Ema-Easter avela enkholweni yebuKhristu yini?

Ku-Encyclopædia Britannica ema-Easter achazwa ngekutsi “sikhatsi lapho emasontfo ebuKhristu agubha khona kuvuka kwaJesu.” Kodvwa-ke ema-Easter avela enkholweni yebuKhristu yini?

Kuze utfole kutsi intfo letsite leyakhiwe ingiyo yini vele, kubalulekile kutsi uyihlolisise. Ngendlela lefanako, natsi kuze sitfole kutsi ema-Easter avela enkholweni yebuKhristu yini, kubalulekile kutsi sihlolisise imininingwane lemayelana nawo.

Kwekucala nje, Jesu watjela balandzeli bakhe kutsi bakhumbule kufa kwakhe, hhayi kuvuswa kwakhe. Lokukhunjulwa kwekufa kwaJesu, umphostoli Pawula wakubita ngekutsi “Sidlo SeNkhosi Sakusihlwa.”​—1 Khorinte 11:20; Lukha 22:19, 20.

Ngetulu kwaloko, i-Britannica itsi tintfo letinyenti letentiwa ngema-Easter “atihlobani” nekuvuswa kwaJesu, “kodvwa tivela emasikweni ebantfu.” Sibonelo saloku kutsi nayikhuluma ngelicandza nalogwaja, lokutintfo letisetjentiswa kakhulu kuma-Easter, i-The Encyclopedia of Religion itsi: “Licandza limelela kuphila lokuphuma kulesigogo salo (lesicinile) lesimelela kufa.” Nayichubeka itsi: “Logwaja bekatiwa ngekutsi usilwane lesitendlula tonkhe letinye tilwane ngekuba nentalo, futsi kungako umelela kungena kwentfwasahlobo.”

Lomunye phrofesa lokutsiwa nguPhilippe Walter, wachaza kutsi emasiko lanjengalawa angena njani emkhosini wema-Easter. Wabhala kutsi “ngesikhatsi tinkholo tebantfu labangamkhonti Nkulunkulu tifakwa enkholweni yebuKhristu,” kwaba melula kutsi umkhosi lebewugujwa “wekuphuma kwebusika kuya ekungeneni kwentfwasahlobo” uhlotjaniswe nekuvuswa kwaJesu. Walter nakachubeka utsi loku kwaba sinyatselo lesikhulu lesenta kutsi “imikhosi yebuKhristu” ingeniswe etinkholweni tebantfu labangamkhonti Nkulunkulu, futsi loku kwavula indlela yekutsi bantfu labanyenti bagucukele enkholweni yebuKhristu.

Lokufakwa kwetinkholo tebantfu labangamkhonti Nkulunkulu enkholweni yebuKhristu akwentekanga ngesikhatsi baphostoli basesekhona, ngobe bekufana nekutsi labaphostoli ‘bebavimbe’ letinkholelo talabantfu kutsi tingangeni ebandleni lebuKhristu. (2 Thesalonika 2:7) Umphostoli Pawula wecwayisa watsi: “Nasengihambile . . . kutawuvela emadvodza, akhulume tintfo letisontsekile kuze advonse bafundzi kutsi bawalandzele.” (Imisebenti 20:29, 30) Ekupheleni kwelikhulu lekucala, umphostoli Johane wabhala kutsi lamanye emadvodza abesavele adukisa emaKhristu. (1 Johane 2:18, 26) Ngako-ke kwasekumelula kutsi emasiko ebantfu labangamkhonti Nkulunkulu angene enkholweni yebuKhristu.

Kodvwa-ke labanye bangaba nemuva wekutsi kuvumela lamanye alamasiko ema-Easter kutsi angene enkholweni yebuKhristu bekungasikubi, ngobe bekwenta kutsi “labantfu labangamkhonti Nkulunkulu” bakucondze kahle kubaluleka kwekuvuka kwaJesu. Kodvwa Pawula abengeke avumelane naloko. Nanobe abephila nebantfu labalandzela lamasiko ngesikhatsi ahamba etindzaweni temaRoma, Pawula akazange emukele ngisho nalinye lalamasiko kuze nje ente bantfu bamcondze kahle Jesu. Kunaloko, wecwayisa emaKhristu, watsi: “Ningaboshelwa ejokeni linye nebantfu labangakholwa. Ngobe kulunga kunabudlelwane buni nekungalungi? Kukhanya kunabudlelwane buni nebumnyama? Jehova utsi: ‘Ngako-ke phumani kubo, nitehlukanise nabo, futsi ningatsintsi lutfo lolungcolile.’”​—2 Khorinte 6:14, 17.

Yini lesiyitfolile ngemuva kwekuhlola kafishane lemininingwane lemayelana nema-Easter? Kuyacaca kutsi ema-Easter akaveli enkholweni yebuKhristu.