Indlela 4
Khetsa Bangani Bakho Ngekuhlakanipha
LIFUNDZISANI LIBHAYIBHELI? “Lohambisana nebantfu labahlakaniphile naye ugcina asahlakaniphile.”—Taga 13:20.
INKINGA LEKHONA. Bangani betfu bangasenta senetiseke nobe singenetiseki. Simo sabo sengcondvo kanye netintfo labatikhulumako tiyawutsintsa umbono wetfu ngekuphila.—1 Khorinte 15:33.
Nasi sibonelo: Cabanga ngekulandzisa kweliBhayibheli kwemadvodza langu-12 labebuya eluhambeni lwaseKhenani. Linyenti lawo ‘lasakata umbiko lomubi esiveni sema-Israyeli ngalelive labeyawulihlola.’ Nangetulu kwalemibiko lemibi, emadvodza lamabili labekanye nawo akhuluma kahle ngeKhenani, atsi lelive “lihle kakhulu.” Nanobe kunjalo, simo sengcondvo lesibi saletinhloli letilishumi sasakateka kubo bonkhe bantfu. Lokulandzisa kutsi “bonkhe bantfu bakhihla sililo lesikhulu” futsi ‘onkhe ema-Israyeli acala kukhonona.’—Numeri 13:30–14:9.
Ngendlela lefananako nalamuhla, bantfu labanyenti “bati kukhonona nje nekusola yonkhe intfo.” (Juda 16) Kuyintfo lematima kwenetiseka nangabe uhlala nebangani labangakenetiseki.
YINI LONGAYENTA? Cabangisisa ngetintfo lenikhuluma ngato nebangani bakho. Bangani bakho bavame kutigabatisa ngetintfo labanato yini, nobe bavame kukhonona ngetintfo labete tona? Wena ungumngani lonjani kubo? Wetama kwenta bangani bakho bakufele umona yini, nobe ubakhutsata kutsi benetiseke ngaloko labanako?
Cabanga ngesibonelo lesabekwa nguDavide, lobekatawuba yinkhosi, kanye nesaJonathani, indvodzana yeNkhosi Sawula. Davide abephila njengembaleki ehlane. INkhosi Sawula beyicabanga kutsi Davide abefuna kutsatsa sikhundla sayo sekuba yinkhosi, ngako-ke, beyifuna kumbulala. Nanobe Jonathani bekufanele kube nguye inkhosi lelandzelako, waba ngumngani lomkhulu waDavide. Abecaphela kutsi Nkulunkulu abebeke Davide kutsi abe yinkhosi lelandzelako, futsi bekumenetisa kusekela umngani wakhe.—1 Samuweli 19:1, 2; 20:30-33; 23:14-18.
Nawe udzinga kuba nebangani labanjalo, labalwela kwenetiseka futsi labakufunela lokuncono kakhulu. (Taga 17:17) Ngako-ke, kute utfole bangani labanjalo, nawe kufanele ube naletimfanelo.—Filiphi 2:3, 4.
[Sitfombe ekhasini 7]
Bangani bakho bakwenta wenetiseke yini, nobe bakwenta ungenetiseki?