Asisodvwa!

1-2. (a) Yini leyenta sitsi sisuke singasisodvwa nasinetinkinga? (b) Sitawucoca ngani kulesihloko?

NASIBHEKENE netinkinga letimatima, singahle sive shengatsi sisodvwa ehlatsini lelesabekako futsi asiyiboni indlela yekuphuma. Nobe kunjalo, nasinetinkinga sisuke singasisodvwa. Babe wetfu wasezulwini lositsandzako akagcini nje ngekubona tinkinga tetfu, kodvwa uphindze etsembise kusisita. Naku lakwetsembisa tikhonti takhe letetsembekile, utsi: “Ngitakusita.”​—Isa. 41:10.

² Kulesihloko, sitawucoca ngekutsi Jehova usisita njani (1) ngekusicondzisa, (2) ngekusinakekela, (3) ngekusivikela, (4) nangekusidvudvuta. Jehova uyasicinisekisa kutsi ngisho nobe sibhekana natiphi tinkinga ekuphileni, akayuze asikhohlwe futsi akayuze asishiye. Ngako asisodvwa.

JEHOVA UYASICONDZISA

3-4. Jehova usicondzisa njani? (Tihlabelelo 48:14)

³ Fundza Tihlabelelo 48:14. Jehova akalindzeli kutsi siticondzise. Uticondzisa njani tikhonti takhe letetsembekile lamuhla? Lenye indlela layisebentisako liBhayibheli. (Hla. 119:105) Asebentisa liVi lakhe leliphefumulelwe, Jehova uyasisita kutsi sente tincumo futsi sibe nebuntfu lobutasisita kutsi sitfole injabulo lenkhulu nyalo kanye nekuphila lokuphakadze esikhatsini lesitako.a Sibonelo nje, usifundzisa kutsi sicolele labanye futsi singahlali sibatfukutselele, setsembeke kuko konkhe lesikwentako futsi sibatsandze kakhulu bantfu ngalokusuka enhlitiyweni. (Hla. 37:8; Heb. 13:18; 1 Phet. 1:22) Nasitenta letintfo, sitawuba batali labancono kakhulu, sibe madvodza nobe bafati labakahle futsi sibe bangani labakahle.

⁴ Ngetulu kwaloko, Jehova wente kutsi eVini lakhe kubhalwe ngebantfu mbamba lebebanetinkinga letifana netetfu futsi lebebativa ngendlela natsi lesitiva ngayo. (1 Khor. 10:13; Jak. 5:17) Nasifundza letindzaba letenteka mbamba futsi sitisebentisa tifundvo lesititfola kuto, sisitakala ngetindlela letimbili. Kwekucala, sibese siyabona kutsi asisodvwa, bakhona labanye labake babhekana netimo letifana naleti lesikuto futsi bakhona kutibeketelela. (1 Phet. 5:9) Kwesibili, sifundza indlela yekubhekana netinkinga tetfu.​—Rom. 15:4.

5. Bobani Jehova labasebentisako kuze asicondzise?

⁵ Jehova uphindze asebentise bazalwane betfu nabodzadze kuze asicondzise.b Sibonelo nje, babonisi labajikeletako bahlale bavakashela emabandla kuze basikhutsate. Tinkhulumo tabo ticinisa kukholwa kwetfu futsi tisisita kutsi silondvolote bunye betfu lobuligugu. (Imis. 15:40–16:5) Labadzala belibandla nabo basebenta kamatima kuze basite ngamunye wetfu kutsi ahlale anebuhlobo lobuhle naJehova. (1 Phet. 5:2, 3) Batali bafundzisa bantfwana babo kutsi batsandze Jehova, babasite kutsi bafundze kusebentisa likhono labo lekucabanga futsi babe nemikhuba lemihle. (Taga 22:6) Bodzadze labavutsiwe basita bodzadze labasebasha ngekutsi bababekele sibonelo lesihle, babeluleke futsi babakhutsate ngemusa.​—Thit. 2:3-5.

6. Yini lokufanele siyente kuze sicondziswe nguJehova?

⁶ Jehova udlale indzima yakhe ngekutsi asinikete sicondziso lesisidzingako. Singakhombisa njani kutsi siyabonga ngaloko lasentele kona? Taga 3:5, 6 titsi: “Tsemba Jehova ngayo yonkhe inhlitiyo yakho, futsi ungetsembeli elwatini lwakho.” Nasenta njalo, “yena utawenta kuphila [kwetfu] kuphumelele,” lokusho kutsi utasisita sigweme tinkinga letinyenti futsi sibe nemphilo lejabulisako. Sibonga kakhulu ngekutsi Jehova usati kahle futsi usitsandza kakhulu kangangekutsi unika ngamunye wetfu sicondziso lasidzingako!​—Hla. 32:8.

