SEHLUKO 1
Ungubani Nkulunkulu?
1, 2. Ngumiphi imibuto bantfu labavame kutibuta yona?
BANTFWANA babuta imibuto leminyenti. Nawubaphendvula bavame kubuta batsi, ‘Leni?’ Nawuphindze ubaphendvula kuyenteka baphindze babute batsi, ‘Leni nje?’
2 Sonkhe siyayibuta imibuto, akuyi ngekutsi singakanani ngeminyaka. Singatibuta imibuto lemayelana nekutsi sitawudlani, sitawugcokani nobe kutsi sitawutsengani. Ngalesinye sikhatsi singatibuta imibuto lebalulekile lemayelana nekuphila kanye nelikusasa. Kodvwa sivame kuyekela kutibuta lemibuto nasingatitfoli timphendvulo letenetisako.
3. Yini leyenta bantfu bacabange kutsi ngeke batitfole timphendvulo temibuto labanayo?
3 LiBhayibheli linato yini timphendvulo temibuto lebalulekile lesitibuta yona? Labanye bantfu bacabanga kutsi linato, kodvwa batsi kulukhuni kakhulu kulicondza. Bangase bacabange kutsi bothishela noma bafundisi kuphela labanaletimphendvulo talemibuto. Labanye bantfu banemahloni ekusho kutsi abatati timphendvulo talemibuto. Wena ucabangani?
4, 5. Ngumiphi imibuto lebalulekile longaba nayo? Kubaluleke ngani kutsi uchubeke ufuna timphendvulo tayo?
4 Kungenteka utibuta imibuto lenjengekutsi: Ngiphilelani nje? Kutawentekani kimi nangifa? Unjani Nkulunkulu? Jesu, uMfundzisi lomkhulu watsi: “Chubekani nicela, nitawuphiwa; chubekani nifuna, nitawutfola; chubekani ninconcotsa, nitawuvulelwa.” (Matewu 7:7) Ungalilahli litsemba uze utfole timphendvulo longatetsemba.
5 Nangabe ‘uchubeka ufunisisa’ letimphendvulo, utotitfola eBhayibhelini. (Taga 2:1-5) Letimphendvulo tiyevakala, futsi titokwenta ujabule nyalo uphindze ube nelitsemba lelihle lelikusasa. Ake sicoce ngembuto lodide bantfu labanyenti.
NKULUNKULU UYASIKHATSALELA YINI NOME UNELUNYA?
6. Yini leyenta bantfu bacabange kutsi Nkulunkulu akanendzaba nekuhlupheka kwabo?
6 Bantfu labanyenti bacabanga kutsi Nkulunkulu akanendzaba natsi. Bacabanga kutsi kube Nkulunkulu bekanandzaba natsi, umhlaba ngabe uncono kunaloku longiko nyalo. Sibona timphi, inzondo kanye netinkinga emhlabeni wonkhe. Bantfu bayagula bayahlupheka futsi bayafa. Labanye bayatibuta kutsi: ‘Nangabe Nkulunkulu anendzaba natsi, wentiwa yini kutsi angakucedzi konkhe lokuhlupheka?’
7. (a) Yini leshiwo bafundisi leyenta bantfu bacabange kutsi Nkulunkulu unelunya? (b) Yini lesenta siciniseke kutsi akusuye Nkulunkulu lobangela tintfo letimbi?
7 Ngaletinye tikhatsi, baholi benkholo benta bantfu bacabange kutsi Nkulunkulu unelunya. Nakwenteka intfo lembi batsi kuyintsandvo yaNkulunkulu. Batsi kwenteke ngoba abekuhlelile. Nabasho njalo basuke basola Nkulunkulu. Kodvwa liBhayibheli lifundzisa kutsi Nkulunkulu akayuze ente lokubi. UmBhalo waJakobe 1:13 usitjela kutsi Nkulunkulu akalingi muntfu. Utsi: “Nangabe umuntfu alingwa, angabosho kutsi: ‘Ngilingwa nguNkulunkulu.’ Ngobe Nkulunkulu ngeke alingwe ngalokubi kantsi naye akalingi muntfu.” Loku kusho kutsi nanobe Nkulunkulu angakativimbi tintfo letimbi kutsi tenteke, akusuye lotibangelako. (Fundza Jobe 34:10-12.) Ase sibekise.
