Libhokisi Lembuto

◼ Kufanele yini kutsi uthandaze nawuchuba sifundvo usemnyango?

Tinyenti tinzuzo tekucalisa kanye nekuphetsa sifundvo seliBhayibheli ngemthandazo. Nasithandaza, sisuke sicela Jehova kutsi asinike umoya wakhe longcwele nasifundza. (Luk. 11:13) Umthandazo uphindze ugcizelele kubaluleka kwesifundvo kulabo lesibafundzelako futsi ubafundzisa nendlela yekuthandaza. (Luk. 6:40) Ngako-ke, kuyintfo lenhle kucala sifundvo ngemthandazo ngekushesha nasicala kufundza nemuntfu. Nanobe kunjalo, njengobe timo tendzawo tingafanani, lowo lochuba sifundvo kufanele asebentise kuhlakanipha nakacabangela kutsi utawuthandaza yini nakachuba sifundvo asemnyango.

Intfo lebaluleke kakhulu kucabangela indzawo lapho sichutjelwa khona lesifundvo. Nangabe kuyindzawo lethulile, kungentiwa umthandazo lomfishane ekucaleni nobe ekwephetseni kwesifundvo lesichubekako. Kodvwa-ke nangabe kwenta njalo kutawudvonsa emehlo ebantfu nobe kwente umfundzi ative angakhululeki, kungaba kuhle kulindza kute kube ngulapho leso sifundvo singachutjelwa endzaweni lekahle. Ngisho nobe sifundvo sichutjelwa kuphi, kufanele sehlulele kahle kute sibone kutsi singacalisa nini ngemthandazo.—Fundza Umsebenti Wetfu WeMbuso wa-March 2005, likhasi 4, ngesiZulu.