Tindlela Letinsha Tekushumayela Etindzaweni Letiphitsitelako
1. Ngusiphi sibonelo emaKhristu angelikhulu lekucala lasibekela sona?
1 EmaKhristu angelikhulu lekucala enta lokungetulu kwekumane ashumayele umuti nemuti. Abephindze ashumayele etitaladini. (Imis. 20:20) Nasi sibonelo: Aya emathempelini lapho abati kutsi bantfu batfolakala khona. (Imis. 5:42) Ngalesikhatsi ase-Athene, umphostoli Pawula abeshumayela malanga onkhe kulabo labebasetinkhundleni. (Imis. 17:17) Lamuhla, indlela leyinhloko lesiyisebentisako ekusakateni tindzaba letimnandzi, kushumayela emtini nemuti. Nobe kunjalo, siyaya etindzaweni tekupaka timoto, etindzaweni temabhizinisi, emapaki, etitaladini letiphitsitelako nakuletinye tindzawo kute sishumayele bantfu nobe ngukuphi lapho batfolakala khona. Ngisho nome bonkhe bamemeteli bakhutsatwa kutsi bashumayele kuleto tindzawo, labanyenti batawuba nelitfuba lekusebentisa tindlela letimbili letinsha tekushumayela etindzaweni letiphitsitelako.
2. Nguyiphi indlela lensha yekushumayela leyacala nga-November 2011?
2 Indlela Lekhetsekile Yekushumayela Etindzaweni Letiphitsitelako: Njengobe kubikiwe ekhasini 16 na-17 lencwadzi letsi “INcwadi Yonyaka” ya-2013, kwacalwa lenye indlela yekushumayela etindzaweni letiphitsitelako nga-November 2011, eNew York City. Kwabekwa litafula lelinemakhadi ekukhangisa ngetincwadzi tetfu kanye netincwadzi letingetilwimi letehlukehlukene emadolobheni lanebantfu labaphitsitelako. Malanga onkhe, tinkhulungwane tebantfu tendlula lapho, lokufaka ekhatsi bantfu labahlala etakhiweni boFakazi labangakavumeleki kungena kuto nebantfu labangakavami kuhlala emakhaya. Banyenti kakhulu bantfu labakutsandza loko. Ngenyanga yinye nje, kwahanjiswa bomagazini labangu-3 797 netincwadzi letingu-7 986. Bantfu labanyenti labendlula lapho bacela tifundvo teliBhayibheli. Njengobe bekugcizelelwa kakhulu kucaliswa kwetifundvo teliBhayibheli, onkhe emakheli labeshiywa bantfu labatsandza kufundza abetfunyelwa emabandleni lafanele kute bavakashelwe.
3. Lendlela lensha yekushumayela yandziswa njani?
3 Ngenca yekuphumelela kwalendlela lensha yekushumayela, lendlela seyitawentiwa emhlabeni wonkhe etindzaweni letinebantfu labaphitsitelako. Ligatja lakulelo live litawukhetsa kutsi ngumaphi emadolobha langaba nemiphumela lemihle. Ngalokuvamile, lawa kuba ngemadolobha lanetiteshi tetintfo tekuhamba nome lanemahhovisi lamanyenti nome lanetakhiwo letiba nebantfu labanyenti. Ngemuva kwaloko lihhovisi leligatja litawubhalela emabandla latawuba nencenye kulomsebenti futsi liwanike naletinye ticondziso. Imvamisa kusetjentiswa emahlahlandlela lavamile nalakhetsekile, ngisho nome kuletinye tindzawo nemahlahlandlela lasitako aba nayo incenye kulomsebenti.
4. Kwentiwa njani kushumayela ngalokukhetsekile etindzaweni letiphitsitelako?
4 Wentiwa Njani Lomsebenti Wekushumayela: Labo labashumayela ngalokukhetsekile etindzaweni letiphitsitelako bavame kumela kutsi lotsite ete kulelo tafula nobe kuloko lokukhangiswako. Umuntfu nakasondzela lapho, ukhutsatwa kutsi atsatse nobe nguyiphi incwadzi layitsandzako. Lamahlahlandlela ayakujabulela kusebentisa imiBhalo kute aphendvule nobe ngumiphi imibuto langaba nayo. Nangabe lomuntfu atsatsa incwadzi, lamahlahlandlela awakhulumi ngelilungiselelo lekunikela. Kodvwa nangabe uyabuta kutsi umsebenti wetfu usekelwa njani ngetimali, atamchazela kutsi iminikelo ingatfunyelwa kulelikheli lelivela kuleyo ncwadzi. Nangabe kungenteka, bangambuta kutsi: “Ungatsandza yini kutsi kube nemuntfu lotakuvakashela ekhaya lakho?” nobe kutsi: “Bewati yini kutsi ngaphandle nje kwalencwadzi siphindze sibe netifundvo teliBhayibheli tamahhala?”
