Kuphepha Kwebantfu Besifazane​—Loko Lokushiwo LiBhayibheli

“Nangisemncane, umnaketfu bekangihlukumeta onkhe malanga, angishaya futsi angikhulumise kabi. Nasengishadile, maketala naye bekangihlukumeta. Bobabetala namaketala bebangiphatsisa kwesigcila. Bengicabanga nekutibulala.”​—Madhu,a India.

I-World Health Organization iyavuma kutsi, “budlova lobentiwa kubantfu besifazane buyintfo levamile emhlabeni wonkhe.” Lenhlangano itsi kulinganiselwa kutsi kubantfu besifazane labatsatfu, munye wabo uyashaywa nobe ahlukunyetwe ngekwelicansi.

Nangabe kuke kwenteka kuwe loku, ungahle utive wesaba kutsi utawukhulunyiswa kabi, ushaywe nobe uhlukunyetwe ngekwelicansi nobe ngukuphi lapho uyakhona. Ngenca yekuhlukunyetwa kanye kuphatfwa kabi kwebantfu besifazane, ungahle ubone shengatsi bantfu labanyenti bacabanga kutsi ‘Bantfu Besifazane abakabaluleki.’ Bantfu besifazane babalulekile yini vele kuNkulunkulu?

Uyini umbono waNkulunkulu ngebantfu besifazane?

UmBhalo: “[Nkulunkulu] wabadala kwaba ngulomdvuna nalomsikati.”​—Genesisi 1:27.

Lokukushoko: Nkulunkulu wadala bantfu labadvuna kanye nalabasikati. Ufuna bonkhe bahlonishwe. Ngetulu kwaloko, ulindzele kutsi indvodza ‘itsandze umkayo, njengobe ititsandza yona,’ ingamlawuli, ikakhulukati ngekusebentisa emavi lahlabako nobe imshaye. (Kubase-Efesu 5:33; KubaseKholose 3:19) Kuyacaca kutsi kuphepha kwebantfu besifazane kubalulekile kuNkulunkulu.

“Nangisesemncane, tihlobo tami betingihlukumeta ngekwelicansi. Nangineminyaka lengu-17, umcashi wami wetsembisa kungicosha emsebentini nangingalali naye. Nyalo sengimdzala, kodvwa umyeni wami, batali bami, nabomakhelwane bangenta ngitive ngingakabaluleki. Ngekuhamba kwesikhatsi ngafundza ngeMdali wetfu, Jehovab. Uyabahlonipha bantfu besifazane. Loku kwangicinisekisa kutsi uyangitsandza futsi ngibalulekile kuye.”—Maria, Argentina.

Yini lengakwenta utive uncono?

UmBhalo: “Kunemngani losondzela kakhulu kwengca umnakenu wengati.”​—Taga 18:24.

Lokukushoko: Umngani sibili utakusekela. Tjela umuntfu lometsembako indlela lotiva ngayo nangabe loko kutokwenta utive uncono.

“Kwaphela iminyaka lengu-20 ngingatjeli muntfu kutsi ngahlukunyetwa ngekwelicansi. Ngenca yaloko bengingajabuli, ngikhatsatekile futsi ngicindzetelekile, kodvwa ngativa ngikhululeke kakhulu nangitjela lotsite ngaloko lokwenteka kimi.”​—Elif, Türkiye.

UmBhalo: “Niphonse konkhe kukhatsateka kwenu kuye, ngobe uyanikhatsalela.”​—1 Phetro 5:7.

Lokukushoko: Nkulunkulu uyakulalelisisa nawuthantaza. (Tihlabelelo 55:22; 65:2) Ngesizatfu sekutsi uyakukhatsalela, angakusita ubone kutsi ubaluleke kangakanani kuye.

“Kufundza ngaJehova kwangisata ngativa sengincono kulobuhlungu lebengibuva ngenca yekuhlukunyetwa. Nyalo, sengiyakhona kuthantaza ngitjele Nkulunkulu indlela lengitiva ngayo. Ufana nemngani loyicondza kahle indlela lengitiva ngayo.”​—Ana, Belize.

Nkulunkulu uyoke akucedze yini kuphatfwa kabi kwebantfu besifazane?

UmBhalo: “Jehova . . . utawutiphatsa ngekulunga tintsandzane kanye nalabacindzetelekile, kuze bantfu labasemhlabeni bangaphindzi babesabise.”​—Tihlabelelo 10:17, 18.

Lokukushoko: Nkulunkulu utakucedza konkhe kungalungi lokufaka ekhatsi kuphatfwa kabi kwebantfu besifazane.

“Kwati kutsi madvutane Jehova utakucedza konkhe kuphatfwa kabi kwebantfu besifazane ngisho nekwemantfombatane lasemancane kuyangidvudvuta. Kungente ngaba nekuthula kwengcondvo.”​—Roberta, Mexico.

Tfola kutsi liBhayibheli lingakuniketa njani litsemba, nekutsi yini lengakwenta ukwetsembe loko lelikwetsembisako, kanye naloko BoFakazi BaJehova labakwentako lamuhla kuze basite bantfu basebentisa liBhayibheli. Cela kuvakashelwa.

Lesihloko siyatfolakala nange-PDF futsi ungatitsatsela sona.