Ncoba Situnge Ngekwakha Bangani​—Indlela LiBhayibheli Lelingasita Ngayo

Nga-2023, tati temphilo titfole kutsi kuba nesitunge kuyinkinga lenkhulu kutemphilo, futsi kudzingeka kwentiwe lokutsite ngayo. Yini lengentiwa kuze kucatululwe lenkinga?

• Dr. Vivek Murthy, U.S. surgeon general utsi: “Situnge kanye nekutehlukanisa nalabanye bantfu kungalimata imphilo yetfu futsi kuphatamise nenjabulo lesinayo. Nobe kunjalo, kukhona lesingakwenta ngako.” Yini lesingayenta? “Kancane kancane singatsatsa tinyatselo tekucinisa bungani lesinabo nalabanye.”a

Kuba nesitunge akubangwa nje kuphela kutehlukanisa nalabanye bantfu. Ngalesinye sikhatsi labanye bangativa banesitunge ngisho basemkhatsini webantfu. Kunobe yini leyenta umuntfu abe nesitunge, liBhayibheli lingasisita. Lineteluleko letisebentako letingasisita sicinise bungani lesinabo nalabanye kuze silwe nesitunge.

Timiso teliBhayibheli letingasisita

Bani ngumuntfu lococako. Loku kufaka ekhatsi kutjela labanye indlela lotiva ngayo, uphindze ubalalelisise nabakhuluma. Nawukhombisa lomunye umuntfu kutsi unendzaba naye, buhlobo bakho naye butawucina.

• Simiso seliBhayibheli: “Ningaticabangeli nine kuphela, kodvwa nicabangele nalabanye.”​—KubaseFiliphi 2:4.

Bani nebangani labehlukahlukene. Kulungele kwakha bangani nebantfu labadzala nobe labancane kunawe, labakhuliswe ngendlela lengafani neyakho nobe labanebuve lobehlukile.

• Simiso seliBhayibheli: “Vulani tinhlitiyo tenu.”​—2 KubaseKhorinte 6:13.

Kuze utfole kutsi ungabakha njani budlelwane lobucinile nalabanye, fundza sihloko lesitsi “Ukwanelisa Isifiso Sethu Sokuba Nabangane,” lesitfolakala ngesiZulu.