8, 9. Yini leyenta kungabi kahle kusola Nkulunkulu ngetinkinga tetfu? Bekisa.
8 Cabanga ngemfana losahlala nebatali bakhe. Babe wakhe umtsandza kakhulu futsi umfundzise nendlela yekutsatsa tincumo letikahle. Kodwa lomfana ucala kuba lihlongandlebe, angasamlaleli babe wakhe ekugcineni ahambe ekhaya. Ungenela imikhuba lemibi bese ungena etinkingeni. Ungasho yini kutsi ngulobabe lobangele letinkinga ngekutsi avume kutsi lomfana ahambe ekhaya? Cha, angeke! (Lukha 15:11-13) Njengalobabe, Nkulunkulu akazange abavimbele bantfu nabakhetsa kwenta lokubi futsi bangamlaleli. Nangabe kwenteka intfo lembi kufanele sikhumbule kutsi ayikabangelwa nguNkulunkulu. Akusikahle kusola Nkulunkulu.
9 Kunesizatfu lesivakalako lesenta Nkulunkulu angativimbeli tintfo letimbi kutsi tenteke. Esehlukweni 11 utawufundza ngaloko liBhayibheli lelikushoko ngalendzaba. Ungaciniseka kutsi Nkulunkulu uyasitsandza futsi akwenteki asibangele tinkinga. Ecinisweni nguye kuphela longaticedza.—Isaya 33:2.
10. Yini lengasenta siciniseke kutsi Nkulunkulu utabucedza bonkhe bubi lobentiwa bantfu lababi?
10 Nkulunkulu ungcwele. (Isaya 6:3) Konkhe lakwentako kumsulwa, kuhlantekile futsi kuhle. Ngaleso sizatfu singametsemba. Nkulunkulu akafani nebantfu. Ngaletinye tikhatsi bantfu benta tintfo letingakalungi. Ngisho nembusi lowetsembeke kakhulu ute emandla ekulungisa wonkhe umonakalo lowentiwa bantfu lababi. Kute umuntfu lonemandla lalingana newaNkulunkulu. Angakhona kulungisa tonkhe tintfo letentiwe bantfu lababi futsi utatilungisa. Utawucedza bonkhe bubi bungaphindzi bube khona.—Fundza Tihlabelelo 37:9-11.
KUMPHATSA NJANI NKULUNKULU KUBONA BANTFU BAHLUPHEKA?
11. Nkulunkulu utiva njani ngekuhlupheka kwakho?
11 Kumphatsa njani Nkulunkulu kubona lokwenteka emhlabeni kanye netintfo letimbi letenteka kuwe? LiBhayibheli lifundzisa kutsi Nkulunkulu “utsandza kulunga.” (Tihlabelelo 33:5) Unendzaba nekutsi yini lelungile nalengakalungi. Akatsandzi kubona bantfu bahlupheka. LiBhayibheli litsi esikhatsini lesendlulile, Nkulunkulu “wadzabuka enhlitiyweni yakhe” nakabona bubi bugcwala emhlabeni wonkhe. (Genesisi 6:5, 6) Nalamuhla kusamvisa buhlungu loko. (Malakhi 3:6) LiBhayibheli litsi Nkulunkulu ukukhatsalela mbamba.—Fundza 1 Phetro 5:7.
LiBhayibheli lifundzisa kutsi Jehova unguMdali wako konkhe
12, 13. (a) Yini lesenta sitsandze labanye sibe nendzaba nabo, futsi siphatseka njani nasibona bubi nekuhlupheka? (b) Yini lesenta siciniseke kutsi Nkulunkulu utokucedza konkhe kuhlupheka kanye nebubi?
12 LiBhayibheli liphindze litsi Nkulunkulu wasidala saba ngumfanekiso wakhe. (Genesisi 1:26) Loko kusho kutsi Nkulunkulu usidale saba nebuntfu bakhe. Nangabe wena kukuvisa buhlungu kubona bantfu bahlupheka, kusho kutsi Nkulunkulu yena kumvisa buhlungu lobukhulu kakhulu! Sikwati ngani loku?
