Ngiyakufanelekela Yini Kushumayela?
1. Kungani kungafaneli sitive shengatsi asikufanelekeli kushumayela?
1 Nangabe ngalesinye sikhatsi uke utibute lombuto, kute sidzingo sekutsi ukhatsateke. Asidzingi imfundvo lephakeme nobe likhono lelitsite lelikhetsekile kute sikufanelekele kushumayela. Labanye bebafundzi bekucala bebachazwa ngekutsi ‘bantfukatana nje labebangakafundzi.’ Nobe kunjalo, bebabafundzisi betindzaba letinhle labanelikhono, ngobe bebatimisela kulandzela sibonelo saJesu.—Imis. 4:13; 1 Phet. 2:21.
2. Yayinjani indlela yaJesu yekufundzisa?
2 Indlela Jesu Labefundzisa Ngayo: Timfundziso takhe tatimelula, tifanelana nebantfu labaphansi, futsi kumelula nekuticondza. Imibuto, imifanekiso, kanye netingeniso takhe letimelula tenta kutsi tilaleli takhe timnake. (Mat. 6:26) Abenenshisekelo lecotfo ngebantfu. (Mat. 14:14) Ngetulu kwaloko, Jesu abekhuluma ngekutetsemba nangeligunya, ngobe bekati kutsi Jehova umtfumile futsi wamupha nemandla ekwenta lomsebenti.—Luk. 4:18.
3. Jehova usisita njani kute sikwati kufeza inkonzo yetfu?
3 Jehova Uyasisita: Asebentisa liVi kanye nenhlangano yakhe, Umfundzisi wetfu Lomkhulu usiniketa kuceceshwa lesikudzingako kute sishumayele tindzaba letinhle ngemphumelelo. (Isa. 54:13) Ngenca yekutsi Jehova wasigcinela imibhalo yendlela Jesu labefundzisa ngayo, iyasisita kute sikwati kumlingisa. Jehova usiniketa umoya wakhe longcwele, futsi uyasicecesha ngemihlangano yelibandla. (Joh. 14:26) Ngakulokunye, usilungiselele bamemeteli labanalokuhlangenwe nako labangasisita kutsi natsi siphumelele kulomsebenti.
4. Kungani sinesizatfu sekutiva sikufanelekela kuhlanganyela tindzaba letinhle nalabanye?
4 Sinesizatfu lesicinile sekutiva sikufanelekela kushumayela, ngobe “emandla etfu avela kuNkulunkulu.” (2 Khor. 3:5) Njengobe setsembela kuJehova futsi sitisebentisa kahle letipho lasinikete tona, ‘sitawuhlonyiswa silungele kwenta wonkhe umsebenti lomuhle lesimiselwe wona.’—2 Thim. 3:17.