SANDZISANCHAZO
Jesu Khristu—Mesiya Lotsenjisiwe
KUTE asisite sibone Mesiya, Nkulunkulu Jehova waphefumulela baphrofethi beliBhayibheli labanyenti kutsi basinikete imininingwane macondzana nekutalwa, umsebenti wakhe kanye nekufa kwaloMsindzisi lotsenjisiwe. Tonkhe letiphrofetho teliBhayibheli tagcwaliseka kuJesu Khristu. Letiphrofetho tiliciniso futsi tenteka ngendlela letabiketelwa ngayo. Kute sifananise loku, ase sifundze ngetiphrofetho letimbalwa letabiketela kutalwa kwaMesiya kanye nekukhula kwakhe.
Umphrofethi Isaya wabiketela kutsi Mesiya abeyoba situkulwane seNkhosi Davide. (Isaya 9:7) Nembala Jesu watalwa emndenini waDavide.—Matewu 1:1, 6-17.
Lomunye umphrofethi waNkulunkulu longuMikha, wabiketela kutsi lomntfwana abetawuba ngumbusi futsi abetawutalelwa ‘eBhetlehema Efratha.’ (Mikha 5:2) Ngesikhatsi sekutalwa kwaJesu, ka-Israyeli bekunemadolobha lamabili labekabitwa ngekutsi iBhetlehema. Lenye yayingaseNazaretha endzaweni lengasenyakatfo yelive, kantsi lenye yayisedvute neJerusalema leseJudiya. IBhetlehema lesedvute neJerusalema, ekucaleni yayibitwa ngekutsi i-Efratha. Jesu watalelwa kulelo dolobha, njengobe siphrofetho sasibiketele.—Matewu 2:1.
Lesinye siphrofetho seliBhayibheli sabiketela kutsi iNdvodzana yaNkulunkulu yayiyobitwa ‘ikhishwe eGibhithe.’ Umntfwana longuJesu watsatfwa eGibhithe wabuyiselwa emuva ngemuva kwekufa kwaHerodi. Loko kwaba kugcwaliseka kwesiphrofetho.—Hoseya 11:1; Matewu 2:15.
Eshadini lelisekhasini 200, luhla lwemibhalo lolingephasi kwesihloko lesitsi “Siphrofetho” licuketse imininingwane lemayelana naMesiya. Ase ucatsanise lemibhalo kanye naleyo lesesihlokweni lesitsi “Kugcwaliseka.” Kwenta njalo kuyocinisa kukholwa kwakho ekutseni liVi laNkulunkulu liliciniso.
Njengobe ufundza lemibhalo, khumbula kutsi letiphrofetho tabhalwa eminyakeni lengemakhulu ngembi kwekutalwa kwaJesu. Jesu watsi: “Konkhe lokubhaliwe ngami emtsetfweni waMosi, nasemiBhalweni yebaphrofethi, naseTihlabelelweni bekufanele kugcwaliseke.” (Lukha 24:44) Njengobe ungacinisekisa eBhayibhelini lakho, tonkhe letiphrofetho tagcwaliseka ngalokuphelele!