Tikhumbuto Temhlangano Wesifundza

Tikhatsi Teluhlelo: Emagede enkhundla yemhlangano atawuvulwa nga-7:00 ekuseni. Umculo wangaphambi kwekucala kweluhlelo lwemhlangano utawucala nga-9:00 ekuseni kuwo omatsatfu emalanga. Ngaleso sikhatsi, sonkhe kufanele sihlale phansi kute luhlelo lucale ngendlela lehloniphekile. NgaLesihlanu nangeMgcibelo ingoma yekwephetsa nemthantazo kutawetfulwa nga-4:35 entsambama kantsi ngeLisontfo kutawetfulwa nga-3:25 entsambama.

‘Bonga Jehova Ngengoma’: Endvulo bantfu baNkulunkulu bebabonga Jehova ngetingoma futsi umculo usadlala indzima lebalulekile ekukhonteni kweliciniso nalamuhla. (Hla. 28:7) Ngembikwekutsi kucale luhlelo ngalunye lwemhlangano wesifundza kuba nemculo lodlalwako. Lona akusiwo nje umculo lomane udlalwe, kodvwa wentelwe kutsi sitewufundza ngaJehova futsi simkhonte. Ngako-ke sihlalo nakasitjela kutsi lomculo sewutawucala, leso kusuke kusikhatsi sekutsi sihlale phansi futsi siwulalelisise. Nasenta njalo sitawukhombisa kutsi siyakubona kubaluleka kwemetamo leyentiwa licembu lebazalwane nabodzadze labadlala letinsimbi talomculo. Kabili ngemnyaka, labazalwane nabodzadze bacitsa timali tabo baye ePatterson, eNew York, kute bayokwenta lomculo lomnandzi kangaka. Ngemuva kwekulalelisisa lomculo wangaphambi kwekucala kweluhlelo, sonkhe kufanele sibese sihlanganyela ndzawonye ekudvumiseni Jehova ngekuhlabela tingoma teMbuso.

Tindzawo Tekupaka: Kuto tonkhe tindzawo temhlangano lesiniketwe ligunya lekupaka kuto, kutawupakwa mahhala, futsi letindzawo titawutfolwa ngibo bonkhe labete emhlanganweni kuye ngekutsi ngubani lofike kucala. Njengobe esikhatsini lesinyenti tindzawo tekupaka tiba tincane, kungaba kuhle kutsi sigibele nalabanye emotweni kunekutsi nguloyo ahambe ngemoto yakhe. Etindzaweni tekupaka letilungiselelwe labakhubatekile kutawuvunyelwa kuphela labo labanetigcebhezana tekupaka lapho.

Kubeka Indzawo Yekuhlala: Nakuvulwa emagede endzaweni yemhlangano njalo ekuseni, sicela ningagijimi kube shengatsi seniyancintisana naniyobeka tindzawo. Sicela kutsi sicabangele labanye, ngisho nobe loku kungasho kutsi tsine asisayitfoli indzawo lebesiyifuna. Kutidzela lokusenta sifise kwentela labanye lokuhle, ngiko lokusiveta njengemaKhristu eliciniso futsi kwente nalabasibukile badvumise Nkulunkulu. (Joh. 13:34, 35; 1 Khor. 13:5; 1 Phet. 2:12) Indzawo ungayibekela kuphela labo lohamba nabo emotweni nobe labo lohlala nabo ekhaya kanye nalabo lobachubela tifundvo teliBhayibheli. Sicela ningabeki tintfo etitulweni leningeke nitisebentise. Loku kutawenta kutsi labanye babone kutsi leto titulo atikahlali muntfu. Kunendzawo lekhetsekile lelungiselelwe labakhululile nalababutsakatsaka. Njengobe lendzawo iyincane, kungase kuhlale munye noma babili kuphela labasita labakhulile nobe lababutsakatsaka.

Kugcoka Ngendlela Lezitsile: Nasisemhlanganweni kufanele sigcoke kahle, ngesizotsa, hhayi ngendlela lekhombisa titayela letivamile talelive. (1 Thim. 2:9) Ngisho nome sifika nome sesihamba ehhotela, nangesikhatsi sesitiphumulele, kungaba kungaphambi kwemhlangano nome ngemuva kwawo, sifuna kuciniseka kutsi asigcoki ngendlela lengakahlonipheki nobe lebudlabha. Loko kutasenta singabi nemahloni ekufaka emabheji emhlangano futsi ngeke sesabe kushumayela nakuvela litfuba lekwenta njalo. Indlela lesitawube sibukeka ngayo kanye nekutiphatsa kwetfu lokuhle kulemihlangano angeke igcine nje ngekukhanga bantfu labatsandza kulalela umlayeto weliBhayibheli losindzisa kuphila, kodvwa itawuphindze ijabulise Jehova.​—Zef. 3:17.

