Jehova Usisita Njani Kutsi Sicinisele?

1. Yini leyenta sidzinge kucinisela, futsi ngubani lotasisita? (1 Phetro 5:10)

KULAMALANGA ekugcina lamatima, bantfu baJehova bayakudzinga kucinisela. Labanye banekugula lokungalapheki. Labanye bashonelwe ngulababatsandzako. Kantsi labanye bayaphikiswa, kungaba kutsi baphikiswa ngemalunga emndeni nobe tiphatsimandla. (Mat. 10:18, 36, 37) Ciniseka kutsi kunobe ngubuphi bumatima lobhekene nabo, Jehova angakusita ucinisele.​—Fundza 1 Phetro 5:10.

2. Livelaphi likhono letfu lekucinisela?

² Kucinisela kusho kuhlala setsembekile kuJehova futsi simkhonte sijabulile ngisho nobe sinetinkinga, siphatfwa kabi, sivivinywa nobe silingeka kutsi sente lokubi. Kuze sicinisele kufanele siphindze setsembe kutsi tintfo titawuba ncono. Likhono lekucinisela njengemaKhristu aliveli emandleni lesinawo; kunaloko, livela kuJehova, lokunguye longasipha “emandla lamakhulu kakhulu.” (2 Khor. 4:7) Kulesihloko, sitawucoca ngetintfo letine Jehova lasinika tona letingasisita sicinisele. Sitawuphindze sibone kutsi singatisebentisa njani.

UMTHANTAZO

3. Yini leyenta sitsi umthantazo usimangaliso?

³ Jehova usentele intfo lemangalisako lengasisita kutsi sicinisele. Wente kutsi sikhone kukhuluma naye ngisho nobe sinesono. (Heb. 4:16) Cabanga nganaku: Singathantaza kuJehova nobe nini futsi simtjele nobe yini. Angasiva ngisho sikhuluma luphi lulwimi nobe sikuphi, ngisho sisodvwa nobe sivalelwe ejele. (Jona 2:1, 2; Imis. 16:25, 26) Nangabe sikhatsateke kakhulu size singakhoni ngisho nekusho emagama laveta indlela lesitiva ngayo, Jehova usuke akwati loko lesifuna kukusho. (Rom. 8:26, 27) Nembala, umthantazo usimangaliso!

4. Yini leyenta sitsi kucela Jehova asisite sicinisele kuvumelana nentsandvo yakhe?

⁴ EVini lakhe, Jehova usicinisekisa ngekutsi ‘nobe yini lesiyicelako kuye levumelana nentsandvo yakhe, yena uyasiva.’ (1 Joh. 5:14) Singamcela yini Jehova kutsi asisite sicinisele? Yebo! Kwenta njalo kuvumelana nentsandvo yakhe. Sisho ngani? Nasibeketelela tinkinga, Jehova angakhona kuphendvula loyo lomedzelelako, lokunguSathane Develi. (Taga 27:11) Ngetulu kwaloko, liBhayibheli litsi Jehova uyakulangatelela kutsi “emandla akhe awakhombise labo inhlitiyo yabo lephelele kuye.” (2 Khr. 16:9) Ngako singaciniseka kutsi Jehova unemandla kanye nesifiso sekusisita sicinisele.​—Isa. 30:18; 41:10; Luk. 11:13.

5. Kuthantaza kungasinika njani kuthula kwengcondvo? (Isaya 26:3)

⁵ LiBhayibheli litsi nasithantaza ngalokusuka enhlitiyweni ngetintfo letisikhatsatako, ‘kuthula kwaNkulunkulu lokwendlula konkhe kucondza kutawulondvolota tinhlitiyo netingcondvo tetfu.’ (Fil. 4:7) Cabanga kutsi kusho kutsini loko. Bantfu labangamkhonti Jehova babhekana netinkinga futsi bangetama tindlela letehlukene kuze batfole kuthula kwengcondvo. Sibonelo nje, labanye betama kususa yonkhe imicabango engcondvweni yabo kuze bative banekuthula. Kususa yonkhe imicabango engcondvweni kungaba yingoti ebuhlotjeni bemuntfu naNkulunkulu. (Catsanisa naMatewu 12:43-45.) Ngetulu kwaloko, kuthula lesikunikwa nguJehova nasithantaza kungetulu kakhulu kwendlula nobe ngukuphi kuthula umuntfu langakutfola nakasebentisa loluhlobo lolu lwekuzindla. Nasithantaza kuJehova, sisuke sikhombisa kutsi setsembele ngalokuphelele kuye, futsi usipha “kuthula lokuchubekako.” (Fundza Isaya 26:3.) Lenye indlela Jehova lakwenta ngayo loku kutsi asisite sikhumbule emaciniso lasidvudvutako lesiwafundze eVini lakhe. Lamaciniso enta kutsi tingcondvo tetfu netinhlitiyo tetfu tibe nekuthula ngobe siyati kutsi Jehova unendzaba natsi futsi ufuna siphumelele.​—Hla. 62:1, 2.

