Bafundzi Banikwa Umoya Longcwele

Nasekuphele emalanga langu-10 Jesu abuyele ezulwini, bafundzi bakhe banikwa umoya longcwele. Loku kwenteka ngeliPhentekhoste la-33 C.E., ngesikhatsi bantfu labanyenti bahlangene eJerusalema. Bekunebantfu labangu-120 lebebahlangene ndzawonye endlini. Kwenteka simangaliso. Kwabonakala lokunjengemalangabi futsi kwahlala etikwemuntfu ngamunye, bonkhe base bakhuluma ngetilwimi letehlukahlukene. Masinyane, kwevakala umsindvo lonjengekuhhusha kwemoya lomkhulu, wagcwala lendlu.

Bantfu lebebavakashe eJerusalema beva lomsindvo futsi bagijima baya kulendlu kuze bayobona kutsi kwentekani. Bamangala kakhulu nabeva labantfu bakhuluma ngetilwimi tabo. Batsi: ‘Labantfu labakhulumako baseGalile. Pho kwentiwa yini kutsi bakhulume tilwimi tetfu?’

Phetro nalabanye baphostoli baJesu bema embikwalabantfu. Phetro wabatjela kutsi Jesu wafa njani nekutsi Jehova wamvusa ekufeni. Phetro watsi: ‘Nyalo Jesu usezulwini ngesekudla saNkulunkulu futsi usinike umoya longcwele njengobe abesitsembisile. Kungako nivile futsi nabona letimangaliso.’

Nabeva loku, labantfu batsintseka tinhlitiyo baze bambuta batsi: “Kufanele senteni?” Phetro wabaphendvula watsi: ‘Phendvukani etonweni tenu futsi nibhajatiswe egameni laJesu. Nitawuphindze nitfole sipho lesingumoya longcwele.’ Ngalelo langa kwabhajatiswa bantfu labacishe babe ngu-3 000. Kusukela ngalelo langa, bantfu labanyenti baba bafundzi eJerusalema. Umoya longcwele wasita baphostoli baJesu kutsi bamise emabandla lamanyenti kuze bachubeke bafundzisa bantfu loko Jesu abebayale ngako.