13 LiBhayibheli lisifundzisa kutsi “Nkulunkulu ulutsandvo.” (1 Johane 4:8) Konkhe lakwentako ukwenta ngoba usuke achutjwa lutsandvo. Natsi sinelutsandvo ngoba Nkulunkulu ulutsandvo. Ase ucabange ngaloku: Kube bowunemandla bowungeke yini ukucedze kuhlupheka nebubi lobugcwele emhlabeni? Bowungakucedza, ngoba uyabatsandza bantfu. Singatsini-ke ngaNkulunkulu? Yena unawo emandla futsi uyasitsandza, ngako-ke utakucedza kuhlupheka kanye nebubi. Ungaciniseka kutsi konkhe lasetsembise kona lokufundze ekucaleni kwalencwadzi utakufeza! Kudzingeka uchubeke ufundza ngaNkulunkulu kute ukhone kutetsemba letetsembiso.
NKULUNKULU UFUNA KUTSI UMATI
Nawufuna kutsi umuntfu abe ngumngani wakho umtjela ligama lakho. Nkulunkulu usitjela ligama lakhe eBhayibhelini
14. Ngubani ligama laNkulunkulu, futsi sati ngani kutsi kufanele silisebentise?
14 Yini intfo yekucala loyitjela umuntfu lofuna kuba ngumngani wakhe? Umtjela ligama lakho. Nkulunkulu unalo yini ligama? Bantfu labanyenti batsi ligama lakhe nguNkulunkulu nome Nkhosi. Kodvwa lawo akusiwo emagama akhe amane nje asho sigaba lakuso, njengalesitsi “nkhosi” nome “mengameli.” Nkulunkulu usitjelile kutsi ligama lakhe nguJehova. UmBhalo weTihlabelelo 83:18 utsi: “Shangatsi bangati kutsi nguwe wedvwa lolibito lakhe [linguJehova, NW], nguwe Losetikwako Konkhe, lophakeme abuse umhlaba wonkhe.” Leligama laNkulunkulu lasetjentiswa kanyenti nakusabhalwa liBhayibheli. Jehova ufuna ulati ligama lakhe futsi ulisebentise. Lokumente kutsi akutjele ligama lakhe kutsi ufuna ube ngumngani wakhe.
15. Lisho kutsini ligama lelitsi Jehova?
15 Leligama laNkulunkulu lelitsi Jehova linenchazelo lebanti. Lisho kutsi Nkulunkulu angenta noma yini layihlosile nalatsembise kuyenta. Kute lokungamvimba. Nguye kuphela longabitwa ngaleligama.a
16, 17. Kusho kutsini kutsi Jehova (a) ‘unguSomandla’? (b) ‘uyiNkhosi yaphakadze’? (c) ‘unguMdali’?
16 LomBhalo weTihlabelelo 83:18 utsite ngaJehova: “Nguwe wedvwa . . . Losetikwako Konkhe.” Sembulo 15:3 sitsi: “Mikhulu futsi iyamangalisa imisebenti yakho, Jehova Nkulunkulu, Somandla. Tilungile futsi tiliciniso tindlela takho, Nkhosi yaphakadze.” Kusho kutsini kutsi Jehova ‘unguSomandla’? Kusho kutsi Jehova unemandla lamakhulu kwendlula nome ngabe yini. Nakutsiwa ‘uyiNkhosi yaphakadze’ kusuke kuchazwa kutsi abevele akhona. UmBhalo weTihlabelelo 90:2 utsi abekhona “kusukela phakadze kuze kube phakadze.” Loko kusishiya sibambe longentasi!
17 NguJehova kuphela longuMdali. UmBhalo weSembulo 4:11 utsi: “Kukufanele Jehova Nkulunkulu wetfu kwemukela inkhatimulo, ludvumo, nemandla, ngobe wadala tonkhe tintfo, nangentsandvo yakho taba khona futsi tadalwa.” Jehova wadala konkhe longase ukucabange—kungaba tingilosi letisezulwini, tinkhanyeti letisesibhakabhakeni, titselo tetihlahla ngisho netinhlanti letiselwandle!
UNGAKHONA YINI KUBA NGUMNGANI WANKULUNKULU?
18. Yini leyenta labanye bantfu bacabange kutsi abayuze babe bangani baNkulunkulu? Kodvwa lifundzisani liBhayibheli ngaloko?
