Lingisa Jesu Ngekutsi Ube Nemdlandla Nawushumayela

1. Yini leyenta bantfu baJehova behluke kulabanye labatsi bangemaKhristu?

LENYE intfo leyenta bantfu baJehova behluke kulabo labatibita ngekutsi bangemaKhristu, ngumdlandla wabo wekushumayela. (Thit. 2:14) Kodvwa ngaletinye tikhatsi, kungenteka ungabi nawo umdlandla wekushumayela. Mhlawumbe uyavumelana nalokwashiwo ngulomunye lomdzala welibandla lokhutsele lowatsi: “Ngalesinye sikhatsi ngibabete sifiso sekushumayela.”

2. Yini lengahle yente kube matima kutsi sichubeke sinemdlandla wekushumayela?

² Kungenteka siyijabulele kakhulu leminye imisebenti lesiyentela Jehova kwendlula indlela lesiwujabulela ngayo umsebenti wekushumayela. Kwentiwa yini loko? Singase siyibone ngekushesha imiphumela futsi sibone ngatsi kukhona lesikufezako nasakha takhiwo tenhlangano nalapho sitilungisa, nasisita nakuvela sehlakalo semvelo, nalapho sikhutsata bazalwane betfu nabodzadze. Kuba nekuthula nelutsandvo nasisebenta nebazalwane betfu nabodzadze, futsi siyati kutsi bayajabula ngaloko lesikwentako. Ngakulokunye, kungenteka sekuphele iminyaka sishumayela endzaweni lefanako kodvwa singayiboni kangako imiphumela lemihle. Nobe mhlawumbe sishumayela bantfu labangawemukeli umlayeto wetfu. Siyati nekutsi njengobe kuphela kusondzela, kungenteka umlayeto lesiwushumayelako uye ngekungatsandvwa kakhulu. (Mat. 10:22) Yini lengasisita kutsi sichubeke sinemdlandla nasishumayela nobe siwukhulise?

3. Umfanekiso lokuLukha 13:6-9 uwuveta njani umdlandla waJesu?

³ Singafundza lokutsite mayelana nemdlandla nasishumayela ngekutsi sifundze ngesibonelo saJesu. Ngesikhatsi ashumayela, akazange aphelelwe ngumdlandla. Ecinisweni, njengobe sikhatsi sichubeka, waba nemdlandla kakhulu. (Fundza Lukha 13:6-9.) Njengalesinye sisebenti lebesisebenta ensimini yemagilebisi lesacitsa iminyaka lemitsatfu setama kunaka sihlahla semkhiwa lebesingafuni kutsela, Jesu wacitsa iminyaka lengaba mitsatfu ashumayela emaJuda, futsi linyenti lawo belingawemukeli umlayeto wakhe. Nobe kunjalo, njengalesisebenti lesala kusheshe sisijube lesihlahla semkhiwa, Jesu akazange aphelelwe litsemba ngalabantfu nobe aphelelwe ngumdlandla wekubashumayela. Kunaloko, watimisela kakhulu kuze atsintse tinhlitiyo tabo.

4. Ngutiphi tintfo letine Jesu lasibekela sibonelo kuto lesitawucoca ngato?

⁴ Kulesihloko, sitawucoca ngendlela Jesu lawukhombisa ngayo umdlandla, ikakhulukati etinyangeni letisitfupha tekugcina ashumayela. Kufundza ngaloko lakufundzisa futsi silingise loko lakwenta kutasisita kutsi sihlale sinemdlandla lamuhla. Sitawucoca ngetintfo letine Jesu lasibekela sibonelo kuto: (1) Wanaka kakhulu intsandvo yaJehova, (2) wanakisisa siphrofetho seliBhayibheli, (3) wetsembela kuJehova kuze amsite, futsi (4) wahlala anelitsemba lekutsi labanye batamlalela.

WANAKA KWENTA INTSANDVO YAJEHOVA

5. Jesu wakhombisa njani kutsi bekanake kwenta intsandvo yaNkulunkulu?

⁵ Ngemdlandla Jesu washumayela ‘tindzaba letimnandzi teMbuso waNkulunkulu’ ngenca yekutsi bekati kutsi nguloko Nkulunkulu lebekafuna akwente. (Luk. 4:43) Wenta umsebenti wekushumayela weta kucala ekuphileni kwakhe. Ngasekupheleni kwemsebenti wakhe wekushumayela, Jesu wahamba “emadolobha nemadolobhana” afundzisa labanye. (Luk. 13:22) Waphindze wacecesha nalabanye bafundzi bakhe kutsi bashumayele kanye naye.​—Luk. 10:1.

