Ungabhekana Njani Nekuphatfwa Kabi?

1-2. Bantfu labanyenti benta njani nababona kungalungi, futsi yini lesingatibuta yona?

SIPHILA eveni leligcwele kungalungi. Bantfu abaphatfwa kahle ngenca yetizatfu letinyenti, lokufaka ekhatsi simo sabo setemnotfo, kutsi babulili buni, buve babo nobe libala labo lesikhumba. Babhekana nemiphumela lebuhlungu yekunukubetwa kwemvelo lokubangelwa bosomabhizinisi labanjingile nobe baholi nobe-ke bakwente kube kubi kakhulu ngenca yekutsi bafuna kwakha imali. Loku kanye nalokunye kungalungi kusitsintsa sonkhe, kungaba kutsi kusitsintsa ngalokucondzile nobe ngetindlela letibhacile.

² Akumangalisi kutsi labanyenti bayatfukutsela ngenca yekungalungi lokukhona lamuhla emhlabeni. Sonkhe siyafuna kuhlala eveni lasitiva khona siphephile, futsi siphatfwe kahle. Labanye baze bangenele emacembu lalwela lushintjo. Bayatoyitoya kuze bakhombise kutsi abavumelani nahulumende nemitsetfo leshayiwe nobe bavotele baholi betepolitiki labetsembisa kulungisa letinkinga. Nobe kunjalo, njengobe singemaKhristu, sifundziswa kutsi singabi ‘yincenye yelive’ futsi silindzele uMbuso waNkulunkulu kutsi ucedze konkhe kungalungi. (Joh. 17:16) Nobe kunjalo, siyabuva buhlungu futsi ngalesinye sikhatsi sitfukutsele nasibona bantfu bangaphatfwa kahle. Singatibuta: ‘Ngente njani? Kukhona yini lengingakwenta nyalo ngalokungalungi?’ Kuze siphendvule lemibuto, sitawucale sicoce ngekutsi Jehova naJesu bativa njani ngekungalungi.

JEHOVA NAJESU BAYAKWENYANYA KUNGALUNGI

3. Yini leyenta kuvakale nangabe sitfukutsela ngenca yekungalungi? (Isaya 5:7)

³ LiBhayibheli lisinika sizatfu lesenta sitsi yini leyenta kuvakale nangabe singaphatseki kahle nasibona kungalungi. Lisichazela kutsi Jehova wasidala saba ngumfanekiso wakhe nekutsi “utsandza kulunga kanye nekwehlulela ngekungakhetsi.” (Hla. 33:5; Gen. 1:26) Akayuze ente kungalungi, futsi kute ngisho namunye lafuna kutsi ente lokungakalungi! (Dut. 32:3, 4; Mik. 6:8; Zak. 7:9) Sibonelo nje, ngesikhatsi semphrofethi Isaya, waweva ema-Israyeli lamanyenti ‘nakakhala ngenca yelusizi’ ngobe bekaphatfwa kabi ngulamanye ema-Israyeli. (Fundza Isaya 5:7.) Jehova wabajezisa labo lebebachubeka bangawulaleli uMtsetfo wakhe futsi babaphatsa kabi labanye.​—Isa. 5:5, 13.

4. Indzaba lesemaVangelini ivetani ngendlela Jesu bekativa ngayo ngekungalungi? (Buka nesitfombe.)

⁴ NjengaJehova, Jesu uyakutsandza kulunga futsi uyakwenyanya kungalungi. Ngalelinye lilanga ngesikhatsi enta umsebenti wakhe wekushumayela lamhlabeni, wabona lenye indvodza lebeyikhubatekile, lebeyigobene sandla. Jesu bekafuna kuyisita, kodvwa baholi benkholo lebebangenanhlitiyo, bebangafuni ayisite. Batsi Jesu wephula umtsetfo weliSabatha futsi bebangenandzaba nalendvodza lebeyikhubatekile. Wativa njani Jesu ngaloko labakwenta? “Weva buhlungu [kakhulu] ngenca yebulukhuni betinhlitiyo tabo.”​—Mak. 3:1-6.

5. Yini lokufanele siyikhumbule nakwenteka sitfukutsela ngenca yekungalungi?

⁵ Ngenca yekutsi Jehova naJesu kuyabatfukutselisa kungalungi, akusikubi natsi nasitiva ngaleyondlela. (Ef. 4:26) Nobe kunjalo, kufanele sikhumbule kutsi kutfukutsela, ngisho nobe sinesizatfu lesivakalako saloko, angeke kukucedze kungalungi. Ecinisweni, kuhlala sitfukutsele, nobe kungayilawuli intfukutselo yetfu kungasenta sicindzeteleke futsi sigule. (Hla. 37:1, 8; Jak. 1:20) Ngako singabhekana njani nekungalungi? Singafundza esibonelweni saJesu.