6. Yini longayifaka emthantazweni wakho? (Buka nesitfombe.)

⁶ Loko longakwenta. Njengobe ubeketelela inkinga levivinya kukholwa kwakho, “lahlela umtfwalo wakho kuJehova” futsi uthantazele kuthula kwakhe. (Hla. 55:22) Thantazela nekuhlakanipha lokudzingako kuze ukhone kuyibeketelela lenkinga. (Taga 2:10, 11) Njengobe usancusa ucela kucinisela, ungakhohlwa nekubonga. (Fil. 4:6) Funa timphawu letikhombisa kutsi Jehova uyakusita nawusebhekene nalenkinga, futsi umbonge ngekutsi uyakusekela. Ungayivumeli lenkinga ikwente ungatiboni tibusiso lesewuvele unato.​—Hla. 16:5, 6.

LIVI LANKULUNKULU

7. Kudadisha liBhayibheli kungasisita njani kutsi sicinisele?

⁷ Jehova usinikete liVi lakhe kuze lisisite sicinisele. LiBhayibheli linetindzaba letinyenti letisicinisekisako kutsi Jehova uyasisekela. Cabanga nganasi sibonelo. Matewu 6:8 utsi: “Babe wenu uyatati tintfo lenitidzingako ngisho nobe nisengakaticeli.” NguJesu lowakhuluma lamavi, futsi umati kahle kakhulu Jehova kwendlula nobe ngabe ngubani. Ngako, site sizatfu sekungabata kutsi Jehova unendzaba natsi nasibhekene netinkinga. LiBhayibheli linemavi lamanyenti lafana nalawa langasisita kakhulu sicinisele.​—Hla. 94:19.

8. (a) Niketa sibonelo lesiseBhayibhelini lesingasisita sicinisele. (b) Yini lengasisita sikhumbule timiso teliBhayibheli ngesikhatsi lesitidzinge ngaso?

⁸ Timiso teliBhayibheli tingasisita kutsi sicinisele. Kube kufanele, ngobe tinekuhlakanipha lokungasisita sente tincumo letinengcondvo. (Taga 2:6, 7) Sibonelo nje, liBhayibheli lisikhutsata kutsi siyekele kukhatsateka ngaloko lokungahle kwenteke kusasa, kunaloko setsembele kuJehova lilanga nelilanga. (Mat. 6:34) Nangabe sivame kufundza liBhayibheli futsi sicabangisise ngaloko lesikufundzako, manyenti ematfuba ekutsi sikhumbule timiso lesitidzingako ngesikhatsi lesitidzinge ngaso.

9. Tindzaba letiseBhayibhelini tisisita njani siciniseke kakhulu kutsi Jehova utasisita?

⁹ LiBhayibheli liphindze likhulume ngetindzaba mbamba tebantfu labavamile labetsembela kuJehova futsi wabasekela. (Heb. 11:32-34; Jak. 5:17) Nasicabangisisa ngetindzaba letinjalo, siciniseka kakhulu kutsi Jehova “usiphephelo setfu nemandla etfu, kumelula kutfola lusito kuye nasicindzetelekile.” (Hla. 46:1) Njengobe sinaka kwetsembeka kwetikhonti taJehova takadzeni letetsembekile, sikhutsateka kutsi silingise kukholwa kwato nekucinisela kwato.​—Jak. 5:10, 11.