6. Umsebenti wekushumayela uhlangana njani naleminye imisebenti lesiyentela Jehova? (Buka nesitfombe.)

⁶ Nalamuhla, kushumayela tindzaba letimnandzi ngumsebenti lobalulekile Jehova naJesu labafuna siwente. (Mat. 24:14; 28:19, 20) Nobe ngumuphi umsebenti lesiwentela Jehova uyahlobana nemsebenti wekushumayela. Nasi sibonelo, nasakha takhiwo tenhlangano nobe nasisebenta eBethel sisuke sisekela umsebenti wekushumayela. Nasisekela bazalwane betfu nabodzadze nakuvele tehlakalo akusiko nje kutsi simane sibasita ngaloko labakudzingako, kodvwa sisuke sibasita kutsi bakhone kuphindze babuyele eluhlelweni lwabo lwekukhonta Nkulunkulu, lokufaka ekhatsi kushumayela. Nangabe sikubona kubaluleka kwemsebenti wekushumayela futsi sikhumbula kutsi ngumsebenti lobalulekile Jehova lafuna siwente, loko kutasikhutsata kutsi sihlale siwenta. János, longulomdzala welibandla eHungary utsi: “Ngihlale ngitikhumbuta kutsi kute umsebenti lengiwentela Jehova longatsatsa sikhundla sekushumayela; kushumayela kungumsebenti lobaluleke kakhulu.”

7. Yini leyenta Jehova afune sichubeke sishumayela? (1 KuThimothi 2:3, 4)

⁷ Singachubeka sinemdlandla wekushumayela ngekutsi sibuke bantfu ngendlela Jehova lababuka ngayo. Ufuna kutsi bantfu labanyenti kakhulu bative tindzaba letimnandzi futsi batemukele. (Fundza 1 KuThimothi 2:3, 4.) Kuze sikwente loko, uyasicecesha kutsi siwumemetele ngendlela lephumelelako lomlayeto losindzisa kuphila. Sibonelo nje, incwajana letsi Tsandza Bantfu​—Wente Bafundzi ikhuluma ngetintfo letingasisita kutsi sicale kucoca nebantfu sinemgomo wekwenta bafundzi. Ngisho nobe bantfu bangasilaleli nyalo, mhlawumbe batawuba nalo litfuba lekutsi bemukele umlayeto wetfu ngaphambi kwekutsi kuphele kuhlupheka lokukhulu. Loko lesibatjela kona nyalo kungenteka ngiko lokutawubenta bafune kukhonta Jehova esikhatsini lesitako. Kodvwa loko kungenteka kuphela nangabe sichubeka sishumayela.

WANAKA TIPHROFETHO TELIBHAYIBHELI

8. Kwati tiphrofetho teliBhayibheli kwayitsintsa njani indlela Jesu bekasebentisa ngayo sikhatsi sakhe?

⁸ Jesu bekati kutsi titawugcwaliseka njani tiphrofetho teliBhayibheli. Bekati nekutsi umsebenti wakhe wekushumayela bewutawutsatsa iminyaka lemitsatfu nehhafu. (Dan. 9:26, 27) Bekakwati naloko bekuphrofethiwe mayelana nekutsi utawufa nini nekutsi utawufa njani. (Luk. 18:31-34) Wavumela loko bekakwati kutsi kutsintse indlela lasebentisa ngayo sikhatsi sakhe. Ngako washumayela ngemdlandla kuze acedze umsebenti lebekanikwe wona.

9. Kucondza tiphrofetho teliBhayibheli kusikhutsata njani kutsi sishumayele ngemdlandla?

⁹ Kucondza tiphrofetho teliBhayibheli kungasisita kutsi sishumayele ngemdlandla. Siyati kutsi sikhatsi lesisele ngaphambi kwekutsi kubhujiswe lelive sesinciphe kakhulu. Siyabona kutsi tintfo letentekako lamuhla kanye netintfo letentiwa bantfu tiluphawu lwekutsi siphila emalangeni ekugcina njengobe liBhayibheli lasho. Siyabona nekutsi kubambana ngetihlutfu kweMbuso wemaNgisi nemaMelika kanye neRussia nemave layisekelako kusigcwalisa njani siphrofetho lesimayelana nenkhosi yaseningizimu neyasenyakatfo ‘kulesikhatsi sekuphela.’ (Dan. 11:40) Siyacondza nekutsi uMbuso wemaNgisi nemaMelika umelelwa tinyawo kulesitfombe lokukhulunywa ngaso kuDanyela 2:43-45. Siyaciniseka kutsi uMbuso waNkulunkulu utawubhubhisa imibuso yebantfu ngekushesha, njengobe kusho lesiphrofetho. Tonkhe letiphrofetho tiyakhombisa kutsi sekusele kanganani kutsi lelive libhujiswe futsi loko kusikhutsata kutsi sishumayele ngekuphutfuma lokukhulu.