LOKO JESU LAKWENTA NAKABONA KUNGALUNGI

6. Ngukuphi kungalungi lebekuvamile ngesikhatsi Jesu alamhlabeni? (Buka nesitfombe.)

⁶ Jesu wabona kungalungi lokunyenti ngesikhatsi alamhlabeni. Wayibona indlela bantfu bebacindzetelwa ngayo baholi benkholo. (Mat. 23:2-4) Bekayati nendlela tiphatsimandla letingemaRoma lebetibaphatsa kabi ngayo bantfu. EmaJuda lamanyenti bekafuna kutfola inkhululeko kumaRoma. Lamanye aze asungula emacembu lebekalwa nemaRoma. Nobe kunjalo, Jesu akazange asungule nobe asekele licembu lelilwela lushintjo. Ngesikhatsi abona kutsi bantfu bebafuna kumenta inkhosi, wesuka kubo.​—Joh. 6:15.

7-8. Yini leyenta Jesu wangetami kucedza kungalungi ngesikhatsi alamhlabeni? (Johane 18:36)

⁷ Ngesikhatsi Jesu alamhlabeni, akazange etame kusebentisana nabosopolitiki kuze acedze kungalungi. Ngasiphi sizatfu? Ngobe bekati kutsi bantfu bete lilungelo nobe likhono lekutibusa. (Hla. 146:3; Jer. 10:23) Abakhoni nekucedza imbhangela yekungalungi. Lelive libuswa nguSathane Develi, losidalwa semoya lesingumbulali, lesisebentisa ligunya laso kuze sibangele kungalungi. (Joh. 8:44; Ef. 2:2) Ngetulu kwaloko, kuba nesono kwenta kutsi ngisho nebantfu labanesifiso lesikhulu sekwenta lokulungile bangakhoni kukwenta loko ngaso sonkhe sikhatsi.​—Shu. 7:20.

⁸ Jesu bekati kutsi nguMbuso waNkulunkulu kuphela lotayicedza ngalokuphelele imbhangela yekungalungi. Kungako acitsa sikhatsi sakhe nemandla akhe “ashumayela futsi amemetela tindzaba letimnandzi teMbuso waNkulunkulu.” (Luk. 8:1) Wacinisekisa ‘labo labalambele kulunga futsi labakomele’ kutsi kukhohlakala nekungalungi kutawuphela. (Mat. 5:6; Luk. 18:7, 8) Nobe kunjalo, loko ngeke kwentiwe ngemacembu lalwela lushintjo, kodvwa kutawentiwa nguMbuso waNkulunkulu, ‘longasiyo incenye yalelive.’​—Fundza Johane 18:36.

LINGISA JESU NAWUBONA KUNGALUNGI

9. Yini lekucinisekisako kutsi nguMbuso waNkulunkulu kuphela lotawucedza kungalungi?

⁹ Lamuhla, sibona kungalungi lokunyenti kakhulu kunaloko Jesu lakubona nakaselamhlabeni. Kodvwa imbhangela yekungalungi ‘kulamalanga ekugcina’ solo nguSathane kanye nebantfu labanesono labalawulako. (2 Thim. 3:1-5, 13; Semb. 12:12) NjengaJesu, siyati kutsi nguMbuso waNkulunkulu kuphela lotawucedza imbhangela yekungalungi. Ngenca yekutsi siwusekela ngalokuphelele uMbuso waNkulunkulu, asivumi kuba yincenye yemibhikisho yalabo labatoyitoyako nobe setsembe hulumende kutsi acedze kungalungi. Cabanga ngalokwenteka kulomunye dzadze lokutsiwa nguStacy.a Ngaphambi kwekutsi afundze liciniso, Stacy bekahlale angenela emacembu lalwela lushintjo. Kodvwa wabese ucala kukungabata loko lebekakwenta. Utsi: “Nangisephakamise lidvolo, bengitibuta kutsi ngiseluhlangotsini lolukahle yini. Nyalo njengobe ngisekela uMbuso waNkulunkulu, ngiyati kutsi ngiseluhlangotsini lolukahle. Ngiyati kutsi Jehova utawubalwela ncono kunami labo labacindzetelwako.”​—Hla. 72:1, 4.

