Inyanga Yanga-August Itawuba Yincophamlandvo!
Lipheshana Lelisha Litawusakatwa Emhlabeni Wonkhe
1. Ngumuphi umkhankaso lokhetsekile lotawuba khona njengobe sisondzela eminyakeni lelikhulu uMbuso waNkulunkulu wacala kubusa?
1 Iyasondzela iminyaka lelikhulu uMbuso waNkulunkulu wacala kubusa. Ngako kuyafaneleka kutsi sibonge Jehova ngemkhankaso lokhetsekile. Nga-August, sitawuba nemkhankaso wemhlaba wonkhe wekuhambisa lipheshana lelisha lelinesihloko lesitsi Singatitfolaphi Timphendvulo Temibuto Lesikhatsatako Ekuphileni? Lelipheshana litawukhutsata labo labatalifundza kutsi batfole timphendvulo eBhayibhelini liphindze libachazele indlela i-jw.org lengabasita ngayo.
2. Singasifaka njani sandla ‘ekudvumiseni Jehova ngekumemeta lokukhulu’ ngenyanga yanga-August?
2 Kumemeta Lokukhulu Kwekudvumisa: Kute kusitwe bamemeteli bandzise sikhatsi sabo emsebentini wekushumayela, kunelilungiselelo lelikhetsekile lelentelwe labo labafisa kuba ngemahlahlandlela lasitako nga-August. Kuleyo nyanga, bamemeteli lababhajatisiwe batawukhona kuba ngemahlahlandlela lasitako babike ema-awa langu-30. Njengobe inyanga yanga-August inaboLesihlanu, iMigcibelo kanye nemaSontfo lasihlanu, bamemeteli labanyenti labasebentako noma labaya esikolweni emkhatsini weliviki batawukhona kuba ngemahlahlandlela lasitako. Nangabe unesifundvo seliBhayibheli lesesitfutfukile nobe unemntfwana lofisa kuba ngummemeteli, khuluma nemchumanisi wesigungu salabadzala ngekushesha. Batawukhutsateka laba kutsi babe bamemeteli kanye natsi kulenyanga lebaluleke kangaka. Emahlahlandlela lamanyenti lavamile avama kuphumula emalanga latsite enyangeni ya-August ngemuva kwekugcwalisa umgomo wemnyaka. Nome kunjalo, kungase kudzingeke kutsi ashintje luhlelo lwawo kute ahlanganyele kulomkhankaso lokhetsekile. Nyalo sikhatsi sekutsi imindeni icoce ngekutsi ‘itamdvumisa kanjani Jehova’ ngenyanga yanga-August.—Ezra 3:11; Taga 15:22.
3. Sinelitsemba lekutsi kutakwentekani ngalomkhankaso lokhetsekile?
3 Nanobe eminyakeni leyendlulile sike saba nemikhankaso lefana nalona kodvwa siyetsemba kutsi lona utawuba yincophamlandvo. Singakwati yini kufinyelela emanani lamasha ema-awa, bamemeteli kanye nemahlahlandlela lasitako ngenyanga yanga-August? Njengobe sitawube sicedza umnyaka wemsebenti wanga-2014, shengatsi Jehova angabusisa imetamo yebantfu bakhe emhlabeni wonkhe kute kulenyanga yanga-August bashumayele ngelizinga lelikhulu kakhulu kunanini ngaphambili.—Mat. 24:14.