Kucabangela Labanye Nawusebentisa Tintfo Tebucwephesha: Sikhombisa kutsi siyabacabangela labanye nakusachubeka umhlangano ngekutsi siciphe bomakhalekhikhini betfu nobe letinye tintfo tebucwephesha kuze kungabangi umsindvo bese kuphazamisa labanye. Nasisebentisa ikhamera, umshini wekurekhoda i-video, i-tablet nobe lokunye lokufana nako, sifuna kubacabangela labanye singabaphazamisi futsi singabasitsi. Singaphindze sikhombise kuba nemikhuba lemihle ngekutsi singatfumelelani imilayeto kube kute sidzingo nakusachubeka luhlelo lwemhlangano.

Kudla Kwasemini: Sicela nitiphatsele kudla kwasemini kunekutsi niphume endzaweni yemhlangano niyewutsenga kudla ngesikhatsi selikhefu. Ningawaphatsa ema-cooler bag lamancane leningawabeka ngephansi kwetitulo. Ema-cooler bag lamakhulu kanye netitja letifako akukavumeleki endzaweni yemhlangano.

Iminikelo: Singakhombisa kubonga kwetfu ngemalungiselelo alomhlangano ngekunikela iminikelo lesitincumele yona yemsebenti wemhlaba wonkhe nasisemhlanganweni. Nangabe ufuna kunikela ngelisheke, kufanele ulibhale kutsi “Christian Congregation of Jehovah’s Witnesses of South Africa.” Iminikelo ingentiwa nange-debit card nobe nge-credit card.

Imitsi: Nangabe kunemitsi yadokotela loyisebentisako, sicela uciniseke kutsi uphatsa leyenele, ngobe ngeke itfolakale endzaweni yemhlangano. Imijovo netinyalitsi talabanesifo sashukela kufanele ilahlwe endzaweni lelungiselelwe kulahla tintfo letiyingoti hhayi emigconyeni yetibi lesemhlanganweni nasemahhotela.

Kuphepha: Sicela nikuphaphamele kakhulu kuvikela tingoti letingabangwa kushelela nekugileka. Njalo ngemnyaka kuba nebantfu labalimalako ngenca yeticatfulo, ikakhulukati emantonto. Kuncono kukhetsa ticatfulo letizitsile naletikwenela kahle kute ukhone kuhamba etitebhisini, etinsimbini letinetikhala, nakuletinye tindzawo letingaba yingoti.

Tincola Tetinswane Netitulo Tekungcebeleka: Tincola tetinswane kanye netitulo tekungcebeleka ngaphandle akukafaneli kungenwe nato endzaweni yemhlangano. Nome kunjalo, temukelekile tihlalo tebantfwana labancane (safety seats) nangabe tingakhona kufaselwa esitulweni lesisedvute nebatali.

Emakha: Imihlangano leminyenti ibanjelwa etindzaweni letivalekile letinetintfo tekungenisa umoya. Ngako-ke, kutawukhombisa kutsi sinelutsandvo nasilinganisela endleleni lesiwasebentisa ngayo emakha lanemandla langeke amphatse kahle umuntfu lonenkinga yekuphefumula nobe lonetinkinga letihlobene naloko.​—1 Khor. 10:24.

Tindzawo Tekudlela: Dvumisa ligama laJehova ngekutiphatsa kahle nawusetindzaweni tekudlela. Gcoka ngendlela lefanele umKhristu. Shiya ithiphu lefanele nangabe loko kuyintfo leyentiwako endzaweni lokuyo.

Tindzawo Tekulala: Emafomu latsi “Isicelo Sendawo Yokulala Sezidingo Ezikhethekile” (CO-5-ZU) ayatfolakala kute bamemeteli labawadzingako bawagcwalise. Ikomidi Yemsebenti Yelibandla kufanele ihlole kutsi lommemeteli uyafaneleka yini, isebentise ticondziso letikulelifomu kanye nencwadzi yanga-October 27, 2013, leyabhalelwa tonkhe tigungu talabadzala. Lelilungiselelo lentelwe bamemeteli kanye nebantfwana babo labasibonelo ebandleni.

Umsebenti Wekutitsandzela: Bonkhe labafisa kuvolontiya bangaya eHhovisini Letisebenti Tekutitsandzela emhlanganweni. Bantfwana labangaphansi kweminyaka lengu-16 budzala nabo bangalekelela kodvwa kufanele basebente nebatali babo, nome nalabo lababanakekelako nobe-ke nalomunye umuntfu lomdzala lovunyelwe ngumtali nome nguloyo lomnakekelako.