10. Sisho ngani kutsi emacembu lalwela lushintjo awahambisani neseluleko saJesu lesikuMatewu 5:43-48? (Buka nesitfombe.)

¹⁰ Bantfu labanyenti lamuhla bangenela emacembu lalwela lushintjo. Nobe kunjalo, labanyenti babo babese bayatfukutsela, bangalaleli imitsetfo futsi balimate labanye bantfu. Loko akuhambisani nesibonelo saJesu naloko lakufundzisa. (Ef. 4:31) Lomunye umzalwane lokutsiwa nguJeffrey utsi: “Ngiyati kutsi ngisho nemibhikisho lengabonakala inekuthula ingashintja ngekucwabita kweliso ibe nebudlova futsi kwetjiwe tintfo tebantfu.” Nobe kunjalo, Jesu wasifundzisa kutsi siphatse bonkhe bantfu ngelutsandvo, ngisho nalabo labangavumelani natsi nobe labasiphatsa kabi. (Fundza Matewu 5:43-48.) Njengobe singemaKhristu, senta konkhe lokusemandleni etfu kuze sigweme nobe ngabe yini lengahambisani nesibonelo Jesu lasibekela sona.

11. Yini lengavivinya kutimisela kwetfu kungabi yincenye yemacembu lalwela lushintjo?

¹¹ Nanobe sati kutsi uMbuso waNkulunkulu utakucedza ngalokuphelele kungalungi, singahle sikutfole kumatima kulingisa Jesu nangabe singaphatfwa kahle. Cabanga ngaloko lokwenteka kuJaniya, lowabandlululwa. Utsi: “Bengitfukutsele ngibilelana. Ngeva buhlungu kakhulu futsi bengifuna kuphindziselwe lokungalungi lengibhekene nako. Ngabese ngincuma kuba yincenye yelicembu lelilwa nelubandlululo. Bengititjela kutsi kwenta njalo bekuyindlela lephephile yekuveta intfukutselo yami.” Kodvwa ngekuhamba kwesikhatsi, Janiya wabona kutsi bekufanele ente lushintjo. Utsi: “Bengivumela labanye kutsi balawule indlela lebengicabanga ngayo, futsi bebangenta ngibeke litsemba lami kumuntfu kunekutsi ngilibeke kuJehova. Ngancuma kulishiya ngalokuphelele lelicembu.” Ngisho nobe kunesizatfu lesivakalako sekutfukutsela, kufanele sicaphele singakuvumeli loko kutsi kusente singenele tepolitiki.​—Joh. 15:19.

12. Yini leyenta kube kuhlakanipha kukukhetsa kahle loko lesikufundzako, lesikulalelako nalesikubukelako?

¹² Yini lengasisita silawule intfukutselo nasibona kungalungi? Labanyenti kubasitile kukhetsa kahle loko labakufundzako, labakulalelako nalabakubukelako. Letinye tindzaba letiku-internet tishiwo ngendlela yekutsi tetfuse bantfu futsi tibente bakhonone ngahulumende. Ngalokuvamile, betindzaba bangahle basho imibono yabo hhayi loko lokwenteke mbamba. Ngisho nobe babika ngekungalungi lokwenteke mbamba, kutasisita yini vele kuhlale sicabanga ngako? Nangabe sicitsa sikhatsi lesinyenti silalela, sifundza nobe sibukela tindzaba letinjalo singahle sikhatsateke nobe sidvumateke ngalokungenasidzingo. (Taga 24:10) Lokubi kakhulu kutsi singahle sicale kungasasinaki sisombululo lokungiso mbamba sako konkhe lokungalungi​—lokunguMbuso waNkulunkulu.

13. Luhlelo loluhle lwekufundza liBhayibheli lungasisita njani kutsi sihlale sinembono lokahle ngekungalungi?

¹³ Luhlelo loluhle lwekufundza liBhayibheli futsi sicabangisise ngaloko lesikufundzako lungasisita kutsi sikhone kubhekana nekungalungi. Lomunye dzadze lokutsiwa ngu-Alia bekumvisa buhlungu kubona indlela bantfu basendzaweni yangakubo lebebaphatfwa kabi ngayo. Bekubonakala ngatsi labo lebebabaphatsa kabi abentiwa lutfo. Utsi: “Kwadzingeka ngihlale phansi futsi ngitibute: ‘Ngiyetsemba yini vele kutsi Jehova utatilungisa letinkinga?’ Ngaleso sikhatsi ngabese ngifundza Jobe 34:22-29. Lamavesi angikhumbuta kutsi kute umuntfu longabhacela Jehova. Nguye kuphela lowati indlela lelungile yekuphatsa bantfu futsi nguye kuphela lotawulungisa letinkinga ngalokuphelele.” Njengobe siselindzele uMbuso waNkulunkulu kutsi uletse kulunga sibili, kwanyalo kufanele sikubeketelele kungalungi. Kanjani?

