Somiso Lesikhulu—Litsini LiBhayibheli?

• “IChina ibike kutsi kulomnyaka lishisa kakhulu futsi sengumnyaka wesitsatfu kunesomiso.”—I-The Guardian, yangaSeptember 7, 2022.

• “Emave latsite e-Afrika sekahlaselwe somiso iminyaka lesihlanu ilandzelana.”—I-UN News, yanga-August 26, 2022.

• “Incenye lengetulu kwehhafu yeYurophu ihlaselwe somiso futsi lesomiso sibi kakhulu kunalesike saba khona eminyakeni lengu-500 leyendlulile.”—I-BBC News, nga-August 23, 2022.

Tati letinyenti tibiketele kutsi somiso lesinjengalesi sisetawuchubeka futsi kungenteka sibe sibi nakakhulu. Likhona yini litsemba lelikusasa lelincono? Litsini liBhayibheli?

Somiso kanye nesiphrofetho seliBhayibheli

LiBhayibheli laphrofetha ngalebekutakwenteka esikhatsini setfu:

• “Kutawuba . . . nendlala . . . etindzaweni letehlukahlukene.”—Lukha 21:11.

Ngalokuvamile, somiso sibangela indlala. Kuswelakala kwekudla, kuhlupheka kanye nekufa lokubangelwa somiso, kugcwalisa siphrofetho seliBhayibheli.—Sembulo 6:6, 8.

Yini leyenta somiso sibe sibi nakakhulu kulamalanga lesiphila kuwo?

LiBhayibheli liveta sizatfu lesibalulekile lesenta somiso sibe sibi nakakhulu. Litsi:

• “Akusiko kwemuntfu kutsi aticondzisele yena imphilo yakhe.”—Jeremiya 10:23.

Loku kusho kutsi bantfu angeke bakhone ‘kuticondzisela bona imphilo yabo’ nobe kutibusa. Lokwehluleka kutibusa etikhatsini letinyenti kubanga somiso kanye nekweswelakala kwemanti.

• Bososayensi labanyenti bayavuma kutsi tintfo letentiwa bantfu ngito letibangele kushintja kwesimo selitulu lokuphumele ekwandzeni kwesomiso emhlabeni wonkhe.

• Bantfu labaticabangela bona kanye nebantfu labashaya imitsetfo bangakacabangi ngelikusasa babangele kucedvwa kwemahlatsi, kungcoliswa kwemhlaba kanye nekusetjentiswa kabi kwemicebo lembiwa phansi. Loku kubangele kutsi kushe imitfombo yemanti kanye nemifula.

Nobe kunjalo, liBhayibheli lisiniketa litsemba.

Likhona yini litsemba ngelikusasa?

LiBhayibheli letsembisa kutsi Nkulunkulu utawulungisa lesimo sekuswelakala kwemanti. Kanjani?

1. 1. Nkulunkulu ‘utawubhubhisa labo labalimata umhlaba.’ (Sembulo 11:18) Utawususa loko lokubangela kweswelakala kwemanti, lokubantfu lababi, labaticabangela bona futsi labalimata umhlaba ngaloko labakwentako.—2 KuThimothi 3:1, 2.

2. 2. “Indzawo leyomiswe kushisa iyawuba sitiba lesigcwele umhlanga.” (Isaya 35:1, 6, 7) Nkulunkulu utawulungisa umonakalo lobangelwe somiso futsi agucule lomhlaba ube lipharadisi lelinemanti lamanyenti.

3. 3. “Wena unakekela umhlaba, uwente unotse futsi ukhicite kakhulu.” (Tihlabelelo 65:9) Nkulunkulu utawubusisa lomhlaba futsi ugcwale kudla lokunemphilo kanye nemanti lahlantekile.