10. Tiphrofetho teliBhayibheli tingakukhutsata njani kutsi uchubeke ushumayela ngemdlandla?

¹⁰ Tiphrofetho teliBhayibheli tiphindze tibe nemlayeto lesikulangatelela mbamba kuwucocela labanye. Lomunye dzadze waseDominican Republic lokutsiwa nguCarrie utsi: “Tetsembiso taJehova letitsintsa inhlitiyo letimayelana nelikusasa lelihle tingikhutsata kutsi ngicocele labanye liciniso.” Uphindze atsi: “Nangibona loko bantfu lababhekene nako lamuhla, ngibese ngiyabona kutsi letetsembiso atisito tami nje kuphela, kodvwa nabo bayadzinga kutiva.” Tiphrofetho teliBhayibheli tisikhutsata kutsi singabindzi ngobe siyati kutsi nguJehova losekela umsebenti wetfu wekushumayela. Leila, lohlala eHungary utsi: “Umbhalo wa-Isaya 11:6-9 ungikhutsata kutsi ngibatjele tindzaba letimnandzi nalabo lokubonakala ngatsi ngeke batemukele. Ngiyati kutsi nobe ngubani angashintja ngekusitwa nguJehova.” Lomunye umzalwane waseZambia lokutsiwa nguChristopher utsi: “Njengobe kusho umbhalo waMakho 13:10, tindzaba letimnandzi tishunyayelwa emhlabeni wonkhe, futsi ngiyatigcabha ngekutsi ngifaka sandla ekugcwalisekeni kwalesiphrofetho.” Ngutiphi tiphrofetho teliBhayibheli letikukhutsata kutsi uchubeke ushumayela?

WETSEMBELA KUJEHOVA KUZE AMSITE

11. Yini leyenta kwadzingeka kutsi Jesu etsembele kuJehova kutsi amsite kuze achubeke ashumayela ngemdlandla? (Lukha 12:49, 53)

¹¹ Jesu wetsembela kuJehova kuze amsite achubeke ashumayela ngemdlandla. Nanobe bekawakhetsa kahle emagama nakashumayela, kepha bekati kutsi labanye bantfu bewutawubatfukutselisa umlayeto weMbuso futsi labanye bebatawuphikisa ngalokucinile. (Fundza Lukha 12:49, 53.) Ngenca yekutsi Jesu bekashumayela, baholi benkholo betama tikhatsi letinyenti kumbulala. (Joh. 8:59; 10:31, 39) Kodvwa wachubeka ashumayela ngobe bekati kutsi Jehova unaye. Watsi: “Angisingedvwa, kodvwa Babe longitfumile unami. . . . Akakangishiyi ngedvwa, ngobe ngihlale ngenta tintfo letimjabulisako.”​—Joh. 8:16, 29.

12. Jesu wabasita njani bafundzi bakhe kuze bachubeke bashumayela ngisho baphikiswa?

¹² Jesu wakhumbuta bafundzi bakhe kutsi bangetsembela kuJehova kuze abasekele. Wabatjela tikhatsi letinyenti kutsi Jehova utabasita ngisho nalapho baphatfwa kabi. (Mat. 10:18-20; Luk. 12:11, 12) Ngetulu kwaloko, wabecwayisa ngekutsi bahlale bacaphile. (Mat. 10:16; Luk. 10:3) Wabatjela kutsi bangabaphoceleli labo labangafuni kubalalela. (Luk. 10:10, 11) Ngetulu kwaloko, wabatjela kutsi babaleke nabaphatfwa kabi. (Mat. 10:23) Nanobe Jesu bekanemdlandla futsi etsembela kuJehova, bekangatibeki engotini ngalokungenasidzingo.​—Joh. 11:53, 54.

13. Yini lengakwenta uciniseke kutsi Jehova utakusita?

¹³ Sidzinga kusitwa nguJehova kuze sichubeke sishumayela ngemdlandla nasiphikiswa lamuhla. (Semb. 12:17) Yini lengakwenta uciniseke kutsi Jehova utakusekela? Cabanga ngemthantazo waJesu lokuJohane sehluko 17. Jesu wacela Jehova kutsi avikele baphostoli bakhe, futsi Jehova wawuphendvula lomthantazo. Incwadzi yeMisebenti iveta indlela lasita ngayo baphostoli kutsi bashumayele ngemdlandla ngisho nobe baphatfwa kabi. Kulomthantazo, Jesu waphindze wacela Jehova kutsi avikele labo labatawuba nekukholwa kuloko lokufundziswa baphostoli. Loko kufaka ekhatsi nawe. Jehova akakayekeli kuphendvula lomthantazo waJesu; utakusita njengobe asita baphostoli.​—Joh. 17:11, 15, 20.

