Yenta Kudadisha Kwakho LiBhayibheli Kukuzuzise

KUBALULEKE NGANI: Kutidadishela liVi laNkulunkulu, kutasisita ‘sikwati ngalokuphelele kucondzisisa bubanti, budze, kuphakama, kanye nekujula’ kweliciniso. (Ef. 3:18) Kuphindze kusisite sihlale singasoleki, singabi nelibala kubantfu balelive lelibi, futsi sikhone nekuchubeka ‘sibambisise ngalokucinile livi lekuphila.’ (Fil. 2:15, 16) Kutidadishela liVi laNkulunkulu kwenta ukhone kukhetsa tintfo lotidzingako. Yini longayenta kute ukhone kuzuza nawufundza uphindze udadisha liBhayibheli?

INDLELA YEKUKWENTA:

• Dvwebela emavesi uphindze ubhale emaphuzu, kungaba seBhayibhelini lakho, ebhukwini nobe entfweni yakho yebuchwephesha

• Nawusafundza liVi laNkulunkulu, tibute kutsi: ‘Ngubani? Yini? Nini? Kuphi? Leni? Kanjani?’

• Tfola emaciniso. Usebentisa emathulusi ekucwaninga, ungacwaninga ngesihloko nobe ngelivesi leliseBhayibhelini

• Cabangisisa ngalokufundzile kute ubone kutsi kusebenta kanjani ekuphileni kwakho

• Kusebentise loko lokufundzako ekuphileni kwakho kwamalanga onkhe.—Luk. 6:47, 48

BUKELA I-VIDEO LETSI “LIBAMBISISENI NGALOKUCINILE”—NGEKUDADISHA NGENDLELA LEPHUMELELAKO, BESE UPHENDVULA LEMIBUTO LELANDZELAKO:

• Yini labanye labayitfolile nababatidadishela liBhayibheli?

• Kubaluleke ngani kutsi sithantaze ngaso sonkhe sikhatsi nasidadisha liBhayibheli?

• Yini lengasisita sikhone kucondza kancono indzaba letsite leseBhayibhelini?

• Ngumiphi imibala longayisebentisa nawudadisha liBhayibheli?

• Kubaluleke ngani kucabangisisa nawudadisha liVi laNkulunkulu?

• Kufanele senteni ngaloko lesikufundzako?