JEHOVA UYASINAKEKELA

7. Ngutiphi letinye tindlela Jehova lasinakekela ngato? (KubaseFiliphi 4:19)

⁷ Fundza KubaseFiliphi 4:19. Ngetulu kwekutsi Jehova uyasicondzisa, uphindze abusise imetamo yetfu yekutfola kudla, kwekwembatsa kanye nendzawo yekuhlala. (Mat. 6:33; 2 Thes. 3:12) Nanobe kungekwemvelo kukhatsateka ngetintfo lesitidzingako, Jehova usikhutsata kutsi singakhatsateki kakhulu ngaletintfo. Ngasiphi sizatfu? Ngenca yekutsi Babe wetfu akayuze atishiye tikhonti takhe letetsembekile natidzinga lusito. (Mat. 6:8; Heb. 13:5) Singametsemba nakatsi utasinakekela.

8. Yini Jehova lamentela yona Davide?

⁸ Cabanga ngendlela Jehova lamsita ngayo Davide. Kuleminyaka lematima layicitsa aphila ngekubaleka, Jehova wanika yena nalamadvodza lebekanawo tintfo bebatidzinga kuze bachubeke baphila. Acabanga ngendlela Jehova lamnakekela ngayo ngaleyo minyaka, Davide wabhala watsi: “Ngake ngaba mncane, futsi nyalo sengimdzala, kodvwa angikaze ngimbone lolungile alahliwe, nebantfwana bakhe abahambi bacela kudla.” (Hla. 37:25) NjengaDavide, kungenteka nawe umbonile Jehova akunakekela nobe anakekela bazalwane bakho nabodzadze nanibhekene netikhatsi letimatima.

9. Jehova ubanakekela njani bantfu bakhe lamuhla nakuvele sehlakalo? (Buka netitfombe.)

⁹ Jehova uphindze anakekele bantfu bakhe nakuvele sehlakalo. Sibonelo nje, ngesikhatsi kunendlala, emaKhristu ekucala lahlala etindzaweni letehlukahlukene atfumelela bazalwane bawo nabodzadze tintfo lebebatidzinga. (Imis. 11:27-30; Rom. 15:25, 26) Nalamuhla, bantfu baNkulunkulu bakhombisa umoya lofanako. Nakuvele sehlakalo, Jehova utsintsa bantfu bakhe kutsi basite labo labehlelwe ngulesehlakalo ngekudla, emanti, kwekwembatsa nemitsi. Emacembu ekwakha alungisa emakhaya nemaHholwa eMbuso lalimele. Bantfu baJehova basukumela etulu kuze badvudvute, baphindze bakhutsate ngemiBhalo labo lababhidlikelwe ngemakhaya abo nobe labashonelwe bantfu lababatsandzako.c

10-11. Yini loyifundza kulokwenteka kuBorys?

¹⁰ Jehova uphindze abanakekele nalabo labasengakacali kumkhonta. Ngendlela lefanako, natsi sifuna ematfuba ekubakhombisa umusa labo labasengakabi boFakazi. (Gal. 6:10) Nasenta loko, singakhona kubasita bafundze lokunyenti ngatsi nangaJehova. Cabanga ngalokwenteka kuBorys, longumphatsisikolwa e-Ukraine. Nanobe Borys angasuye Fakazi waJehova, bekahlale abaphatsa ngemusa bafundzi lababoFakazi futsi bekatihlonipha tinkholelo tabo. Ngenca yekutsi bekuliwa endzaweni lahlala kuyo, wancuma kubaleka waya endzaweni lephephile kulelive, futsi bazalwane betfu bamsita. Ngekuhamba kwesikhatsi, Borys waya eSikhumbutweni sekufa kwaJesu. Nakacabanga ngaloko lokwenteka, utsi: “BoFakazi bangiphatsa ngemusa futsi banginakekela. Ngibabonga kakhulu BoFakazi BaJehova!”

¹¹ Natsi singawulingisa umusa waBabe wetfu wasezulwini ngekutsi sibakhombise lutsandvo labo labadzinga lusito, ngisho baboFakazi nobe bangasibo. (Luk. 6:31, 36) Siyetsemba kutsi imetamo yetfu yekutsandza bonkhe bantfu itawenta kutsi nabo bagcine sebabalandzeli baKhristu. (1 Phet. 2:12) Kodvwa ngisho nobe kungaba namiphi imiphumela, sitawutfola injabulo lenkhulu letfolakala ngekupha.​—Imis. 20:35.

