

Ngaso leso sikhatsi, letinketane tawa etandleni takhe. Lengilosi yatsi kuye: ‘Gcoka timphahla takho netincabule, bese uyangilandzela.’ Labogadzi bebangeke bakhone kubavimba ngobe lengilosi beyisita Phetro. Njengobe bahamba befika egedeni lensimbi, futsi kwenteka intfo lemangalisako. Leligede lavele lativulekela nge! Lengilosi yakhipha Phetro ejele kuze achubeke ashumayela.​—Imisebenti 12:3-11.

Ucabanga kutsi tingilosi taNkulunkulu tingasisita yini natsi?— Tingasisita. Loku kusho kutsi titasivikela yini kute singalimali?— Cha, tingilosi angeke tisivikele kute singalimali nangabe senta tintfo letimbi. Kodvwa ngisho nobe singatenti tintfo letimbi, singahle silimale. Tingilosi atitjelwa kutsi tivimbele tintfo letinjalo kutsi tingenteki. Kunaloko, Nkulunkulu utinike umsebenti lokhetsekile lokufanele tiwente.

LiBhayibheli likhuluma ngengilosi letjela bantfu labasemhlabeni wonkhe kutsi bakhonte Nkulunkulu. (Sembulo 14:6, 7) Lengilosi ibatjela njani loko? Imemeta isezulwini yini kuze bonkhe bantfu bakhone kuyiva?— Cha, kodvwa balandzeli baJesu labasemhlabeni bakhuluma nalabanye bantfu ngaNkulunkulu, futsi tingilosi tiyabacondzisa emsebentini wabo. Tingilosi tisita labo labafuna mbamba kwati Nkulunkulu kutsi babe nesikhatsi sekulalela. Natsi singaba nencenye kulomsebenti wekushumayela, futsi tingilosi titosisita.

Kufanele sente njani nangabe bantfu labangamtsandzi Nkulunkulu basihlupha? Sitokwenta njani nabasifaka ejele? Tingilosi titosikhipha yini ejele?— Tingasikhipha. Kodvwa atihlali tikwenta loko.

Umlandzeli waJesu, Pawula, wake wafakwa ejele. Ngalelinye lilanga bekahamba ngesikebhe futsi kunesiphepho lesikhulu. Kodvwa tingilosi atizange timsite ngaso leso sikhatsi. Loko kwabangelwa kutsi bekunebantfu lebekufanele beve ngaNkulunkulu. Ingilosi yatsi: “Ungesabi Pawula. Wena kufanele ume embikwaKhesari.” Pawula bekufanele aye kuKhesari umbusi wemhlaba, kuze ashumayele kuye. Tingilosi betihlale tati kutsi Pawula ukuphi, futsi betimsita. Natsi titasisita nangabe simkhonta mbamba Nkulunkulu.​—Imisebenti 27:23-25.

Kunalomunye umsebenti lomkhulu lotakwentiwa tingilosi, futsi titasisita ngekushesha. Sikhatsi saNkulunkulu sekutsi abhubhise bantfu lababi sesidvutane kakhulu. Bonkhe labangafuni kukhonta Nkulunkulu weliciniso batawubhujiswa. Labo labatsi abakholelwa kutsi tingilosi tikhona ngobe abakaze batibone, batawubona kutsi bebenta liphutsa ngekusho njalo.​—2 Thesalonika 1:6-8.

Kutawentekani kitsi?— Nangabe siseluhlangotsini lwetingilosi taNkulunkulu, titasisita. Siseluhlangotsini lwato yini?— Sitawuba seluhlangotsini lwato nangabe sikhonta Jehova. Nangabe simkhonta Jehova, sitawutjela nalabanye bantfu kutsi nabo bamkhonte.