Luchungechunge Lwetihloko Lolusisita Ensimini
1. Loluchungechunge lolutsi “Incociswano Namakhelwane” luhloselwe tiphi tinjongo letimbili?
1 Ku-Sicongosekulindza lesihanjiswako, kuvame kuba nesihloko lesitsi “Incociswano Namakhelwane.” Loluchungechunge luhloselwe nati tinjongo letimbili: Kwetfula timfundziso teliBhayibheli ngendlela yekutsi lococa naye akulalele kanye nekusikhombisa indlela yekucoca nebantfu ngesihloko lesitsite ngaphandle kwekubacansula. (1 Phet. 3:15) Singatisebentisa njani letihloko?
2. Singalusebentisa njani loluchungechunge lwetihloko ensimini?
2 Tisebentise Ensimini: Ungase ugcine emakhophi latsite e-Sicongosekulindza lanaletihloko letiluchungechunge. Nangabe lococa naye, lotsandza kufundza nome lofundza naye liBhayibheli abuta umbuto nome akhuluma ngendzaba levelile kulesinye saletihloko, mnikete ikhophi lenaleso sihloko bese uhlela kutsi nicoce ngaso. Nangabe ute, mhlawumbe ungatitsatsela yona ku-jw.org/ss.
3. Singahle sisisebentise njani lesinye saletihloko nasicoca nalotsite?
3 Ungahle usisebentise njani lesinye saletihloko nawucoca nalotsite? Labanye baye bacele loyo muntfu kutsi afundze ngalokuvakalako emavi amakhelwane kulesihloko, bona bafundze emavi aFakazi. Lencociswano ingase ibe lusito ngobe ivumela lococa naye kutsi ahlolisise timfundziso tetfu ngendlela letamenta akhululeke.—Dut. 32:2.
4. Singatisebentisa kanjani letihloko letiluchungechunge kute siticeceshe?
4 Ticeceshe Wena Nalabanye: Nawufundza letihloko, naka imibhalo, imifanekiso nendlela lekucociswana ngayo. Naka emagama lasetjentisiwe kuleso sihloko bese wetama kusebentisa leyondlela ensimini. (Taga 1:5; 9:9) Lomunye dzadze watsi: “Kufundza letihloko kufana nekufundziswa lihlahlandlela lohamba nalo ‘lelinelikhono,’ lelihlale likulungele kuphendvula ngendlela lefanele.”
5. Singabasita kanjani lesifundza nabo liBhayibheli kutsi balungele kushumayela?
5 Ungase usebentise tibonelo letikulesihloko kute usite lofundza nabo liBhayibheli kutsi balungele kuyoshumayela. Tifundzeni ndzawonye letihloko, umfundzi abe ngummemeteli. Ngaleyo ndlela, bafundzi beliBhayibheli bangaphrakthiza kukhuluma ngaloko labakukholelwako ngendlela lefanele. (Khol. 4:6) Asingabati kutsi letihloko tingulenye yetindlela Jehova lasisita ngayo kutsi ‘siwente kahle’ umsebenti wetfu.—2 Thim. 4:5.