Gadzi Wasejele Uba NgumKhristu

EFiliphu bekunalenye intfombatana lesigcili lebeyinelidimoni. Lelidimoni belenta lentfombatana ikhone kuphengula futsi banikati bayo bebatfola imali lenyenti. Ngesikhatsi boPawula naSilasi bafika eFiliphu, yabalandzela emalanga lamanyenti. Lelidimoni layenta kutsi imemete itsi: “Lamadvodza atinceku taNkulunkulu Losetikwako Konkhe.” Pawula watsi kulelidimoni: ‘Egameni laJesu ngitsi phuma kuye!’ Lelidimoni laphuma kuyo.

Nababona kutsi litsemba labo lekutfola imali alisekho, labanikati balentfombatana bakwata kakhulu. Babamba Pawula naSilasi babahudvulela embikwebabusi, bafike batsi: ‘Lamadvodza ephula umtsetfo futsi ahlupha kakhulu lapha edolobheni lakitsi.’ Lababusi batsi boPawula naSilasi abashaywe bese bavalelwa ejele. Gadzi wasejele wabafaka esitokisini, wakhungela tinyawo tabo etigodvweni.

BoPawula naSilasi badvumisa Nkulunkulu ngetingoma, futsi letinye tiboshwa tatilalele. Ekhatsi nebusuku, kwatamatama umhlaba, yonkhe iminyango yasejele yavuleka, netinketane letatibabophile takhumuka kubo bonkhe. Nakavuka futsi abona kutsi iminyango yelijele ivulekile, logadzi wakhipha inkemba yakhe afuna kutibulala, ngobe abecabanga kutsi letiboshwa tibalekile.

Kusenjalo Pawula wamemeta watsi: ‘Ungatilimati, sikhona sonkhe!’ Logadzi wagijima wafike waguca embikwabo Pawula naSilasi. Wababuta watsi: “Yini lokufanele ngiyente kuze ngisindziswe?” Bamphendvula batsi: ‘Wena nemndeni wakho kufanele nikholwe yiNkhosi Jesu.’ Base bamfundzisa ngaJehova, futsi logadzi nawo wonkhe umndeni wakhe babhajatiswa.