Utsini Umbono WaNkulunkulu Ngekubhema?

Naku lokwashiwo nguNaoko lesikhulume ngaye esihlokweni sekucala mayelana nekuncoba kwakhe kubhema: “Ngakhona kushintja kuphila kwami ngenca yekufundza liciniso ngebunguye baNkulunkulu kanye nenjongo yakhe.” Loko lakufundza kutfolakala eBhayibhelini. Nanobe liBhayibheli lingakhulumi ngeligwayi, lisisita sicondze kutsi Nkulunkulu utsini ngekubhema.a Lolo lwati lusite bantfu labanyenti kutsi balwisane nalomkhuba nome bawuyekele. (2 Thimothi 3:16, 17) Ase sicoce ngetingoti letintsatfu tekubhema letatiwa kahle, nekutsi litsini liBhayibheli ngato.

KUBHEMA KUYANGENANA

Ligwayi linesidzakamiva lesinemandla lesenta lingayekeleki lesatiwa ngekutsi yi-nicotine. I-nicotine iniketa umuntfu emandla kwesikhashana iphindze imbangele nekucindzeteleka. Kubhema kuyisa i-nicotine engcondvweni ngekushesha nangalokuphindzaphindziwe. Njengobe kuhuba ligwayi kanye kufaka i-nicotine engcondvweni yemuntfu lobhemako, libhokisi linye leligwayi ngelilanga lifaka i-nicotine tikhatsi letingu-200, lokulizinga lelisetulu kakhulu kwendlula noma ngusiphi lesinye sidzakamiva. Kubhema ngalendlela kwenta umuntfu agcine asigcili se-nicotine kwendlula nobe ngusiphi lesinye sidzakamiva. Umuntfu nasangene shi kulomkhuba wekubhema, uba netiphawu letitsite nasekafuna kubhema.

LiBhayibheli lisisita kutsi sibe nembono longiwo ngalendzaba. Litsi: “Anati yini kutsi nangabe nitinikela kulotsite njengetigcili letilalelako, nisuke nitigcili taloyo muntfu lenimlalelako, kungaba tigcili tesono lesiholela ekufeni nobe tekulalela lokuholela ekulungeni?” (Roma 6:16) Nangabe kucabanga kwemuntfu netento takhe kulawulwa kukhanuka ligwayi, ngekushesha uba sigcili salomkhuba lomubi. Kodvwa-ke Nkulunkulu, libito lakhe lelinguJehova ufuna sikhululeke, hhayi nje kuphela emikhubeni lelimata imitimba yetfu, kodvwa nasemikhubeni lengcolisa umoya wetfu, lokuyindlela lesicabanga ngayo. (Tihlabelelo 83:18; 2 Khorinte 7:1) Kungako njengobe umuntfu achubeka atsandza futsi ahlonipha Jehova, uyacondza kutsi Jehova ufanelwe ngulokuncono kakhulu nekutsi angeke akhone kumniketa loko nangabe achubeka asigcili salomkhuba lobulalako. Kukubona loko kuniketa umuntfu emandla ekulwisana netifiso letilimatako.

Olaf lohlala lohlala eJalimane, nalowacala kubhema aneminyaka lengu-12 budzala, wancoba lomkhuba wekubhema ligwayi ngemuva kweminyaka lengu-16. Watsi: “Nangicala kubhema ligwayi bekungatsi yintfo lencane, kodvwa ngemuva kweminyaka kwaba yinkinga lenkhulu. Ngalelinye lilanga ngiphelelwe ligwayi, ngacindzeteleka kangangekutsi ngabutsa tonkhe tincamu teligwayi ngatihlanganisa ndzawonye, ngatigocota ngeliphepha ngase ngiyabhema. Nangicabanga ngako nyalo, sengiyabona kutsi kwakusimo lesibuhlungu.” Wawuncoba njani lomkhuba lomubi wekubhema? Watsi: “Lokungukona kwangisita sifiso sekujabulisa Jehova. Indlela Jehova labatsandza ngayo bantfu nelitsemba lasiniketa lona, kwangipha emandla ekutsi ngiwuncobe ngalokuphelele lomkhuba.”

KUBHEMA KULIMATA UMTIMBA

I-“Tobacco Atlas” itsi: “Bososayensi bayavuma kutsi kubhema ligwayi kulimata tonkhe titfo temtimba futsi kwandzisa ematfuba ekugula nekufa.” Kuyatiwa kutsi kubhema kubangela tifo letingatsatselwana letifaka ekhatsi umdlavuza, sifo senhlitiyo kanye netifo temaphaphu. Kodvwa ngekusho kwe-World Health Organization (WHO), kubhema kuphindze kube yimbangela lenkhulu yetifo letitsatselwanako, njengesifuba sengati (T.B.).

Asebentisa liVi lakhe liBhayibheli, Nkulunkulu Jehova usifundzisa kutsi sibe nembono longiwo ngekuphila kwetfu, umtimba wetfu kanye nendlela yetfu yekucabanga. Jesu, iNdvodzana yakhe, wakhuluma ngaloko ngesikhatsi atsi: “Kufanele utsandze Jehova Nkulunkulu wakho ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho.” (Matewu 22:37) Kuyasikhanyela-ke kutsi Nkulunkulu ufuna sikusebentise kahle kuphila kanye nemitimba yetfu, futsi sikuhloniphe. Njengobe sifundza ngaJehova nangetetsembiso takhe, sibese siyamtsandza futsi sikwatise konkhe lasentele kona. Loko kusibangela kutsi sibalekele nome ngabe yini lengcolisa imitimba yetfu.

