Kutfutfukisa Emakhono Etfu Emsebentini Wekushumayela—Kuvumelana Netimo

KUNGANI KUBALULEKILE: Labagcotjiwe bakanye naletinye timvu bamema tonkhe tinhlobo tebantfu kutsi tite titonatsa “mahhala emanti ekuphila.” (Semb. 22:17) Lamanti langumfanekiso amelela onkhe emalungiselelo aJehova ekukhulula bantfu labalalelako esonweni kanye nasekufeni. Kuze sisite bantfu labanemasiko kanye netenkholelo letehlukahlukene, sidzinga kubatjela ‘tindzaba letimnandzi taphakadze’ ngendlela lakhanga umuntfu ngamunye.—Semb. 14:6.

INDLELA YEKUKWENTA:

• Khetsa sihloko kanye nembhalo lotawutsintsa tinhlitiyo tebantfu labasensimini yangakini. Ungakhetsa kusebentisa tincociswano letisibonelo nobe usebentise indlela yekushumayela lowake wayisebentisa lephumelelako. Batsandza tiphi tihloko kanye nemibhalo? Tikhona yini tintfo letisandza kwenteka bantfu labanyenti labakhuluma ngato? Yini lengakhanga umuntfu wesilisa nobe wesifazane?

• Nawushumayela, bingelela bantfu ngendlela levamile futsi wente tintfo ngekuvumelana nemasiko asendzaweni yangakini.—2 Khor. 6:3, 4

• Tati kahle tincwadzi kanye nema-video lasemaThulusini Etfu Ekufundzisa lotawasebentisa kubantfu labatakulalela

• Titsatsele ku-internet ema-video netincwadzi kanye nanobe yini longayisebentisa kubantfu labasensimini yangakini, ukutsatse ngelulwimi lwabo

• Sishintje sihloko lobewukhuluma ngaso usivumelanise netidzingo temnikati welikhaya. (1 Khor. 9:19-23) Nasi sibonelo, yini longayisho nangabe utfola kutsi umnikati welikhaya usandza kushonelwa sihlobo sakhe?

BUKELANI LE-VIDEO, BESE NIPHENDVULA LEMIBUTO LELANDZELAKO:

• Lommemeteli ucale wakhuluma ngayiphi indzaba nalomnikati welikhaya?

• Bekwentekani ekuphileni kwalomnikati welikhaya?

• Ngumiphi imibhalo lebekangayisebentisa lebeyingaba kahle kulesimo, futsi kungani?

• Ungayishintja njani inshumayelo yakho kuze ikhange bantfu labasensimini yakho?