5. Kubazuzise njani labanye bantfu labashadene kuhlanganyela kulendlela lensha yekushumayela?
5 Kusebentisa lendlela kube nemvuzo lomkhulu. Labanye bantfu labashadene batsi: “Kuma eceleni kwalelitafula futsi ubone tinkhulungwane tebantfu tendlula lapho onkhe malanga kusente sabona kutsi mkhulu kangakanani umsebenti lowentiwako wekufundzisa bantfu emhlabeni wonkhe. Kusibona lesicumbi sebantfu nekucabanga nangendlela Jehova lakhatsalela ngayo umuntfu ngamunye, kusikhutsate kutsi sitsatse lomsebenti wekushumayela njengalobaluleke kakhulu ekuphileni kwetfu. Simbona ngemehlo engcondvo Jehova ahlolisisa tinhlitiyo tebantfu labendlula ngakulelitafula afuna kutfola labafanelekako. Asikaze sitive sisebentisana edvute kangaka netingilosi!”
6. (a) Nguyiphi lenye indlela yekushumayela etindzaweni letiphitsitelako lehlelwa emabandleni lamanyenti futsi yehluke njani kulena lokutsiwa yindlela lekhetsekile yekushumayela etindzaweni letiphitsitelako? (b) Emabandla angabambisana njani nawashumayela etindzaweni letinetiphitsiphitsi?
6 Kushumayela Etindzaweni Letiphitsitelako Lokuhlelwe Tigungu Talabadzala: Ngetulu kwekushumayela lokukhetsekile kwasetindzaweni letiphitsitelako, kunalenye indlela lehlelwa tigungu talabadzala yekushumayela kuleto tindzawo lokwentiwa ensimini yelibandla. Ngalendlela, bamemeteli basebentisa litafula nobe incola lenetintfo tekukhangisa ngetincwadzi tetfu leba sendzaweni lephitsitelako kepha ibe sensimini yelibandla. Lendlela yehlukile kulena lekhetsekile yekushumayela etindzaweni letinetiphitsiphitsi lesetjentiswa bamemeteli labesuka emabandleni lehlukehlukene labete kutewushumayela kuto letindzawo letiphitsitelako letisemadolobheni lakhetfwe lihhovisi leligatja.—Fundza libhokisi lelitsi “Kudzingeka Kubambisana.”
7. Labadzala batayihlela njani indlela yekushumayela etindzaweni letiphitsitelako ensimini yelibandla labo lapho ingasebenta khona?
7 Labadzala kufanele bakucabangele kutsi libandla linayo yini incenye yensimu lenesiphitsiphitsi bese bayabuka kutsi kungahlelwa yini kutsi kusetjentiswe lendlela lensha yekushumayela. Tindzawo lapho kungasetjentiswa kuto lelitafula nome lencodlana yekukhangisa tincwadzi tetfu tifaka ekhatsi tindzawo lapho bantfu bagibelela khona tintfo tekuhamba, tindzawo letisekhatsi nelidolobha lapho bantfu bahlanganela khona, emapaki, etitaladini letiphitsitelako, etindzaweni letinetitolo letinyenti (shopping malls), etindzaweni letinetindlu tekuhlala bafundzi basemakolishi, etikhumulweni tetindiza nasetindzaweni tekugubha imicimbi lemikhulu. Kuhle kuhlale sibeka lelitafula endzaweni yinye, ngemalanga lafananako ngisho nangetikhatsi letifananako. Kutfolakale kusebenta kahle kubeka lelitafula etindzaweni letinetitolo letinyenti kunekutsi libekwe ngephandle kwesitolo sinye nje lesikhulu lapho bantfu betele kutewutsenga kuso bese bayahamba. Letinye tindzawo letifanana netindledlana letiphitsitelako tingavumela kuphela lencodlana yekukhangisa ngetincwadzi tetfu. Labadzala bangatsatsa emafayela lakhetsekile ekukhangisa Sicongosekulindza, i-“Phaphama!” nencwadzi letsi Lokufundziswa LiBhayibheli, ku-Web site yetfu. Lamafayela entiwe ngalokukhetsekile kute asetjentiswe kulendlela yekushumayela endzaweni lenetiphitsiphitsi. Labo labahlanganyela kulomsebenti batawenta ngendlela lefanana neyalabo labasebentisa lelekhetsekile yekushumayela etindzaweni letiphitsitelako futsi kufanele basilandzele edvute sicondziso sembonisi wemsebenti. Nangabe batfola likheli lemuntfu lotsandza kufundza kepha longahlali ensimini yabo, kufanele baligcwalise ngekushesha lifomu lelitsi “Siza Ulandelele” (S-43) bese balinika mabhalane welibandla.
