Nangabe Uphetfwe Kugula Lokumatima

Linda loneminyaka lengu-71 utsi: “Nangiva kutsi nginesifo semdlavuza emaphashini nasesiswini, kwaba ngatsi ngitfole sigwebo sekufa. Nangifika ekhaya ngibuya kudokotela, ngabona kutsi akusinjengoba bengicabanga, kodvwa bekufanele ngitfole indlela yekubhekana nalesimo.”

Elise, loneminyaka lengu-49 utsi: “Nginesifo lesibuhlungu lesenta imiva yebuso yangesencele ihle ingasebenti. Ngaletinye tikhatsi, lobuhlungu bungenta ngikhatsateke. Tikhatsi letinyenti, ngitiva nginesitunge ngize ngicabange nekutibulala.”

Indvodza legulako lehleti esitulweni salabangakhoni kuhamba inetihlobo tayo

UCINDZETELEKA kakhulu nawutfola kutsi wena nome sihlobo sakho nigulela kufa nobe ninekugula lokungagcine kunibulele. Ngetulu kwekubhekana nebuhlungu bekugula, kudzingeka ulwisane nekusheshe ucansuke, kutfukutsela kanye nekucindzeteleka lokuhambisa nalokugula. Kwesaba nekukhatsateka kungakhuliswa kungcingca esibhedlela, bumatima bekutfola imitsi nekuyibhadalela, kanye nekutondvwa ngulomutsi lowusebentisako. Kukhatsateka engcondvweni lokuhambisana nalokugula kungakucindzetela.

Singalutfola kuphi lusito? Bantfu labanyenti batfole kudvudvuteka ngekuthantaza kuNkulunkulu kanye nangekufundza tincenye letidvudvutako eBhayibhelini. Lolunye lusito lungatfolakala ngekusekelwa bangani netihlobo letinelutsandvo.

INDLELA LABANYE LABASISINGETSE NGAYO LESIMO

Robert, loneminyaka lengu-58 weluleka utsi: “Singatsa simo sekugula lonako ngekukholwa kuNkulunkulu ngoba yena utakusita. Thantaza kuJehova. Mtjele indlela lotiva ngayo. Mcele akuphe umoya longcwele. Mcele akuphe emandla ekutsi ukhone kuchubeka ukhutsata umndeni wakho futsi uchubeke ubeketelela lesimo ngemoya lophansi.”

Robert uchubeka atsi: “Kusita kakhulu nangabe umndeni wakho ukusekela njengobe ubhekana nalesimo. Ngiyaye ngitfole tincingo letivela kubantfu labangibuta kutsi ‘Nginjani.’ Ngitfola tikhutsato kubangani bami labasetindzaweni letehlukahlukene. Lokukhutsatwa kungisita kakhulu kutsi ngingaphelelwa ngemandla ekulwa nalokugula.”

Linda nakeluleka umuntfu lovakashela logulako, utsi: “Lomuntfu logulako naye ufuna kuphila imphilo levamile, akafuni kukhuluma ngalokugula kwakhe ngaso sonkhe sikhatsi. Ngako coca ngetintfo benivamise kucoca ngato asengakaguli.”

Ngemandla lavela kuNkulunkulu nendvudvuto levela emiBhalweni, kanye nekusekelwa ngemalunga emndeni nebangani, singaciniseka kutsi kuphila kubalulekile ngisho nobe sibeketelela kugula lokumatima.

Emavesi EliBhayibheli Lalusito

Tsembela kuNkulunkulu.

“Ngakhuleka kuSimakadze, wangiphendvula, wangikhulula kuko konkhe kwesaba kwami. Ngangingumuntfu losihlupheki, ngakhala kuSimakadze, wangiva.”—Tihlabelelo 34:4, 6.

Linda, lesikhulume ngaye ekucaleni utsi: “Angikavami kuthantaza ngitsi, ‘Ngente ngibe ncono.’ Kunaloko ngivamise kutsi, ‘Ngiphe emandla, ungisite ngibeketelele kugula kwami.’”

Tfola emandla eVini laNkulunkulu.

“Kute . . . . loyakutsi: ‘Ngiyagula.’”—Isaya 33:24.

Cabangisisa ngetetsembiso taNkulunkulu letiphatselene nelikusasa kute ube nelitsemba utfole nemandla ekucinisela.

Cela lusito etihlotjeni takho nakubangani bakho.

“Umngani unelutsandvo ngaso sonkhe sikhatsi; kantsi umnakenu utalelwe kutsi netfwalisane naye tinhlupheko.”—Taga 17:17.

Elise, lesikhulume ngaye ekucaleni utsi, “Ungabi ngunkom’ idla yodvwa. Vumela bangani bakho kutsi bakusite. Kungenteka kube netikhatsi lapho utawuva shengatsi awunabani futsi naNkulunkulu akakulaleli, kodvwa ungabi ngunkom’ idla yodvwa.”