Naka Kakhulu Kwenta Bantfu Babe Bafundzi
1. Yini ledzingekako kute bantfu basindze?
1 Umbiko wemsebenti wemnyaka wa-2014 ukhombise kutsi emaKhristu achubeke anelisasasa futsi atimisela ngekushumayela tindzaba letimnandzi teMbuso waNkulunkulu. (Mat. 24:14) Ngemsebenti wemuti ngemuti, imikhankaso lefaka ekhatsi kuhambisa emapheshana kanye netimemo, ngisho nekufakaza etindzaweni tawonkhe wonkhe, sifinyelela bantfu labanyenti kunangaphambili. Nobe kunjalo kute bantfu basindze kufanele sibasite babe bafundzi baJesu ngekutsi sifundze nabo liBhayibheli.—1 Thim. 2:4.
2. Singatibuta miphi imibuto lengasisita sihlale silungele kucela tifundvo teliBhayibheli?
2 Hlala Ulungele Kucela Sifundvo SeliBhayibheli: Nangabe umuntfu anesifiso sekufundzelwa liBhayibheli, uyayitsatsa yini imininingwane yakhe futsi ubuyele kuye ngekushesha kute ucalise sifundvo naye? Ugcine nini kukhombisa umuntfu kutsi sichutjwa njani sifundvo seliBhayibheli ekuhambeleni kwekucala? Ugcine nini kucela sifundvo seliBhayibheli kulabo lobahambisela magazini njalo? Uke wabakhombisa ema-video latsi Kungani Kufanele Utadishe LiBhayibheli? naletsi Yini Leyentekako Nakuchutjwa Sifundvo SeliBhayibheli? labo losebenta nabo, lofundza nabo esikolweni, bomakhelwane, tihlobo kanye nalabanye lowetayelene nabo? Nawusebentisa litafula lekukhangisa tincwadzi uyabatjela yini labo labatsatsa tincwadzi kutsi bangatfola nesifundvo seliBhayibheli samahhala?
3. Kute siphumelele nasifundzisa liciniso, yini ledzingekako?
3 Jehova NaJesu Bayasisita: Ngekucalisa ngemavi latsi “hambani” nakakhuluma ngemsebenti ‘wekwenta bantfu bafundzi,’ Jesu abekhombisa kutsi kudzingeka kutikhandla nekutsi siye kubo. Nobe kunjalo, Jesu wetsembisa kuba natsi, akazange asishiye sodvwana. (Mat. 28:19, 20) Ngetulu kwaloko Jehova usinikete umoya wakhe longcwele nemathulusi lesingawasebentisa, waphindze wasicecesha kute sikhone kufundzisa bantfu liciniso. (Zak. 4:6; 2 Khor. 4:7) Singathantaza sicele “sifiso nemandla” ekufeza lomsebenti lobalulekile.—Fil. 2:13.
4. Kungani kufanele siwunake umsebenti wekwenta bantfu kutsi babe bafundzi?
4 Kushumayela tindzaba letimnandzi kusenta sijabule. Kodvwa-ke sijabula kakhulu nangabe sifundzisa umuntfu liciniso futsi simsite kutsi ahambe kanye natsi ‘endleleni leya ekuphileni.’ (Mat. 7:14; 1 Thes. 2:19, 20) Ngetulu kwako konkhe, nasihlala sinake umsebenti wekwenta bafundzi, sisuke sijabulisa Jehova ngobe “akafisi kutsi kubhubhe ngisho namunye, kepha ufisa kutsi bonkhe bantfu baphendvuke.”—2 Phet. 3:9.