8. Nangabe tingekho tinhlelo telibandla tekushumayela etindzaweni letiphitsitelako, ngumaphi lamanye ematfuba ekushumayela kuto lasolo akhona?
8 Yenta Umsebenti Wakho Wekushumayela Nasetindzaweni Letiphitsitelako: Lamanye emabandla kungenteka ete tindzawo ensimini yawo letinebantfu labanyenti letingavumela kusetjentiswa kwalelitafula nome lencodlana yekukhangisa tincwadzi tetfu. Nobe kunjalo, ngisho nakulawo mabandla bamemeteli bakhutsatwa kutsi bashumayele nasetindzaweni letiphitsitelako. Ikhona yini indzawo lapho kutsengwa khona tintfo nome indzawo yemabhizinisi ensimini yenu? Ikhona yini indzawo leyipaki nome indzawo lapho bantfu bahlanganela kuyo? Ikhona yini imicimbi levame kuba khona ensimini yenu? Nangabe kunjalo, ungachubeka ujabulela kushumayela etindzaweni letiphitsitelako.
9. Yini lokufanele isente sikunake kakhulu kushumayela kubantfu nobe ngukuphi lapho batfolakala khona?
9 Kuyintsandvo yaJehova kutsi “bonkhe bantfu basindziswe bafinyelele ekulatini liciniso.” (1 Thim. 2:4) Ngako-ke, setama kutsi umlayeto weMbuso ufike kubantfu labanyenti kakhulu kusengakafiki kuphela. (Mat. 24:14) Etindzaweni letinyenti, kuba yinsayeya kutfola bantfu emakhaya. Nobe kunjalo, singakhona kukhuluma nabo nabangekho emakhaya basetindzaweni letinebantfu labanyenti. Kushumayela etindzaweni letiphitsitelako kungaba kuphela kwendlela lengenta labanye bantfu batfole litfuba lekuva tindzaba letimnandzi. Ngako-ke, shengatsi singawufeza umsebenti wetfu ngekushumayela kubantfu nobe ngukuphi lapho batfolakala khona.—2 Thim. 4:5.
[Libhokisi ekhasini 5]
Kudzingeka Kubambisana
Kutfolakale umbiko wekutsi ngaletinye tikhatsi labanye bamemeteli bashumayela esitaladini sinye, epaki yinye, madvutane nendzawo yinye yelibhizinisi nobe endzaweni yinye lesekhatsi nelidolobha lapho bantfu bagibelela khona tintfo tekuhamba. Bamemeteli labesuka emabandleni lehlukahlukene bahambise bomagazini endzaweni yinye lapho bantfu babutsanela khona, etiteshini tetintfo tekuhamba, endzaweni lapho bantfu bawashela khona timphahla, futsi bashumayela endzaweni yinye yemabhizinisi. Ngaletinye tikhatsi loku kuyabacansula bosomabhizinisi nabomakhelwane, ngisho nome bamemeteli bangashumayeli kuleyo ndzawo ngesikhasi lesifananako. Ngako-ke kuncono kakhulu kutsi nasishumayela etindzaweni letiphitsitelako kube sensimini leyabelwe libandla letfu.
Nangabe bamemeteli bafisa kushumayela kuletindzawo letisensimini yalelinye libandla, kufanele bacale ngekukhuluma nembonisi wemsebenti losebandleni labo. Yena utawutsintsana nembonisi wemsebenti wakulelo bandla kuze atfole imvume ngaphambi kwekutsi labamemeteli labasebandleni lakhe baye lapho. Nakwenteka kuba nalamanye emabandla lakhuluma letinye tilwimi nawo labelwe kusebenta leto tindzawo, babonisi bemsebenti kufanele bacocisane ngaloko kuze loko kungabacansuli bomakhelwane ngalokungenasidzingo. Ngekubambisana kahle, tonkhe tintfo tingenteka “kahle ngenhlelembiso.”—1 Khor. 14:40.
[Sitfombe ekhasini 6]
[Sitfombe ekhasini 6]