Kubeketelela Labanye Bantfu—LiBhayibheli Lingasisita Njani?
“Kubeketelela labanye bantfu kwenta kutsi kube nekuthula.”—I-UNESCO Declaration of Principles on Tolerance, 1995.
Ngakulokunye, nasingababeketeleli labanye bantfu, loko kungenta kutsi singabahloniphi futsi sibazonde. Ngalokuvamile, imiva lenjalo ingenta kutsi sibakhulume kabi, sibabandlulule futsi sibaphatse kabi.
Bantfu banemibono lengafani ngekutsi kusho kutsini kubeketelela labanye bantfu. Labanye batsi umuntfu lowemukela bonkhe bantfu ubeketelela lonkhe luhlobo lwekutiphatsa. Labanye bativa ngendlela liBhayibheli lelikuveta ngayo, lokukutsi umuntfu lobeketelela labanye uyayihlonipha indlela labanye bantfu labakhetsa kuphila ngayo ngisho nobe yena angavumelani nayo.
LiBhayibheli lingabasita mbamba yini vele bantfu kutsi babeketelelane kulesikhatsi lesiphila kuso?
Lokwenta LiBhayibheli Likhutsate Kubeketelelana
LiBhayibheli likhutsata bantfu kutsi babeketelelane. Litsi: “Kucabangela kwenu akwatiwe ngibo bonkhe bantfu.” (KubaseFiliphi 4:5) Lisikhutsata kutsi sibacabangele labanye bantfu, futsi singakhetsi. Labo labalalela leseluleko kungenteka bangavumelani nobe bayemukele indlela lomunye umuntfu laphila ngayo, kodvwa bayamyekela ente ngendlela lafuna ngayo.
Nobe kunjalo, liBhayibheli litsi Nkulunkulu ubeke timiso bantfu lokufanele baphile ngato. Litsi: “[Nkulunkulu] ukutjelile kutsi yini lenhle.” (Mikha 6:8) Liveta sicondziso Nkulunkulu lasinikete bantfu kuze baphile imphilo lencono kakhulu.—Isaya 48:17, 18.
Nkulunkulu akakasiniketi ligunya lekwehlulela labanye. Ngekusho kweliBhayibheli, “Munye loSishayamtsetfo nalonguMehluleli . . . Ungubani-ke wena kutsi ungehlulela makhelwane wakho?” (Jakobe 4:12) Nkulunkulu unikete ngamunye wetfu inkhululeko yekutentela tincumo lesitawulandzisa ngato.—Dutheronomi 30:19.
Loko lokushiwo liBhayibheli ngenhlonipho
LiBhayibheli litsi kufanele ‘sihloniphe tonkhe tinhlobo telibantfu.’ (1 Phetro 2:17) Ngako labo labakhetsa kuphila ngetimiso teliBhayibheli bahlonipha bonkhe bantfu ngisho nobe tinkholelo tabo nobe indlela labaphila ngayo yehlukile kuneyabo. (Lukha 6:31) Loko akusho kutsi labo labalandzela loko lokushiwo liBhayibheli bavumelana nato tonkhe tinkholelo nobe imibono yalabanye bantfu, nobe kutsi basekela tonkhe tincumo letentiwa ngulabanye bantfu. Kunaloko, benta konkhe lokusemandleni abo kuze balingise indlela Jesu lebekaphatsa ngayo labanye.
Sibonelo nje, Jesu wake wahlangana nalomunye wesifazane lebekasenkholweni bekangavumelani nayo. Lowesifazane bekahlala nendvodza langakashadi nayo, lokuyintfo Jesu lebekangayikhutsati. Nobe kunjalo, Jesu wakhuluma nalowesifazane ngenhlonipho.—Johane 4:9, 17-24.
NjengaJesu, emaKhristu akulungele kuchazela nobe ngubani lolalelako tinkholelo tawo, kodvwa loko akwenta ‘ngenhlonipho lenkhulu.’ (1 Phetro 3:15) LiBhayibheli lifundzisa kutsi emaKhristu angaphoceleli imibono yawo kulabanye bantfu. Litsi umlandzeli waKhristu ‘akukafaneli alwe, kodvwa kufanele abe nemusa kubo bonkhe bantfu,’ lokufaka ekhatsi nalabo labanetinkholelo letehlukile kunetakhe.—2 KuThimothi 2:24.
