“Kudla Ngesikhatsi Lesifanele”
1. Umhlangano lokhetsekile lesisandza kwendlula kuwo ukusite njani wena kanye nalabanye?
1 Ngemuva kwekuya emhlanganweni lokhetsekile, sivamise kutsi sitsi: “Loku ngiko kanye lebesikudzinga.” Lomunye umbonisi wesifundza watsi ngemuva kwekulalela umhlangano lokhetsekile, labanye bantfu labasesifundzeni sakhe baveta sifiso sabo sekwandzisa indlela labahlanganyela ngayo emsebentini wekushumayela. Lomunye umbonisi lojikeletako watsi: “Lemihlangano isisita sibone kutsi sikuphi nesikhatsi, njengobe sihlola loko lesikukhetsako ekuphileni.” Kantsi lomunye watsi: “Bamemeteli labanyenti batsi lesi bekusikhumbuto sekutsi siciniseke kutsi sinaka kakhulu intfo lebalulekile, lokungumsebenti wekushumayela.” Wena ukusite njani umhlangano lokhetsekile?
2. Ngutiphi tihloko letitawube tidzingidvwa emhlanganweni lokhetsekile wemnyaka wemsebenti lolandzelako?
2 Umhlangano lokhetsekile wemnyaka lomusha wemsebenti utawuba nguloko kanye lesikudzingako. Sihloko sawo lesitsetfwe encwadzini yeTihlabelelo 118:8, 9 sitawube sitsi: ‘Phephela KuJehova.’ Nati letinye tihloko letitawube tidzingidvwa: “Indlela Jehova Lasiphephelo Ngayo Ngetikhatsi Tekucindzeteleka,” “Sita Labanye Baphephele Ngephansi Kwetimphiko TaJehova,” “Lingisa Jehova Ekuniketeni Siphephelo,” “Bantfu Labasha, Yentani Jehova Litsemba Lenu,” kanye nalesitsi “LiPharadisi Letfu Lakamoya—Indlela YaJehova Yekusivikela.”
3. Singazuza njani ngalokugcwele ngekuba khona emhlanganweni lokhetsekile?
3 Indlela Lesingazuza Ngayo: Naselimenyetelwe lilanga lemhlangano, hlela kutsi ube khona futsi umeme nebantfu lobafundzela liBhayibheli kutsi nabo babe khona. Kute sikwati ‘kutsela titselo ngekubeketela,’ kufanele sikulondvolote loko lesikuvako. (Luk. 8:15) Ngako-ke, lalelisisa, futsi ubhale emaphuzu layinhloko kanye naloko lohlela kukusebentisa ekuphileni kwakho nasemsebentini wekushumayela. Ngemuva kwemhlangano, banini nesikhatsi njengemndeni kute nicoce ngawo, bese nicabanga ngetindlela leticondzile leningakusebentisa ngako loko lenikufundzile.
4. Kungani kufanele siwulangatelele umhlangano lokhetsekile losondzelako?
4 Njengekudla lokulungiswe kahle futsi lokunemsoco, lomhlangano lokhetsekile ulungiswe ngelutsandvo futsi wacatjangelwa kusenesikhatsi. Shengatsi Jehova angayibusisa imetamo yenu yekutsi nibe khona kuwo futsi nizuze ‘kulokudla lokufike ngesikhatsi,’ kute kondle tikhonti letingemaKhristu ngekwakamoya.—Mat. 24:45.