JEHOVA UYASIVIKELA

12. Yini Jehova layetsembisa bantfu bakhe? (Tihlabelelo 91:1, 2, 14)

¹² Fundza Tihlabelelo 91:1, 2, 14. Lamuhla, Jehova wetsembisa kuvikela bantfu bakhe kunobe yini lengalimata buhlobo babo naye. Akayuze avumele Sathane kutsi angcolise kukhonta kweliciniso. (Joh. 17:15) Ngetulu kwaloko, ngesikhatsi ‘sekuhlupheka lokukhulu,’ singaciniseka ngalokuphelele kutsi Jehova utasifeza setsembiso sakhe sekusisita sihlale sinekukholwa lokucinile futsi asivikele kube bete lokusilimatako.​—Semb. 7:9, 14.

13. Jehova umvikela njani umuntfu ngamunye?

¹³ Jehova umvikela njani umuntfu ngamunye? Asebentisa imiBhalo, Jehova usisita sikhone kwehlukanisa lokulungile kulokungakalungi. (Heb. 5:14) Nasiphila ngetimiso letiseVini laNkulunkulu, sivikela buhlobo betfu naye futsi sente tincumo letikahle letitasisita kutsi sijabule futsi siphile nasemtimbeni. (Hla. 91:4) Ngetulu kwaloko, Jehova uyasivikela asebentisa libandla. (Isa. 32:1, 2) Nasicitsa sikhatsi nebantfu labatsandza Jehova nalabaphila ngetimiso takhe, siyakhutsateka futsi sitfole emandla ekugwema lokubi.​—Taga 13:20.

14. (a) Yini leyenta Nkulunkulu angasivikeli kuto tonkhe tinkinga? (b) Tihlabelelo 9:10 tisicinisekisa ngani? (Buka nembhalo longentasi.)

¹⁴ Esikhatsini lesendlulile, Jehova bekavikela tikhonti takhe kuze tingalimali nobe tibulawe. Kodvwa bekangahlali akwenta loko. Ngaletinye tikhatsi ‘sehlelwa sikhatsi senhlekelele netimo letingakalindzeleki.’ (Shu. 9:11) Ngetulu kwaloko, kuyo yonkhe leminyaka Jehova uvumele tikhonti takhe kutsi tiphatfwe kabi nobe tibulawe kuze akhombise kutsi Sathane unemanga. (Jobe 2:4-6; Mat. 23:34) Nguloko lokwentekako nalamuhla. Nanobe kungenteka Jehova angaticedzi tinkinga tetfu, singaciniseka kutsi akayuze abashiye labo labamtsandzako.d​—Hla. 9:10.

JEHOVA UYASIDVUDVUTA

15. Usidvudvuta njani umthantazo, liVi laNkulunkulu kanye nebazalwane betfu nabodzadze? (2 KubaseKhorinte 1:3, 4)

¹⁵ Fundza 2 KubaseKhorinte 1:3, 4. Ngalesinye sikhatsi kungenteka sibe selusizini, sikhatsateke nobe sicindzeteleke. Mhlawumbe nyalo ubhekene nesimo lesikucindzetelako lesikwenta utive uwedvwa. Ukhona yini loyicondzako indlela lotiva ngayo? Yebo, nguJehova. Akagcini nje ngekuva buhlungu lobuvako, kepha uphindze ‘akudvudvute kuko konkhe kuhlupheka kwakho.’ Kanjani? Nasincusa kuye ngemthantazo, yena usinika “kuthula kwaNkulunkulu lokwendlula konkhe kucondza.” (Fil. 4:6, 7) Siphindze sidvudvuteke nasifundza emavi akhe laseBhayibhelini. Lamavi lanelutsandvo nalanekuhlakanipha futsi lasinika litsemba angasenta sibe ncono. Imihlangano yelibandla nayo iyasidvudvuta ngobe siba nebudlelwane lobuhle nebazalwane betfu nabodzadze futsi sitfole sikhutsato lesivela eBhayibhelini.