Loko lokushiwo liBhayibheli ngenzondo
LiBhayibheli lisitjela kutsi sibe “nekuthula nabo bonkhe bantfu.” (KumaHebheru 12:14) Umuntfu lolwela kuba nekuthula nalabanye akatondzi muntfu. Ngisho nobe angatenti tintfo letiphambene naloko lakukholelwako, utama ngawo onkhe emandla akhe kuze aphilisane nabo bonkhe bantfu ngekuthula. (Matewu 5:9) Ecinisweni, liBhayibheli liphindze likhutsate emaKhristu kutsi atsandze titsa tawo ngekutsi abaphatse kahle labo labawaphatsa kabi.—Matewu 5:44.
LiBhayibheli litsi Nkulunkulu ‘uyatitondza’ nobe ‘uyatenyanya’ tento letentiwa bantfu letenta labanye bative bangahlonishwa nobe letibalimatako. (Taga 6:16-19) LiBhayibheli lisebentisa ligama lelitsi ‘kutondza’ kuze lichaze indlela Nkulunkulu lativa ngayo ngetento letimbi. Liveta kutsi Nkulunkulu ukulungele kutsetselela kanye nekusita labo labashintja tindlela tabo futsi baphile ngetimiso takhe.—Isaya 55:7.
Emavesi eliBhayibheli lakhuluma ngekubeketelela labanye bantfu kanye nekubahlonipha
KuThithusi 3:2: “Bacabangele, bakhombise kuba nemoya lophansi kubo bonkhe bantfu.”
Umuntfu locabangelako nakaveta imibono yakhe leyehlukile kunaloko lokushiwoko uyiveta ngemoya lophansi, ngaleyondlela ukhutsata kuthula.
Matewu 7:12: “Tonkhe tintfo lenifuna bantfu batente kini, nani tenteni kubo.”
Sonkhe kufanele sibonge nangabe labanye bantfu basihlonipha futsi bacabangela indlela lesitiva ngayo. Kuze utfole kutsi ungawusebentisa njani lomtsetfo lodvumile Jesu lasifundzisa wona, fundza sihloko lesitsi “Uyini Umtsetfo Weligolide?”
Joshuwa 24:15: “Tikhetseleni lamuhla kutsi nitawukhonta bani.”
Nasihlonipha lilungelo lalabanye lekutentela tincumo, sisuke sikhutsata kuthula.
Imisebenti 10:34: “Nkulunkulu akakhetsi.”
Nkulunkulu akabandlululi muntfu ngekwelisiko, bulili, buve, buhlanga nobe indlela lakhule ngayo. Labo labafuna kulingisa Nkulunkulu kufanele babahloniphe bonkhe bantfu.
Habakhuki 1:12, 13: ‘Nkulunkulu angeke akhone kubeketelela bubi.’
Kubeketela kwaNkulunkulu kunesiphetfo. Nkulunkulu angeke avumele bantfu kutsi bachubeke benta tintfo letimbi kuze kube phakadze. Kuze utfole lokunyenti, bukela i-video letsi Kungani Nkulunkulu Avumela Kuhlupheka?
KubaseRoma 12:19: “Shiyelani konkhe elulakeni lwaNkulunkulu, ngobe kubhaliwe kwatsiwa: “Jehova utsi: ‘Kuphindzisela kwami, ngimi lengitawuphindzisela.”a
Kute umuntfu Jehova Nkulunkulu lamnikete ligunya lekuphindzisela. Nguye lotawucinisekisa kutsi lokulungile kuyenteka ngesikhatsi sakhe lesibekiwe. Kuze utfole lokunyenti, fundza sihloko lesitsi “Will the Cry for Justice Be Heard?” lesitfolakala ngesiNgisi.”
a Jehova ligama laNkulunkulu. (Tihlabelelo 83:18) Fundza sihloko lesitsi “Ungubani Jehova?”