Jehova Usiceceshela Kwenta Lomsebenti
1. Yini Jehova laphindze ayente nakaniketa bantfu sabelo lesitsite?
1 Nangabe Jehova aniketa bantfu umsebenti lotsite, uphindze abasite kute bawente kahle lowo msebenti. Nasi sibonelo: Ngalesikhatsi Jehova atjela Nowa kutsi akhe umkhumbi, lokuyitfo Nowa labengazange sekayente, waphindze wamtjela nendlela yekuwenta. (Gen. 6:14-16) Mosi, umelusi lomnene, watfunywa kutsi akhulume nemadvodza lamadzala aka-Israyeli kanye naFaro. Jehova wamcinisekisa: “Hamba nyalo! Ngiyawukusita nase ukhuluma, ngikutjele kutsi utawukhuluma utsini.” (Eks. 4:12) Natsi Jehova usiniketa ticondziso tekwenta umsebenti wekushumayela tindzaba letinhle. Usicecesha ngeSikolwa Semsebenti WemaKhristu kanye neMhlangano Wemsebenti. Singazuza njani kulokuceceshwa?
2. Singazuza njani eSikolweni Semsebenti WemaKhristu?
2 Sikolwa Semsebenti WemaKhristu: Ngembikwekuya emihlanganweni, tadisha kwatiswa kwalelo viki. Njengobe ubona indlela bafundzi labakusebentisa ngayo lokwatiswa etinkhulumeni tabo, utawukhona kutfutfukisa likhono lakho lekufundzisa. (Taga 27:17) Phatsa incwadzi letsi “ISikole Senkonzo” nawuya emhlanganweni futsi uyisebentise. Nangabe umbonisi wesikolwa akhulumela emaphuzu latsite lakuyo ngemuva kwenkhulumo yemfundzi ngamunye, dvwebela emaphuzu layinhloko lofuna kuwasebentisa futsi ubhale emaphuzu akho esikhaleni lesiseceleni. Indlela lekahle kakhulu yekuzuza kulesikolwa, kuhlanganyela kuso. Sewubhalisile yini kulesikolwa? Nawutfola sabelo senkhulumo, lungiselela kahle futsi usisebentise seluleko loniketwa sona. Nawusensimini, kusebentise loko lokufundzile.
3. Yini lesingayenta kute sizuze eMhlanganweni Wemsebenti?
3 Umhlangano Wemsebenti: Nangabe sikulungiselele kusenesikhatsi kwatiswa kwalomhlangano futsi silungiselele nekuphendvula, sitakukhumbula kahle lokushiwo kuwo. Kute nalabanye bakhone kuphendvula, kufanele sitente tibe timfisha timphendvulo tetfu. Nakisisa nakwentiwa imiboniso, futsi ukusebentise lokutfola kuyo locabanga kutsi kungakuphumelelisa ensimini. Gcina tihloko letinekwatiswa lokubalulekile te-Msebenti Wetfu WeMbuso, kute utisebentise esikhatsini lesitako.
4. Kungani kufanele sikusebentise kahle kuceceshwa lesikutfola kuJehova?
4 Njengemsebenti lowawuniketwe Nowa kanye naMosi, umsebenti wetfu wekushumayela tindzaba letinhle emhlabeni wonkhe, awusimelula. (Mat. 24:14) Sitawuphumelela ekwenteni lomsebenti nangabe setsembela kuJehova uMfundzisi wetfu Lomkhulu, futsi sikusebentise kahle kuceceshwa lasiniketa kona.—Isa. 30:20, NW.