14. Sati njani kutsi sitawukhona kuchubeka sishumayela ngemdlandla? (Buka nesitfombe.)

¹⁴ Ngisho nobe kungaba matima kakhulu kushumayela tindzaba letimnandzi ngemdlandla njengobe kuphela kusondzela, sitalutfola lonkhe lusito lesiludzingako. (Luk. 21:12-15) NjengaJesu nebafundzi bakhe, sivumela bantfu batikhetsele kutsi batasilalela yini nobe cha, futsi siyakugwema kuphikisana nabo. Ngisho nobe umsebenti wetfu uvinjelwe, bazalwane betfu nabodzadze bakhonile kushumayela tindzaba letimnandzi ngobe betsembela kuJehova hhayi emandleni abo. Njengobe nje Jehova abaniketa emandla bantfu bangesikhatsi semaKhristu ekucala, nalamuhla usiniketa emandla kuze “umsebenti wekushumayela wentiwe ngalokugcwele” aze enele. (2 Thim. 4:17) Ungaciniseka kutsi utawukhona kuchubeka ushumayela ngemdlandla nangabe wetsembela kuJehova.

WAHLALE ANELITSEMBA

15. Yini lekhombisa kutsi Jesu bekaciniseka kutsi bantfu batatilalela tindzaba letimnandzi?

¹⁵ Jesu bekaciniseka kutsi bebakhona bantfu lebebatatilalela tindzaba letimnandzi. Loko kwamsita kutsi ahlale anemdlandla wekushumayela. Sibonelo nje, ngasekupheleni kwa-30 C.E., wabona kutsi bantfu labanyenti besebakulungele kwemukela tindzaba letimnandzi, futsi wabafananisa nensimu lelungele kuvunwa. (Joh. 4:35) Cishe ngemuva kwesikhatsi lesingangemnyaka, watjela bafundzi bakhe watsi: “Umsebenti wekuvuna mkhulu.” (Mat. 9:37, 38) Ngekuhamba kwesikhatsi, waphindze wagcizelela watsi: “Umsebenti wekuvuna mkhulu . . . Ncengani iNkhosi yekuvuna kutsi yengete tisebenti ekuvuneni kwayo.” (Luk. 10:2) Jesu wahlala anelitsemba lekutsi bantfu batatilalela tindzaba letimnandzi, futsi bekajabula nabatilalela.​—Luk. 10:21.

16. Imifanekiso yaJesu ikhombisa njani kutsi umsebenti wekushumayela bewutawuba nemiphumela lemihle? (Lukha 13:18-21) (Buka nesitfombe.)

¹⁶ Jesu wafundzisa bafundzi bakhe kutsi bahlale banembono lokahle ngemlayeto lebebawumemetela, lebekutabakhutsata kutsi bachubeke banemdlandla. Sibonelo nje, cabanga ngemifanekiso lemibili layisebentisa. (Fundza Lukha 13:18-21.) Wasebentisa inhlanyelo yesinaphi kuze afundzise kutsi umlayeto weMbuso bewutawandza ngendlela lemangalisako futsi kute lebekutawuvimba. Ngetulu kwaloko, wasebentisa imvubelo kuze achaze indlela umlayeto weMbuso bewutawandza ngayo uze ufike etindzaweni letikhashane futsi ubangele lushintjo lokungenteka belungeke lubonakale ngekushesha. Ngaleyondlela, Jesu wasita bafundzi bakhe babona kutsi nakanjani lomlayeto labawushumayelako bewutawuba nemiphumela lemihle.

17. Ngutiphi tizatfu letenta kutsi sichubeke sinembono lokahle ngemsebenti wekushumayela?

¹⁷ Nasicabanga ngendlela umsebenti wekushumayela losita ngayo bantfu labanyenti emhlabeni wonkhe, loko kwenta kutsi sifune kuchubeka nekushumayela. Njalo ngemnyaka, tigidzi tebantfu labatsandza liciniso tiba khona eSikhumbutweni futsi sidadisha nato liBhayibheli. Bantfu labanyenti kakhulu bayabhajatiswa futsi bacale kushumayela kanye natsi. Asati kutsi bangakhi bantfu labatawulalela tindzaba letimnandzi, kodvwa siyati kutsi Jehova ubutsela ndzawonye sicumbi lesikhulu lesitawusindza ekuhluphekeni lokukhulu. (Semb. 7:9, 14) INkhosi yekuvuna iyati kutsi banyenti bantfu labasetawulalela tindzaba letimnandzi, ngako sinesizatfu lesivakalako sekuchubeka sishumayela.

18. Yini lesifuna bantfu bayibone kitsi?

¹⁸ Bafundzi baJesu bebahlale batiwa ngekutsi bashumayela ngemdlandla. Ngesikhatsi bantfu babona kutsi baphostoli bashumayela ngesibindzi nangemdlandla, “babese bayabona kutsi laba bebahamba naJesu.” (Imis. 4:13) Njengobe bantfu basibona nasishumayela, shengatsi bangabona kutsi sinemdlandla njengaJesu.