10. Yini longayenta kuze liBhayibheli likusite kakhulu?

¹⁰ Loko longakwenta. Fundza liBhayibheli onkhe malanga, futsi ugcine luhla lwemavesi lakusitako. Labanyenti batfole kutsi kufundza umbhalo welusuku ekuseni kubasita kutsi bacale lilanga labo ngemavi lakhutsatako laseBhayibhelini. Lomunye dzadze lokutsiwa nguMariea wakutfola kulusito loko ngesikhatsi kutfolakala kutsi batali bakhe banamdlavuza. Yini leyamsita kutsi acinisele njengobe abanakekela kuletinyanga tekugcina baphila? Utsi: “Onkhe malanga ekuseni bengifundza umbhalo welusuku kubhukwana lotsi Kuhlolisisa ImiBhalo Malanga Onkhe futsi bengicabangisisa ngawo. Loku kwangisita kutsi ngigcwalise ingcondvo yami ngetintfo letiseBhayibhelini kunekutsi ngitinake kakhulu mine kanye nesimo lesicindzetelako bengibhekene naso.”​—Hla. 61:2.

BAZALWANE NABODZADZE

11. Kusikhutsata njani kwati kutsi asisodvwa njengobe sibeketelela tinkinga?

¹¹ Jehova usinikete bazalwane nabodzadze kuze basisite sicinisele. Kwati kutsi “bonkhe bazalwane [betfu] emhlabeni babeketelela kuhlupheka lokufanako” kuyasicinisekisa kutsi asisodvwa. (1 Phet. 5:9) Siyaciniseka kutsi nobe nguyiphi inkinga lesingabhekana nayo, nalabanye bake babhekana nayo, futsi bacinisela. Loko kusho kutsi natsi singacinisela!​—Imis. 14:22.

12. Bangasisita njani bazalwane betfu nabodzadze, futsi yini lesingabentela yona? (2 KubaseKhorinte 1:3, 4)

¹² Njengobe sicinisela, bazalwane betfu nabodzadze bangasikhutsata. Nguloko lokwenteka kumphostoli Pawula. Bekavame kubabonga labo lebebamsita ngesikhatsi aboshelwe endlini, waze wabasho ngemagama. Bebamdvudvuta, bamkhutsata futsi bamsita ngaloko lebekakudzinga. (Fil. 2:25, 29, 30; Khol. 4:10, 11) Kungenteka kwenteke lokufanako nakitsi lamuhla. Nasidzinga lusito kuze sicinisele, bazalwane betfu nabodzadze bahlale bakhona; futsi nangabe nabo badzinga lusito, natsi sihlale sikhona.​—Fundza 2 KubaseKhorinte 1:3, 4.

13. Yini leyasita dzadze Maya kutsi acinisele?

¹³ Bazalwane nabodzadze bamkhutsata kakhulu lomunye dzadze waseRussia lokutsiwa nguMaya. Nga-2020, likhaya lakhe laseshwa, ngekuhamba kwesikhatsi watekiswa licala ngenca yekucocela labanye ngekukholwa kwakhe. Maya utsi: “Ngaleso sikhatsi bengicindzeteleke kakhulu, bazalwane nabodzadze bangishayela futsi bangibhalela, bangicinisekisa kutsi bayangitsandza. Bengati kutsi nginemndeni lomkhulu, nalongitsandzako. Kodvwa kusukela nga-2020, loko kwavele kwangikhanyela kakhulu.”

14. Bazalwane nabodzadze bangasisita njani njengobe sicinisela? (Buka nesitfombe.)

¹⁴ Loko longakwenta. Njengobe ucinisela, hlale usondzelene nebazalwane bakho nabodzadze. Ungesabi kucela labadzala belibandla kutsi bakusite. Bangaba ‘yindzawo yekukhosela nakunemoya, indzawo yekukhosela nakunemvula lenesiphepho.’ (Isa. 32:2) Khumbula nekutsi nebazalwane bakho nabodzadze nabo babeketelela tinkinga. Kwentela lotsite lokuhle kutakusita kutsi uhlale ulinganisela futsi unembono lokahle njengobe ubeketelela inkinga yakho.​—Imis. 20:35.

