Kungadli Inyama—Litsini LiBhayibheli?

Liyandza linani lebantfu labangayidli inyama (veganism) emhlaneni wonkhe.

• “Labanye bantfu abayidli inyama ngenca yekutsi abakusekeli kubulawa kwetilwane kuze kutfolakale kudla, timphahla nobe letinye tintfo.”​—I-The Vegan Society.

Ngetulu kwekucabangela tilwane, labanye bantfu abayidli inyama ngenca yekutsi bacabangela imvelo, imphilo yabo nobe ngenca yenkholo labakuyo.

• “Bantfu labangatidli letinye tintfo behlukile kulaba labangayidli inyama ngobe laba labangayidli inyama batsatsa lendlela yabo yekuphila njengentfo labayikholelwako lengashintja umhlaba ube yindzawo lencono.”​—Britannica Academic.

Kungayidli inyama kutawenta yini vele umhlaba kutsi ube yindzawo lencono? Litsini LiBhayibheli?

Umbono weMdali ngebantfu nangetilwane

LiBhayibheli liveta kutsi Jehova Nkulunkulua uMdali wetfu utsatsa bantfu njengalabangetulu kwetilwane nekutsi wabaniketa ligunya ngetulu kwato. (Genesisi 1:27, 28) Nkulunkulu wabese ubaniketa imvume yekutsi bangatidla tilwane. (Genesisi 9:3) Nobe kunjalo, akabavumeli kutsi batiphatse kabi.​—Taga 12:10.

Ngekusho kweliBhayibheli, umuntfu ngamunye kufanele atenele sincumo sekutsi utayidla yini inyama nobe cha.b Kukhetsa kwetfu kuyidla nobe kungayidli akusenti sibe bantfu labancono emehlweni aNkulunkulu. (1 KubaseKhorinte 8:8) Akukafaneli sehlulele labanye ngaloko labakhetsa kukudla.​—KubaseRoma 14:3.

Lokungenta umhlaba ube yindzawo lencono

LiBhayibheli liveta kutsi indlela lesikhetsa kuphila ngayo angeke itilungise tinkinga letisemhlabeni, ngobe letinyeti tato tibangelwa tepolitiki, tenhlalo kanye netetimali, futsi bantfu angeke bakhone kutilungisa. LiBhayibheli litsi:

• “Intfo legwegwile angeke ize icondziswe.”​—Umshumayeli 1:15.

UMdali wetfu utaticedza tinkinga letisemhlabeni. LiBhayibheli lisebentisa inkhulumo lengumfanekiso nalichaza loko latakwenta.

• “Ngabona lizulu lelisha nemhlaba lomusha; ngobe lizulu lelidzala nemhlaba lomdzala sekwendlulile, nelwandle alusekho.”​—Sembulo 21:1.

Nkulunkulu utawenta uMbuso wakhe losezulwini, nobe “lizulu lelisha,” utsatsele bohulumende bebantfu nobe “lizulu lelidzala” sikhundla. LoMbuso utawususa ‘umhlaba lomdzala,’ lokubantfu lababi, futsi utawubusa “umhlaba lomusha,” nobe labo labawusekela ngekutitsandzela.

Bantfu batawufundza kuphilisana kahle netilwane futsi bayiphatse kahle nemvelo nasekubusa uMbuso waNkulunkulu.​—Isaya 11:6-9.