Kuphela Kwekuhlupheka Sekusedvute!
Asewuticabange uphila emhlabeni lote kuhlupheka—umhlaba longenabo bugebengu, timphi, kugula kanye netinhlekelele temvelo. Ticabange uvuka njalo ekuseni ungakhatsateki ngekubandlululwa, kucindzetelwa nobe kugucugucuka kwesimo semnotfo. Loku kubonakala kuyintfo lengeke seyenteke yini? Kuliciniso kutsi kute umuntfu nobe inhlangano yebantfu lengakhona kukwenta loku. Kodvwa Nkulunkulu wetsembisa kuticedza tonkhe tintfo letibangela kuhlupheka kwebantfu, lokuhlanganisa naleto lesicoce ngato esihlokweni lesendvulele. Asewunake letetsembiso letilandzelako letivela eVini laNkulunkulu, liBhayibheli:
KUBUSA KWEMBUSO LOLUNGILE
“Nkulunkulu welizulu uyawumisa umbuso longasoze wabhujiswa lutfo, futsi ngeke unikwe labanye bantfu. Uyawupitjita yonkhe leminye imibuso uyicedze, kodvwa wona uyawukuma kuze kube phakadze.”—Danyela 2:44.
UMbuso waNkulunkulu unguhulumende wasezulwini. UMbusi wawo lokhetsiwe, longuJesu Khristu, utawuyisusa yonkhe imibuso yebantfu futsi acinisekise kutsi intsandvo yaNkulunkulu ayentiwa ezulwini kuphela kodvwa yentiwa nasemhlabeni. (Matewu 6:9, 10) Lohulumende ngeke ususwe bohulumende bebantfu ngobe ‘unguMbuso waphakadze weNkhosi kanye neMsindzisi wetfu Jesu Khristu.’ Kuthula lokungapheli kutawuba yintfo lecinisekisiwe.—2 Phetro 1:11.
INKHOLO YEMANGA ITAWUPHELA
“NaSathane uchubeka atenta ingilosi yekukhanya. Akumangalisi-ke nangabe netinceku takhe tichubeka titenta tinceku tekulunga. Kodvwa siphetfo sato sitawuhambisana nemisebenti yato.”—2 Khorinte 11:14, 15.
Inkholo yemanga itawembulwa kutsi ingumsebenti waDeveli, futsi itawucedvwa emhlabeni. Kutawuphela konkhe kubandlulula kwenkholo kanye nekucitsa ingati. Loku kutawukwenta kutsi bonkhe labatsandza ‘Nkulunkulu lophilako neweliciniso’ bamkhonte ‘ngekukholwa kunye,’ “ngemoya nangeliciniso.” Kutawuba nekuthula nebunye!—1 Thesalonika 1:9; Efesu 4:5; Johane 4:23.
SONO SITAWUPHELA
“NaNkulunkulu utawuba nabo. Utawesula tonkhe tinyembeti emehlweni abo, kufa ngeke kusaba khona, nekulila, nekukhala kanye nebuhlungu, ngeke kusaba khona. Tintfo letindzala setendlulile.”—Sembulo 21:3, 4.
Jehova Nkulunkulu utawubangela kutsi loku kwenteke asebentisa iNdvodzana yakhe lenguJesu, leyanikela ngekuphila kwayo ngenca yebantfu. (Johane 3:16) Ngaphansi kwekucondzisa kwaJesu, bantfu batawubuyiselwa ekubeni bete sono. Ngeke kusaba khona kuhlupheka ngobe ‘Nkulunkulu utawuba nabo’ futsi utawutesula “tonkhe tinyembeti emehlweni abo.” Sono kanye nekuhlupheka kutawucedvwa ngekushesha; “labalungile bayawudla lifa lemhlaba, bahlale [kuwo, NW] kuze kube phakadze.”—Tihlabelelo 37:29.
IMIMOYA LEMIBI NGEKE ISABA KHONA
‘[Jesu Khristu] wambamba drago, inyoka yekucala, longuDeveli naSathane, wambopha iminyaka leyinkhulungwane. Wamjikijela kulomgodzi longenamkhawulo, wamvalela ngekhatsi wase ubeka luphawu kuze angasachubeki nekudukisa tive.’—Sembulo 20:2, 3.