LOKO LESINGAKWENTA NGEKUNGALUNGI NYALO

14. Yini lesingayenta kuze singafaki sandla kulokungalungi lokusemhlabeni? (KubaseKholose 3:10, 11)

¹⁴ Kungenteka singakhoni kulawula labanye kutsi bangabaphatsi kabi labanye, kodvwa singakulawula loko lesikwentako. Njengobe sike saveta, silingisa Jesu ngekutsi sikhombise lutsandvo. Lolutsandvo lungasenta kutsi siphatse labanye ngenhlonipho ngisho nalabo labakhutsata kungalungi. (Mat. 7:12; Rom. 12:17) Jehova uyajabula nasiphatsa bonkhe bantfu ngemusa nangekulunga.​—Fundza KubaseKholose 3:10, 11.

15. Kucocela labanye liciniso leliseBhayibhelini kungaba namuphi umphumela kulokungalungi lokukhona?

¹⁵ Indlela lebaluleke kakhulu yekubhekana nekungalungi kutsi sicocele labanye emaciniso laseBhayibhelini. Sisho ngani? Kungenca yekutsi “lwati ngaJehova” lungakushintja kuphila kwemuntfu lebekaneludlame futsi anebudlova abe ngumuntfu lonemusa nalotsandza kuthula. (Isa. 11:6, 7, 9) Ngaphambi kwekutsi lenye indvodza lokutsiwa nguJemal ifundze liciniso, yaba yincenye yelicembu lelivukelako lebelilwa nahulumende lebeyibona ngatsi ucindzetela bantfu. Itsi: “Angeke ubashintje ngenkhani bantfu. Angizange ngishintjwe ngenkhani, kodvwa ngashintjwa ngemaciniso eliBhayibheli lebengiwafundza.” Loko Jemal lakufundza kwamenta kutsi ayekele kulwa. Nangabe babanyenti bantfu labashintjwa liciniso leliseBhayibhelini, batawuba bancane bantfu labatawufaka sandla kulokungalungi lokukhona.

16. Yini lekwenta ufune kucocela labanye ngeMbuso waNkulunkulu?

¹⁶ NjengaJesu, sitimisele kutjela bantfu kutsi uMbuso waNkulunkulu nguwo kuphela likhambi lekungalungi. Lelitsemba lingabakhutsata labo labaphatfwe kabi. (Jer. 29:11) Stacy, lesike sakhuluma ngaye utsi: “Kufundza liciniso kungisite kutsi ngikhone kubeketelela kungalungi lengikubonako nalengibhekene nako. Jehova usebentisa umlayeto weliBhayibheli kuze asidvudvute.” Kuze ucocele labanye umlayeto weliBhayibheli lodvudvutako lomayelana nesisombululo sekungalungi, kufanele utilungiselele kahle. Nangabe uciniseka mbamba ngekutsi kuliciniso loko lokushiwo liBhayibheli lokufundze kulesihloko, utawukhona kubacocela ngekuhlanipha nakungenteka bakhulume ngayo lendzaba labo lofundza nabo nobe losebenta nabo.b

17. Jehova usisita njani kuze sibhekane nekungalungi nyalo?

¹⁷ Siyati kutsi sitawubhekana nekungalungi nangabe Sathane ‘asengumbusi walelive.’ Kodvwa loko akusho kutsi kute longasisita nobe kutsi site litsemba njengobe sisalindzele kutsi ‘acoshwe.’ (Joh. 12:31) Asebentisa imiBhalo, Jehova akagcini nje ngekusitjela kutsi kubangelwa yini kutsi kube nekungalungi lokungaka, kodvwa uphindze asitjele kutsi utiva njani ngekucindzeteleka lokusibangela kona. (Hla. 34:17-19) Asebentisa iNdvodzana yakhe, Jehova usifundzisa indlela lokufanele sente ngayo nyalo nasiphatfwa kabi nendlela uMbuso lotakususa ngayo ngekushesha kungalungi, futsi kungaphindzi kube khona. (2 Phet. 3:13) Shengatsi singachubeka sishumayela tindzaba letimnandzi teMbuso ngemdlandla, sisibuke ngalabovu sikhatsi lapho khona umhlaba utawugcwala ‘kulunga nebucotfo.’​—Isa. 9:7.