LITSEMBA LETFU

15. Litsemba libasite njani labo labetsembekile, lokufaka ekhatsi Jesu? (KumaHebheru 12:2)

¹⁵ Jehova usinikete litsemba lelicinile kuze lisisite sicinisele. (Rom. 15:13) Khumbula kutsi litsemba lamsita njani Jesu kutsi acinisele ngelilanga lebelimatima kakhulu ekuphileni kwakhe alamhlabeni. (Fundza KumaHebheru 12:2.) Jesu bekati kutsi kwetsembeka kwakhe bekutawufaka sandla ekungcwelisweni kwelibito laNkulunkulu. Bekakubuke ngalabovu nekuphindze abe naBabe wakhe futsi ngekuhamba kwesikhatsi abuse nabomnakabo labagcotjiwe eMbusweni wasezulwini. Ngendlela lefanako, litsemba letfu lekuphila phakadze emhlabeni lomusha waNkulunkulu lisisita kutsi sibeketelele nobe ngubuphi bumatima lesibubangelwa ngulelive laSathane.

16. Litsemba lamsita njani lomunye dzadze kutsi acinisele, futsi yini loyifundzako kuloko lakusho?

¹⁶ Cabanga ngendlela litsemba leMbuso lelamsita ngayo lomunye dzadze waseRussia lokutsiwa ngu-Anna, indvodza yakhe leyaboshwa futsi yavalelwa ejele njengobe iselindze kutsi kutekwe licala. Ngesikhatsi loku kwenteka, Anna watsi: “Kuthantaza ngelitsemba letfu lesikhatsi lesitako nangekucabangisisa ngalo kungenta kutsi ngingadvumateki kakhulu. Ngiyati kutsi akupheleli la. Jehova utawuncoba futsi natsi sitawuncoba.”

17. Singakhombisa njani kutsi siyabonga ngelitsemba letfu lelisekelwe eBhayibhelini? (Buka nesitfombe.)

¹⁷ Loko longakwenta. Tinike sikhatsi ucabange ngelitsemba lelihle Jehova lasetsembise lona. Tibone useveni lelisha laNkulunkulu futsi ucabange ngetibusiso lesitatitfola. Nobe nguyiphi inkinga lokungenteka sibhekene nayo nyalo itawubonakala ‘iyesikhashana futsi imelula.’ (2 Khor. 4:17) Ngetulu kwaloko, yenta lokusemandleni akho kuze utjele labanye ngekukholwa kwakho. Cabanga kutsi kungenteka kunjani ngabo kubhekana netinkinga letikulelive laSathane babe bangayati injongo yaNkulunkulu ngelikusasa. Ungabenta kutsi bafune kwati lokunyenti mayelana nelitsemba letfu leMbuso ngisho nobe ucoca nabo sikhatsi lesincane.

18. Yini leyenta sitetsembe tetsembiso taJehova?

¹⁸ Ngemuva kwekutsi Jobe akhone kubeketelela tinkinga letinyenti, watjela Jehova watsi: “Nyalo sengiyati kutsi uyakhona kwenta tonkhe tintfo nekutsi kute locabanga kukwenta lokungakwehlula.” (Jobe 42:2) Njengobe Jobe afundza, kute lokungavimba Jehova kutsi afeze injongo yakhe. Leliciniso lingasisita njengobe sicinisela. Asesitsi kunamake logulako, lodvumatekile ngenca yekutsi bodokotela labanyenti behlulekile kumelapha. Kodvwa ubese utfola dokotela lonelwati ngalokugula lanako nalowetsenjwako, futsi ubese uyayibona lenkinga bese uyamchazela kutsi utamelapha njani. Lomake uyakhululeka ngisho nobe kutawutsatsa sikhatsi kutsi agcine aphilile. Nyalo sekangakhona kucinisela ngobe sewunelitsemba, litsemba lekutsi utawuphila. Ngendlela lefanako, kuciniseka ngekutsi litsemba lesinalo ngeliPharadisi litawufezeka, kuyasisita kutsi sicinisele.

19. Yini lesiyidzingako kuze sicinisele?

¹⁹ Njengobe sesibonile, Jehova uyasisita kuze sibeketelele tinkinga tetfu asebentisa umthantazo, liVi lakhe, bazalwane nabodzadze nelitsemba letfu. Nangabe sikusebentisa konkhe loku, Jehova utasisita kuto tonkhe tinkinga lokungenteka sibhekane nato, kuze kube ngulapho ticedvwa ngalokuphelele nakucedvwa lelive laSathane.​—Fil. 4:13.