16. Yini loyifundza kulokwenteka kuNathan naPriscilla?

¹⁶ Kuze sibone indlela Jehova lasidvudvuta futsi asikhutsate ngayo asebentisa liVi lakhe, cabanga ngalokwenteka kuNathan naPriscilla labahlala eMelika. Eminyakeni leyendlulile, bancuma kutfutsela endzaweni lenesidzingo lesikhulu sebamemeteli. Nathan utsi: “Besetsemba kutsi Jehova utasibusisa.” Kodvwa nabefika kulendzawo, bahlaselwa kugula futsi baba netinkinga tetimali. Kwadzingeka kutsi babuyele ekhaya futsi nakhona bachubeka bete kahle imali. Nathan utsi: “Bengitibuta kutsi yini leyente Nkulunkulu wangasibusisi ngendlela lebengicabanga kutsi utasibusisa ngayo. Ngacala nekutibuta kutsi kukhona yini lokubi bengikwentile.” Kodvwa ngekuhamba kwesikhatsi, Nathan naPriscilla babese bayabona kutsi Nkulunkulu bekangakabashiyi ngesikhatsi bebadzinga ngaso lusito. Nathan utsi: “Ngaleto tikhatsi letimatima, liBhayibheli lafana nemngani lohlakaniphile losikhutsatako nalosicondzisako. Kunaka indlela Jehova lasisita ngayo ngaleso sikhatsi kuze sikhone kubeketelela lobumatima lebesibhekene nabo kunekutsi sinake letinkinga, kwasisita saciniseka kutsi Jehova utawuchubeka asisita nasesikhatsini lesitako.”

17. Dzadze Helga wayitfola njani indvudvuto? (Buka nesitfombe.)

¹⁷ Bazalwane betfu nabodzadze nabo bangasidvudvuta. Kanjani? Cabanga ngaloko lokwenteka kuHelga lohlala eHungary. Kwaphela iminyaka leminyenti abhekene netinkinga letehlukahlukene letamenta wativa angenabani futsi angasilutfo. Kodvwa nakabuka emuva, uyayibona indlela Jehova lamdvudvute ngayo asebentisa libandla. Utsi: “Jehova bekahlale angisita nakabona kutsi ngiphelelwa ngemandla ngenca yemsebenti wekutiphilisa, kunakekela umntfwanami logulako kanye naletinye tinkinga. Kute ngisho linye lilanga kuleminyaka lengu-30 lehluleke ngalo kugcina setsembiso sakhe sekungidvudvuta. Bekavame kungicinisa ngemavi lanemusa, lacatjangwe kahle nangemavi ekungibonga lashiwo ngulabanye. Bengivame kutfola imilayeto, emakhadi nobe emavi ekungincoma lashiwo ngesikhatsi lebengiwadzinga ngaso kakhulu.”

18. Singabadvudvuta njani labanye?

¹⁸ Sinelitfuba lelihle lekulingisa Nkulunkulu wetfu ngekutsi sidvudvute labanye. Singakwenta njani loko? Singabalalela ngesineke, sisho emavi latabenta bative bancono futsi sibasite. (Taga 3:27) Setama kudvudvuta bonkhe labanetinkinga, lokufaka ekhatsi nalabo labasengakamkhonti Nkulunkulu. Nangabe bomakhelwane betfu baselusizini, bagula nobe bacindzetelekile, siyabavakashela, sibalalele futsi sibakhutsate ngemavesi laseBhayibhelini. Nasilingisa Jehova ‘longuNkulunkulu wayo yonkhe indvudvuto,’ sitawube sisita bazalwane betfu nabodzadze kutsi babeketelele tinkinga futsi sisite nalabo labasengakamkhonti Jehova kutsi bafune kufundza ngaye.​—Mat. 5:16.

JEHOVA UHLALE ASISITA

19. Yini Jehova lasentela yona, futsi singamlingisa njani?

¹⁹ Jehova unendzaba mbamba nabo bonkhe labamtsandzako. Akasishiyi nangabe sibhekana netinkinga. Njengobe nemtali amnakekela ngelutsandvo umntfwanakhe, Jehova uyatinakekela tikhonti takhe letetsembekile. Uyasicondzisa, asinakekele, asivikele futsi asidvudvute. Silingisa Babe wetfu wasezulwini lonelutsandvo nasisekela labo labanetinkinga futsi sibakhutsata. Ngisho nobe singabhekana netinkinga nobe tintfo letisivisa buhlungu, singaciniseka kutsi Jehova unatsi. Ngetulu kwako konkhe, usetsembise watsi: “Ungesabi ngobe mine nginawe.” (Isa. 41:10) Ngako singaciniseka ngalokuphelele kutsi asisodvwa!