Imfanelo Lebaluleke Kakhulu Leyenta Umuntfu Abe Ngumfundzisi Lomuhle
1. Nguyiphi imfanelo lebaluleke kakhulu leyenta umuntfu abe ngumfundzisi lomuhle?
1 Yini leyenta umuntfu abe ngumfundzisi weliBhayibheli lomuhle? Yimfundvo, lokuhlangenwe nako, nobe emakhono latalwe nawo? Empeleni, lokwenta umuntfu abe ngumfundzisi lomuhle yimfanelo lephelelisa uMtsetfo, leyenta bafundzi baJesu babonakale kanye nalegcamile etimfanelweni taJehova letiyinhloko. (Joh. 13:35; Gal. 5:14; 1 Joh. 4:8) Leyo mfanelo lutsandvo. Umfundzisi lomuhle uyabatsandza bantfu.
2. Kungani kubalulekile kutsandza bantfu?
2 Batsandze Bantfu: Jesu, uMfundzisi Lomkhulu, bekabatsandza bantfu, futsi loku kwenta kutsi bamlalele. (Luk. 5:12, 13; Joh. 13:1; 15:13) Nangabe siyabatsandza bantfu, sitawusebentisa onkhe ematfuba lavelako kute sishumayele. Lushushiso kanye nekunganakwa angeke kusicedze emandla. Sitawubakhatsalela ngebucotfo bantfu lesishumayela kubo, futsi sitawushintja inshumayelo yetfu kute ivumelane netimo tabo. Sitawukulungela kucitsa sikhatsi hhayi kuphela nasinebantfu lesifundza nabo liBhayibheli kodvwa nalapho silungiselela sifundvo ngasinye lesitawusichuba.
3. Kutsandza emaciniso eliBhayibheli kutawusisita njani nasishumayela?
3 Watsandze Emaciniso EliBhayibheli: Jesu bekawatsandza emaciniso eliBhayibheli futsi awatsatsa njengalaligugu. (Mat. 13:52) Nangabe siyawatsandza emaciniso, sitawukhuluma ngemdlandla, kanye nangendlela letawuvusa lilukuluku kubantfu labasilalele. Lutsandvo lolunjalo lutawusisita kutsi sinake loko lesikufundzisa bantfu hhayi emakhono etfu. Loku kutawusisita kutsi singabi neluvalo.
4. Singalwakha njani lutsandvo?
4 Yakha Lutsandvo: Singalwakha njani lutsandvo ngebantfu? Ngekuzindla ngelutsandvo Jehova kanye neNdvodzana yakhe labasikhombise lona kanye nangesimo lesibucayi bantfu ensimini yetfu labakuso. (Mak. 6:34; 1 Joh. 4:10, 11) Lutsandvo lwetfu ngemaciniso eliBhayibheli lutawukhula nangabe sihlale siba nesifundvo lesitichubela sona futsi sizindla. Lutsandvo luyincenye yetitselo temoya. (Gal. 5:22) Ngako-ke singamcela Jehova kutsi asiphe umoya wakhe longcwele futsi asisite sikhulise lutsandvo lwetfu. (Luk. 11:13; 1 Joh. 5:14) Ngisho nobe kungatsiwa sifundzile nobe cha, sesinesikhatsi lesidze ecinisweni nobe cha futsi sinemakhono lamahle, singaba bafundzisi labahle ngekutsi sibatsandze bantfu.