Zuza Enhlawulweni YaJesu
Njalo ngemnyaka, BoFakazi BaJehova kanye netigidzi tebantfu labatimemako bayahlangana emhlabeni wonkhe kuze bagubhe kufa kwaJesu njengobe asiyala. (Lukha 22:19) Lesikhumbuto sisisita sicondze kubaluleka kwaloko Jesu lakwenta ngesikhatsi anikela kuphila kwakhe ngenca yebantfu. Siphindze sisikhombise kutsi lenhlawulo yakhe ingasisita njani nyalo kanye nasesikhatsini lesitako.—Johane 3:16.
Ngisho nobe kulomnyaka uyile esikhumbutweni nobe ungakayi, ungazuza njani enhlawulweni yaJesu? Jesu wasifundzisa kutsi sente nati tintfo letimbili letibalulekile:
1. Kufundza ngaNkulunkulu nangaJesu. Nakathantaza kuBabe wakhe losezulwini, Jesu watsi: “Kukwati wena lokuphela kwaNkulunkulu weliciniso nekwati loyo lowamtfuma, lokunguJesu Khristu, kuholela ekuphileni lokuphakadze.”—Johane 17:3.
2. Kusebentisa loko lesikufundzako. Jesu wakugcizelela kutsi kudzingeka sikusebentise ekuphileni kwetfu loko lasifundzisa kona. Sibonelo nje, nakephetsa iNshumayelo yakhe yaseNtsabeni wancoma labo labeva ‘livi lakhe base bayalenta.’ (Lukha 6:46-48) Washo intfo lefanako nangalesinye sikhatsi nakatsi: “Niyajabula nanitati letintfo futsi nitenta.”—Johane 13:17.
Ungatsandza yini kwati lokunyenti ngaNkulunkulu nangaJesu? Uyasifuna yini seluleko lesisebentisekako lesimayelana naloko lokufundzako? Nati letinye tintfo letingakusita.
Kudadisha liBhayibheli nalotsite
Bantfu labanyenti bazuzile ngekuhlolisisa liBhayibheli kanye nekusebentisa loko lelikushoko ngenca yekutsi balidadisha natsi mahhala.
Kuze ufundze lokunyenti ngaloku ngena ekhasini letfu leliku-internet, lelitsi Luhlelo Lwekudadisha LiBhayibheli Ukanye Nemuntfu Lotakusita.
Kuze ubone kutsi kunjani kudadisha liBhayibheli naBoFakazi BaJehova, bukela i-video letsi Siyakwemukela Esifundvweni Sakho SeliBhayibheli.
Kuya Emihlanganweni YaBoFakazi BaJehova
Kabili ngeliviki BoFakazi BaJehova bahlangana etindzaweni tabo tekukhontela letibitwa ngekutsi ngemaHholwa eMbuso.
Wonkhe muntfu angeta kulemihlangano, akudzingeki kutsi uze ube nguFakazi. Ungakhetsa kuya matfupha kulemihlangano nobe ungene kuyo nge-videoconferencing kuye ngetimo tendzawo lokuyo.
Kuze ubone kutsi yini longayilindzela kulemihlangano, bukela i-video letsi Yini Leyentekako Ehholweni LeMbuso?
Kuze utfole umhlangano lodvute nalapho uhlala khona, vakashela likhasi letfu lelitsi Imihlangano Yelibandla YaBoFakazi BaJehova.
Kufundza tihloko kanye nekubukela ema-video laku-website yetfu
Tihloko letinyenti kanye nema-video lakule-website kungakusita kutsi ufundze lokunyenti ngaloko Jesu lakufundzisa kanye nangekubaluleka kwekufa kwakhe.
Sibonelo nje, kuze utfole kutsi kufa kwemuntfu munye kutizuzisa njani tigidzi tebantfu, fundza sihloko lesitsi “Jesu Uyasindzisa—Kanjani?” kanye nalesitsi “Bekudzingeke Ngani Kutsi Jesu Ahlupheke Aphindze Afe?” nobe ubukele i-video letsi Kungani Jesu Afa?