Konkhe kuyenga kwaSathane kutawususwa ngesikhatsi yena nemadimoni akhe baboshwa futsi bajikwa ‘emgodzini longenamkhawulo,’ lokuyindzawo yekungenti lutfo. Ngeke basakwati kulawula kuphila kwebantfu. Kutawujabulisa kakhulu kuphila emhlabeni losewute kuyenga kwaSathane nekwemimoya lemibi.
“EMALANGA EKUGCINA” ATAWUPHELA
‘Emalanga ekugcina’ atawuphela nasekufika loko Jesu lakubita ngekutsi ‘kuhlupheka lokukhulu.’ Watsi: “Kutawuba nekuhlupheka lokukhulu lokungazange sekwenteke kusukela kwaba khona umhlaba, nalokungeke kuphindze kube khona.”—Matewu 24:21.
Lokuhlupheka kutawuba kukhulu ngobe ngaleso sikhatsi kutawukwenteka tinhlekelele letingakase setenteke. Konkhe loku kutawuphelela “emphini yelilanga lelikhulu laNkulunkulu Somandla” lebitwa ngekutsi “yi-Amagedoni.”—Sembulo 16:14, 16.
Bonkhe bantfu labatsandza lokulungile bayakulangatelela kuphela kwalelive lelibi. Asesibone letinye tetibusiso letibalindzele ngaphansi kweMbuso waNkulunkulu.
NKULUNKULU UTAWUKWENTA NALOKUNYE LOKWENGETIWE!
“Sicumbi lesikhulu” sitawusindziselwa emhlabeni lomusha lonekuthula: LiVi laNkulunkulu litsi “sicumbi lesikhulu” sebantfu lokute longasibala ‘sitawuphuma ekuhluphekeni lokukhulu,’ futsi siphile emhlabeni lomusha lonekulunga. (Sembulo 7:9, 10, 14; 2 Phetro 3:13) Insindziso yaso itawube ivela kuJesu Khristu, ‘loliWundlu laNkulunkulu lelisusa sono selive.’—Johane 1:29.
Kufundziswa nguNkulunkulu kutawuletsa tinzuzo letinkhulu: Eveni lelisha, “umhlaba uyawugcwala kwati [Jehova, NW].” (Isaya 11:9) Kufundziswa nguNkulunkulu kutawuhlanganisa ticondziso letimayelana nendlela yekuphila ngekuthula nalabanye bantfu kanye nemvelo. Nasi setsembiso saNkulunkulu: “NginguSimakadze Nkulunkulu wenu, longuyena anifundzisa kutsi ngukuphi lokuncono kunako konkhe kini, lonilayela indlela lekufanele nihambe ngayo.”—Isaya 48:17.
Bantfu lesibatsandzako labafile batawuvuswa emathuneni: Ngesikhatsi Jesu asemhlabeni, wavusa umngani wakhe Lazaro ekufeni. (Johane 11:1, 5, 38-44) Ngekwenta njalo, abeveta loko latawukwenta ngelizinga lelikhulu ngaphansi kweMbuso waNkulunkulu.—Johane 5:28, 29.
Kuthula nekulunga kutawuhlala phakadze: Nasekubusa Khristu, bubi butawuphela. Sikwati njani loko? Kungobe Jesu uyakwati kufundza tinhlitiyo futsi utawusebentisa lelikhono lakhe kute ehlulele labalungile nalabangakalungi. Labo labangatishintji tindlela tabo letimbi ngeke baphile emhlabeni lomusha waNkulunkulu.—Tihlabelelo 37:9, 10; Isaya 11:3, 4; 65:20; Matewu 9:4.
Kulesihloko sicoce ngetiphrofetho teliBhayibheli letimbalwa letisitjela ngesikhatsi lesihle lesisedvute. Ngaleso sikhatsi, uMbuso waNkulunkulu utawubusa emhlabeni, futsi ‘kuthula lokukhulu’ kutawuhlala phakadze. (Tihlabelelo 37:11, 29) Tonkhe tintfo letibangela buhlungu nekuhlupheka lokukhungetse bantfu titawucedvwa. Singaciniseka ngaloko ngobe Nkulunkulu uyasetsembisa: “Buka, ngenta tonkhe tintfo tibe tinsha. . . . Lamavi etsembekile futsi aliciniso.”—Sembulo 21:5.