18 Labanye bantfu nabafundza ngebuntfu baNkulunkulu lobuhle bayesaba bese bacabanga kutsi, ‘Njengobe Nkulunkulu anemandla futsi akhashane kangaka, yini nje lengamenta abe nendzaba nami?’ Nkulunkulu ufuna sitive ngalendlela yini? Cha. Jehova ufuna kusondzela kitsi. LiBhayibheli litsi Nkulunkulu ‘akekho khashane kuloyo naloyo kitsi.’ (Imisebenti 17:27) Ufuna kutsi usondzele kuye futsi wetsembisa kutsi “naye utawusondzela” kuwe.—Jakobe 4:8.
19. (a) Yini lengakwenta kutsi ube ngumngani waNkulunkulu? (b) Yini loyitsandza kakhulu ngaNkulunkulu?
19 Yini lengasenta kutsi sibe bangani baNkulunkulu? Jesu watsi: “Kukwati wena lokuphela kwaNkulunkulu weliciniso naloyo lowamtfuma, lokunguJesu Khristu, kuholela ekuphileni lokuphakadze.” (Johane 17:3) Chubeka ufundza, loku kutakusita kutsi umati Jehova naJesu. Nawenta njalo ungatfola kuphila lokuphakadze. Sesifundzile kutsi “Nkulunkulu ulutsandvo.” (1 Johane 4:16) Kusekunengi lokuhle longakufundza mayelana nebuntfu bakhe. LiBhayibheli lisitjela kutsi Jehova ‘unesihawu nemusa; uyephuta kutfukutsela andze ngemusa nangekwetsembeka.’ (Eksodusi 34:6) Jehova “ulungile futsi ulungele kutsetselela.” (Tihlabelelo 86:5) Uyabeketela futsi wetsembekile. (2 Phetro 3:9; Sembulo 15:4) Usetawufundza lokunyenti lokuhle ngaye nawuchubeka ufundza liBhayibheli.
20-22. (a) Singasondzela njani kuNkulunkulu nangabe singamboni? (b) Yini lokufanele uyente nangabe kunalofuna kutsi uyekele kufundza liBhayibheli?
20 Ungasondzela njani kuNkulunkulu nangabe ungamboni? (Johane 1:18; 4:24; 1 Thimothi 1:17) Nawufundza ngaJehova eBhayibhelini, utawumati kahle futsi umtsatse njengemuntfu mbamba. (Tihlabelelo 27:4; Roma 1:20) Njengobe uchubeka ufundza ngaJehova, lutsandvo lwakho ngaye lutawukhula futsi usondzelane naye.
Babe wetfu losezulwini usitsandza kakhulu kwengca indlela umtali latsandza ngayo bantfwana bakhe
21 Utawubese uyabona kutsi Jehova unguBabe wetfu. (Matewu 6:9) Nguye losinikete kuphila, futsi ufuna sijabule. Nguloko babe lonelutsandvo langakufunela bantfwana bakhe. (Tihlabelelo 36:9) LiBhayibheli lifundzisa kutsi ungaba ngumngani waNkulunkulu. (Jakobe 2:23) Cabanga nje, Jehova longuMdali wako konkhe, ufuna kutsi wena ube ngumngani wakhe!
22 Labanye bantfu batawufuna kutsi uyekele kufundza liBhayibheli, ngobe besaba kutsi utawubese ushintja inkholo yakho. Kodvwa ungavumeli muntfu akuvimbele kutsi ube ngumngani waJehova. Kute umngani loyoke umtfole lofana naJehova.
23, 24. (a) Kubaluleke ngani kutsi uchubeke ubuta imibuto? (b) Sitawucoca ngani esehlukweni lesilandzelako?
23 Ungesabi kucela lusito noma kubuta nakukhona longakuva, ngoba tikhona tintfo longeke utive usafundza. Jesu watsi kufanele sititfobe njengebantfwana. (Matewu 18:2-4) Khumbula kutsi bantfwana babuta imibuto leminyenti. Nkulunkulu ufuna utfole timphendvulo temibuto lonayo. Ngako lifundzisise kahle liBhayibheli kute uciniseke kutsi loko lokufundzako kuliciniso.—Fundza Imisebenti 17:11.
24 Kufundza liBhayibheli nguyona ndlela letendlula tonkhe yekufundza ngaJehova. Esehlukweni lesilandzelako sitawufundza ngekutsi yini leyenta liBhayibheli lehluke kuletinye tincwadzi.