Jayavanth, longudokodela eNdiya wabhema iminyaka lengu-38. Naku lakusho: “Ngafundza ngetingoti tekubhema etincwadzini tetekwelapha. Ngangati kahle kutsi kubhema akukalungi futsi ngangeluleka tigulane tami kutsi tiwuyekele lomkhuba. Kodvwa mine ngangehluleka, ngetulu kwekuzama tikhatsi letingaba sihlanu nobe sitfupha.” Yini leyagcine imsitile kutsi awuyekele lomkhuba? Nakachaza utsi: “Intfo leyangibangela kutsi ngiyekele kubhema, kuba nesifundvo seliBhayibheli. Sifiso sekujabulisa Jehova sangikhutsata kutsi ngiwuyekele ngekushesha lomkhuba.”

KUBHEMA KULIMATA LABANYE

Kuhogela intfutfu yeligwayi kuyingoti. Kuhogela lentfuftu kubangela umdlavuza naletinye tifo, futsi kubulala bantfu labangabhemi labangu-600 000 umnyaka ngamunye, ikakhulukati besifazane nebantfwana. Umbiko we-WHO ucwayisa ngaloku: “Alikho lizinga leliphephile lekuhogela intfuntfu yeligwayi.”

Ngekusho kwaJesu, kutsandza makhelwane, imindeni yetfu, bangani, kanye nebantfu lesiphila nabo, kungumyalo wesibili lolandzela kutsandza Nkulunkulu. Watsi: “Kufanele utsandze makhelwane wakho njengobe utitsandza wena.” (Matewu 22:39) Nangabe sichubeka nemkhuba lolimata bantfu lesisondzelene nabo, sisuke singakhombisi kutsi siyamtsandza makhelwane. Lutsandvo sibili lutawusenta silalele seluleko seliBhayibheli lesitsi: “Nguloyo naloyo akangatifuneli lokusita yena, kodvwa akachubeke afuna lokusita lomunye umuntfu.”​—1 Khorinte 10:24.

Armen, lohlala e-Armenia, nakakhumbula utsi: “Umndeni wami bewungincenga kutsi ngiyekele kubhema ngobe kwakubalimata. Kodvwa ngangingafuni kukuvuma kutsi kuyabalimata.” Nakachaza loko lokwamenta washintja umbono wakhe, utsi: “Kwati liBhayibheli nekutsandza Jehova kwangisita kutsi ngiyekele kubhema futsi ngikwemukele kutsi kwakungalimati mine nje kuphela kodvwa nebantfu lengiphila nabo.”

KUBHEMA KUCEDVWA SIPHELANE

Lwati lweliBhayibheli lwamsita Olaf, Jayavanth, na-Armen kutsi bawuyekele umkhuba lobewulimata bona kanye nalabanye bantfu. Lokwabasita akusiko nje kwati kutsi kubhema akukalungi, kodvwa bancoba ngenca yekutsandza Jehova kanye nesifiso sekumjabulisa. Indzima lebalulekile yelutsandvo igcizelelwa ku-1 Johane 5:3, lotsi: “Ngobe nguloku lokushiwo kutsandza Nkulunkulu, kutsi sigcine imiyalo yakhe; kantsi nemiyalo yakhe ayisiwo umtfwalo.” Kuliciniso kutsi kulandzela timiso teliBhayibheli akulula ngaso sonkhe sikhatsi, kodvwa umuntfu nakamtsandza mbamba Nkulunkulu, kumlalela angeke kube ngumtfwalo.

Asebentisa umkhankaso wekufundzisa emhlabeni wonkhe, Nkulunkulu Jehova nyalo usita tigidzi tebantfu kutsi tiwuyekele lomkhuba noma tingagcilatwa ligwayi. (1 Thimothi 2:3, 4) Masinyane nje, asebentisa uMbuso wakhe, lokunguhulumende wasezulwini loholwa yiNdvodzana yakhe Jesu Khristu, Jehova utawubhubhisa bosomabhizinisi labatizuzisa bona futsi lababangela tigidzi tebantfu kutsi tibe tigcili teligwayi. Utawucedza siphelane lomkhuba wekubhema losabalele umhlaba wonkhe, futsi abangele bantfu labalalelako kutsi babe nengcondvo kanye nemitimba lekahle.​—Isaya 33:24; Sembulo 19:11, 15.

Nangabe ungakhoni kuyekela kubhema, ungapheli emandla. Ngekufundza kutsandza Jehova nekwemukela umbono wakhe ngekubhema, nawe ungatfola sikhutsato losidzingako kuze uncobe. BoFakazi BaJehova bangakujabulela kukusita kutsi ufundze futsi usebentise timiso teliBhayibheli. Ciniseka kutsi nangabe ufuna Jehova akusite uyekele kuba sigcili seligwayi, yena utakuniketa emandla lowadzingako.​—Filiphi 4:13.